Esita 5 - KITAWO MALEŊ

Esita lwoŋo kere gi Haman i kalima

¹ I ndelo mar'adek ma riyo pere, Esita oruko nangin madwoŋ pere aka okidho to cungo i dhiot ma kisika ma iye m'otitere gi kom pa kere. I waŋceŋ acel no kere bende oyido obedo i kom pere ma dhum to ŋiyo dhiot.

² Tekin kere neno Esita ocungo tirtir gi dhiot ma oti pere, Esita oywayo cunye. Kere orieyo ri Esita luth pa kere to Esita dhire cegin aka ogeyo gi cinge.

³ Kere openjo Esita nyamicala ni, “Aŋo Esita nyamicala? Aŋo m'ikwayo? Gim'imito je abino miyin; makada nende bedi ni imito adec ma ker paran.”

⁴ Esita odwoko ni, “K'inen kere winjo maber, weyi kere gi Haman jobin i kalima m'atimo rin.”

⁵ Kenyo kere owaco ni wolwoŋi Haman piyo jowotimi gima cuny Esita mito. Kere gi Haman jokidho i kalima pa Esita.

⁶ Munyo jomedho, kere doko openjo Esita ni, “Aŋo m'imito? Gim'imito je abino miyin. Aŋo m'ikwayo? Makada nende bedi ni imito adec ma ker paran je abino ketho i kare.”

⁷ Esita odwoko ni, “Me a gim'akwayo, aka me a gim'amito.

⁸ K'inen kere winjo kodan maber, aka adieri go oyikere miyan gim'akwayo aka amito, ere weyi kere gi Haman jowobin i kalima m'atimo rijo. I kalima no, am'abino waco ri kere gima cunyan mito.”

Haman cano neko Modekay

⁹ Haman oweyo kalima no munyo go sangala swa aka cunye opoŋ mo. To tekin Haman neno Modekay i waŋkac ma peco pa kere, oneno ni Modekay k'onyutho wor rigo munyo go luwo, aka omako Modekay i cunye.

¹⁰ To makada nende, Haman odhumo nge pere aka odok peco pere. Munyo go otundo peco, olwoŋo merin pere gi dhako pere Zeres.

¹¹ Haman ocako kwano rijo ŋaŋo pere je kareno pakere. Okwano rijo nyithindho mayac pere to yuma rijo nger ma kere omedo go dwoŋ ma malo loyo jodhum wadi go je; ma nyutho ni kere woro go.

¹² Haman omedere waco rijo ni, “Maloyo mere kiri Esita nyamicala k'oyeyo ŋatimoro je kidho i kalima pere kwanyowoko an gi kere. Aka Esita doko olwoŋan kidho gi kere i kalima man dikin.

¹³ To gigipiny me je fodi kinyal yeŋan kafodi amedere neno Modekay Jayuda no munyo fodi nitie i waŋkac ma peco pa kere.”

¹⁴ Kenyo dhako pere Zeres gi merin jowaco rigo ni, “Raŋo i kiwaci wogeti kanek ma fut piero abirio g'abic! Dikin odikin t'iwaco ri kere woŋaw Modekay iye aka nyaka ikadhi i kalima no munyo cunyin ber.” Haman oparo ni rieko no ber am'omiyo oneno ni ogeti kanek ma fut piero abirio g'abic.