Esita 4 - KITAWO MALEŊ

Modekay kwayo kony pa Esita

¹ Munyo Modekay oniaŋ kwoŋ can me, oyeco woko nangin pere aka oruko kutiya to wiro buru i wiye. Go owotho i tindi madwoŋ Susa gipi kareno ywak gi dwonde ma malo swa gi gwayo.

² Go okidho aka ocungo i waŋkac ma peco pa kere. Go k'onyalo donjo rupiri oyido kiyey ŋat'orukere paka go donjo peco pa kere.

³ Munyo Joyuda ma kisi adec jowinjo cik pa kere ma mako kwoŋ jo, jobedo gi geregere swa aka jotiŋo dwondi gin to jogoyo ndur. Joje jocako riyo aka joruko kutiyin aka jowiro buru i wiy gin.

⁴ Nyir ma jotiyo ri Esita nyamicala jokidho bongi go aka jokowo rigo kwoŋ Modekay. Esita obedo gi geregere swa. Go odhiro ri Modekay nangin maber ŋey woluny woko kutiya aka Modekay k'oyeyo.

⁵ Esita olwoŋo Hathak ma lur, ŋeca pere ma kere won am'omiyo go; aka ooro go bongi Modekay penjo go ni raŋo go ywak gi dwonde ma malo aka oruko kutiya to wiro i wiye buru.

⁶ Hathak bende okidho bongi Modekay kam'othangere dho waŋkac pa kere.

⁷ Modekay owaco ri Hathak gim'otimere rigo je. Go owaco ri Hathak kwoŋ cikirok ma Haman otimo, gi welo pesa ma Haman ociko ketho i dero pesa pa kere k'inen Joyuda je oneki.

⁸ Modekay omiyo Hathak ndiko ma cik ma Susa ma luwo kwoŋ tho pa Joyuda oter ri Esita aka wonyami rigo tiende. Modekay doko omedo oro Hathak bongi Esita ni go ripo kidho bongi kere woywaki ri kere wonyali botho ji pere.

⁹ Hathak ogik bongi Esita aka okowo rigo gima Modekay owaco rigo je.

¹⁰ Esita omiyo Hathak mikwenda me tero ri Modekay

¹¹ “Kisi nyatoro je oŋeyo cik ma Pasia ni nyatoro moro ma kidho bongi kere mafodi kere won k'olwoŋo go iripo neko. Ka k'obedo ameno, nitie nyaka yo acel kende ma both cik no; meno nyaka ka kere onyutho ŋato luth pere aka nyaka ŋato both. To wok cuka kere lwoŋan kidho bongi, otieko kadho hongo ma romo dwe acel.”

¹² Hathak owaco ri Modekay gima Esita odwoko.

¹³ Modekay odwoko Esita ni, “Ikir'ipar i cunyin ni kwoŋ Joyuda je iŋat'ibino both nyaka rupiri ni initie peco pa kere.

¹⁴ K'inoliŋaliŋa i hongo ma teko ama, Were bino konyo Joyuda to botho jo. To in gi peco pa benin wibino rere; rupiri ŋa m'oŋeyo! Kono dwoŋ no ilimo manyalo konyo i hongo ma cal gama.”

¹⁵ Esita odwoko Modekay ni

¹⁶ “Kadhi icoki Joyuda je ma jonitie i tindi madwoŋ Susa. Riy win kareno wikwayo ran ma ndelo adek gi wor adek; ongoye nyatoro ma wocemi kosa womadhi pi. An gi ŋecin paran bende walariyo; aka makada nende cik kiyeyan kidho bongi kere, k'imito nekan ro timo ameno, wonekan.”

¹⁷ Modekay okadho aka otimo gima Esita owaco rigo.