Esita 8 - KITAWO MALEŊ

Kere miyo Modekay dwoŋ ma malo

¹ I ndelo no kere omiyo Esita lim pa Haman jakwor pa Joyuda. Kere olwoŋo Modekay rupiri Esita oyido otieko waco ri kere wat pere gi Modekay.

² Kere olunyo peta pere ma go ketho gine cinge i kisi ndiko wok i lwet cinge, aka omiyo Modekay. Peta me am'oyido kere omayo Haman. Kenyo Esita omiyo Modekay dhumo ŋaŋo pa Haman je.

Esita gi Modekay jocano nger ma botho Joyuda

³ Esita doko ogik to luwo gi kere. Go opodho i tiendi kere gi pigi waŋe; aka oywaki ri kere wonyali juko can ma neki ma Haman nyakwar Agag oyido otimo ma reyo Joyuda.

⁴ Kere onyutho Esita luth pa kere to mako.

⁵ Esita oay malo to cungo ruwaŋ kere aka owaco ni “K'inen kere winjo kodan maber, aka k'inen kere woran, aka obedo gimo'tire iwaŋ kere aka asangala go, weyi kere wondiki balwa ma wiro cik ma Haman wod pa Hamedatha aka nyakwar Agag oyido ondiko ma reyo woko Joyuda je ma jonitie i kisi adec ma ker pa kere.

⁶ Rupiri anonyal nedi neno teko me ka bino kwoŋ ji paran! Kosa anonyal nedi ciro neno k'ireyo wade paran!”

⁷ To kere Aritakises waco ri Esita nyamicala gi Modekay Jayuda ni, “Atieko miyo oŋaw Haman i kanek rupiri go oyido mito reyo woko Joyuda aka amiyo Esita lim pere je.

⁸ To onyo pama winyalo ndiko i nyingan gima cuny win mito ma mako kwoŋ Joyuda, aka wimwon gi peta pa kere; rupiri ndiko moro je m'ondiki i nyingi kere t'imwono gi peta pa kere kinyal wiro i nger moro je.”

⁹ Modekay olwoŋo jondiko pa kere ka piero ario g'abic ma dwe mar'aucel dwe m'ilwoŋo ni Sivan. Go owaco rijo ndiko cik ri Joyuda gi jodhum, rwodhe, gi jotel je ma kisi adec je 127; wok i piny Indiya, tundo i piny Ethopiya. Balwin ondiki ri kisi adec, ri kisi nono i dhodhok pajo, gi ri Joyuda bende i dhodhok pajo.

¹⁰ Modekay omiyo ondiki balwin i nyingi kere aka omwon gi peta pa kere to oro jomikwenda mayil yil tero. Jomikwenda me jogweyo kayina m'oyido ioro ma timo tic pa kere.

¹¹ I balwin me, kere omiyo Joyuda meni ma riwirok kanyacel nyalo gwoko kwo pajo. Oyey jo i kisi adec neko, thumo, toŋo, gi reyo woko jokwor pajo je, mon, nyithindho, kiri gi cwo aka jokwany gigipiny pajo ka jomonji jo.

¹² Cik me oyido ripo tic i kisi adec ma ker pa kere Aritakises i ndelo acel k'apar g'adek i dwe mar'apar g'ario dwe m'ilwoŋo ni Adar

¹³ Balwin me oyido ripo wosoma paka cik i kisi adec ri nonin je, aka Joyuda joyikere culo kwor kwoŋ jokwor pajo je.

¹⁴ Kere owodho or to jomikwenda mayil yil jogweyo kayina kareno jopoko balwin me i tindi madwoŋ Susa.

¹⁵ Kenyo Modekay oruko nanga manyabululu gi nanga matar paka kere gi sangaria ma pilin gi zahabu i wiye; to tweyo i bade nanga manyarangi ariŋo. Ji josangala swa gi cik manyen me.

¹⁶ Joyuda josangala aka jowinjo maber; aka jolimo wor i kisi adec.

¹⁷ I kisi adec gi tindi madwoŋ ma cik pa kere otund'iye, Joyuda jobedo gi kisangala aka jofore. Joketho ndelo ma camo kalima. Medo kwoŋ meno, ji ma nonin man jowire aka jolokere Joyuda rupiri jobedo gi lworo rijo.