Kitawo mar'ario mapa Musa m'ilwoŋo ni Wok 10 - KITAWO MALEŊ

Bonyo

¹ Kenyo Rwoth owaco ri Musa ni, “Kadhi irom gi Farawo. Atieko miyo go gi jodhum pere bedo gi wictek, ŋey anyal nyutho gir'aura paran i dier jo,

² aka ŋey winyal waco ri nyithindho mewin gi nyikway win nger m'amiŋ'iye Jomisir munyo atimo gir'aura paran. Wijoje wibino ŋeyo ni An Abedo Rwoth.”

³ Ameno Musa gi Aron jokidho bongi Farawo, aka jowaco rigo ni, “Rwoth, Were pa Joebulaniya waco ni, ‘Inomedere kwero kiri keraŋo mwolok ruwaŋan? Weyi ji paran jokadhi ŋey jowonyal laman.

⁴ K'inokwer, neni, abino kelo bonyo i piny perin dikin.

⁵ Jobino bedo kweth ma jolaumo piny kicutho. Jobino camo kisi gima pe k'onyeko, kiri gi yen m'odoŋ.

⁶ Jobino poŋ i udi perin kodi apa jodhum perin. Jobino bedo marac loyo gimoro je ma kwarere pajo oneno.’ ” Kenyo Musa owire to eye woko bongi Farawo.

⁷ Jodhum pa Farawo jowaco rigo ni, “Jal me okeli kwoŋ wan teko kiri keraŋo? Weyi cwo Joisiraili jokadhi, ŋey jowolami Rwoth Were pajo. Ikiniaŋ nike Misir orere?”

⁸ Ameno okeli Musa gi Aron ruwaŋ Farawo, aka owaco rijo, “Winyalo kadho ŋey wilam Rwoth Were mewin. To jokune ma jokadho?”

⁹ Musa odwoko ni, “Wabino kadho gi nyithindho mawan, jom'oti, rombo, diegi, kodi dhok mawan, kole waripo timo kalima ma miyo Rwoth dwoŋ.”

¹⁰ Aka Farawo owaco ni, “Akwoŋere i nyingi Rwoth nike akibino weyo win kadho gi mon kodi nyithindho mewin. Neni, winitie g'atoŋa marac i paro.

¹¹ Be! Cwo kende ama jokadhi jowolami Rwoth, kole meno a gim'iyenyo.” Aka oriemo Musa kodi Aron ngoye woko i waŋe.

¹² Kenyo Rwoth owaco ri Musa ni, “Riey cingin i lowo ma Misir ikeli bonyo. Jobino camo kisi gima dongo, kodi kisi gima pe k'onyeko.”

¹³ Ameno Musa orieyo luth pere, aka Rwoth omiyo koyo ma yuwok ceŋ kudho ndelo no gipi gi wor no gipi; aka kani piny yawere, koyo oyido okelo bonyo.

¹⁴ Jobino i tome to jopoto i piny gibe. Obedo tome bonyo m'oyido fodi k'oneni, kosa kilaneno kendo.

¹⁵ Joumo piny cuka lowo olokere macol gi jo. Jocamo kisi gima pe oyido oweyo kiri gi olemo ma yen. Ongoye gima nyaboke pendi m'odoŋ kwoŋ cemo ma ndelo kosa yath i lowo ma Misir gipi.

¹⁶ Kenyo Farawo olwoŋo Musa gi Aron piyo to waco ni, “Atimo reco kwoŋ Rwoth Were mewin kodi win.

¹⁷ Onyo riameno, cwaki ran win rume kende, aka wikway Rwoth Were mewin wokwany woko gir'acula ma tho me kwoŋan.”

¹⁸ Ameno Musa oeye woko bongi Farawo to kwayo Rwoth.

¹⁹ Aka Rwoth owiro koyo ma yuwok ceŋ i koyo matek yupodho ceŋ, m'otiŋo bonyo to wito jo i nam m'obokere; aka ongoye bonyo kad'acel m'odoŋ i Misir gipi.

²⁰ To Rwoth omiyo Farawo bedo gi wictek, aka k'oweyo Joisiraili kadho.

Mudho

²¹ Kenyo Rwoth owaco ri Musa ni, “Riey cingin yupolo ŋey mudho wobin i lowo ma Misir, mudho mapek swa.”

²² Ameno Musa orieyo cinge yupolo aka mudho mapek obedo i lowo ma Misir ma ndelo adek.

²³ Jomisir jok'onyalo neno wegi, aka ongoye ŋat'owok i ot i hongo no. To Joisiraili oyido jonitie gi lero kama jobed'iye.

²⁴ Kenyo Farawo olwoŋo Musa aka owaco ni, “Kadhi wilam Rwoth, kiri gi nyithindho mewin kodi mon mewin jowokadhi. To weyi win rombo, diegi, kodi dhok mewin jowodoŋ ka.”

²⁵ To Musa odwoko ni, “Meno ibino miyo wan ogwaŋe ma miyo cowirok, kodi cowirok awaŋa ri Rwoth Were mawan.

²⁶ Be, waripo kadho g'ogwaŋe mawan m'ongoye m'odoŋ cen. Wan wegi waripo yero ogwaŋe ma lamo gine Rwoth Were mawan. Aka cuka watundo kenyo, wakibino ŋeyo ogwaŋe mene ma miyo go.”

²⁷ Rwoth omiyo Farawo bedo gi wictek, aka k'onyalo weyo jo kadho.

²⁸ Farawo owaco ri Musa ni, “Eye woko ruwaŋan! Ikir'imiyan anenin kendo! I ndelo ma inonenan iye, ibino tho.”

²⁹ Musa odwoko ni, “Itire, ikibino nenan kendo.”