Kitawo mar'ario mapa Musa m'ilwoŋo ni Wok 11 - KITAWO MALEŊ

Musa langa tho p'okayin

¹ Rwoth owaco ri Musa ni, “Abino dhiro nyaka gir'acula acel kendo kwoŋ Farawo gi ji pere. Rumacen ma meno go bino weyo win kadho. Adieri go bino riemo wijoje wok ka.

² Onyo wac ri Joisiraili jowokway joger pajo thiwino ma zahabu gi feza.”

³ Rwoth omiyo Jomisir lworo Joisiraili. Adieri, jodhum gi ji je jotero Musa paka jacwo madwoŋ.

⁴ Musa owaco ri Farawo ni, “Rwoth waco ni, ‘Kapa sawa aucel ma wor, abino wotho i Misir,

⁵ aka kisi okayo i Misir bino tho, wok kwoŋ okayo pa Farawo ma ripo lunjo ker, tundo kwoŋ okayo pa ŋeca madhako ma rego ŋano. Aka kiri nyithindhi dhok makayo je jobino tho.

⁶ Bino bedo ywak madwoŋ swa i lowo ma Misir gipi, nger m'oyido fodi k'obedo, kosa k'obedi kendo.

⁷ To ongoye kada gwok ma bino gwe gi Joisiraili kosa ogwaŋe pajo. Kenyo wibino ŋeyo nike An, Rwoth, aketho pokirok i dier Jomisir kodi Joisiraili.’ ”

⁸ Macowe Musa owaco ni, “Jodhum perin je jolabino bongan to jokule piny ruwaŋan, aka jobino kwayan kwanyo ji paran wakadhi. Rumacen ma gino, abino kadho.” Kenyo Musa oeye woko bongi Farawo i nge madit.

⁹ Rwoth oyido owaco ri Musa ni, “Farawo k'owinjin ŋey atim gir'aura paran man i Misir.”

¹⁰ Musa gi Aron jotimo gir'aura me je ruwaŋ Farawo, to Rwoth omiyo go bedo gi wictek, aka k'oweyo Joisiraili weyo piny pere.