Kitawo mar'abic mapa Musa m'ilwoŋo ni Cik 27 - KITAWO MALEŊ

Cik pa Were m'ondiki i telin

¹ Kenyo Musa kodi jodongo ma Isiraili jomiyo ji or ka waco ni: “Kur win or je m'amiyo win konon.

² I ndelo ma wilaŋado Yordan donjo i lowo ma Rwoth Were mewin miyo win, wiripo dhuro telin mapando to wifuyo.

³ Wiripo ndiko i jo wac je ma cik me ka witieko ŋado, donjo i lowo ma Rwoth Were mewin miyo win, lowo ma mol gi cak kodi mo kic, paka Rwoth Were pa kwarere mewin ociko win.

⁴ Ameno ka witieko ŋado Yordan, wilajengo telin paka amiyo win or konon, i Got Ebal, wiripo fuyo jo.

⁵ Wiripo geto ri Rwoth Were mewin migam, migam ma telin ma fodi wikior'iye cuma moro je.

⁶ Telin ma k'opay ama wiripo oro ma geto migam ri Rwoth Were mewin. Kenyo wilamiyo Rwoth Were mewin mic awaŋa i wiye.

⁷ Miy win mic ma siem, to wicamo kenyo, ka wisangala ruwaŋ Rwoth Were mewin.

⁸ Wiripo ndiko i telin no wac je ma cik me ma neno maber.”

⁹ Musa kodi jocway ri Were i wi migam ma Jolevi joluwo gi Joisiraili je ka jowaco ni, Liŋ win aka wiwinji, Awi Isiraili! Konon me wilokere ji pa Rwoth Were mewin.

¹⁰ Riameno winji win dwondi Rwoth Were mewin, kuro or pere kodi cik pere paka amiyo win or konon.

Kwoŋ ma kwero winjo

¹¹ I ndelo acel no Musa omiyo ji or ka waco ama:

¹² Ka witieko ŋado Yordan, nonin me jolacungo wi got Gerizim miyo ji silwany: Simeo, Levi, Yuda, Isakar, Yozefu, kodi Benyamin.

¹³ Aka nonin me jolacungo wi Got Ebal lamo ji: Ruben, Gad, Aser, Zebulun, Dan, kodi Nafital.

¹⁴ Aka Jolevi jolawaco ri Joisiraili je gi dwondi jo ma malo ama:

¹⁵ Kwoŋ ri ŋata timo cal m'opay kosa cal m'onyel je m'obedo amien ri Rwoth, tic ma cingi jandijo ma cwec to lamo manyaliŋliŋ. Ji je joladwoko ni, “Obedi Ameno!”

¹⁶ Kwoŋ ri ŋata kiwor bamere kosa min. Ji je joladwoko ni, “Obedi Ameno!”

¹⁷ Kwoŋ ri ŋata fudho kew pa jager pere. Ji je joladwoko ni, “Obedi Ameno!”

¹⁸ Kwoŋ ri ŋata rwenyo ŋata waŋ'otho i royo ma k'otire. Ji je joladwoko ni, “Obedi Ameno!”

¹⁹ Kwoŋ ri ŋata wiro tiro ri japath, nyithindho kic, kodi citho. Ji je joladwoko ni, “Obedi Ameno!”

²⁰ Kwoŋ ri ŋata nindo gi cipa bamere, kwoŋbedo oyawo kinyoro pa bamere. Ji je joladwoko ni, “Obedi Ameno!”

²¹ Kwoŋ ri ŋata nindo g'ogwaŋ moro je. Ji je joladwoko ni, “Obedi Ameno!”

²² Kwoŋ ri ŋata nindo gi nyamin, kosa obedi nyar bamere kosa nyar min. Ji je joladwoko ni, “Obedi Ameno!”

²³ Kwoŋ ri ŋata nindo gi ore madhako. Ji je joladwoko ni, “Obedi Ameno!”

²⁴ Kwoŋ ri ŋata neko jager pere manyaliŋliŋ. Ji je joladwoko ni, “Obedi Ameno!”

²⁵ Kwoŋ ri ŋata jolo nyew ma oyo remo ma bubanja. Ji je joladwoko ni, “Obedi Ameno!”

²⁶ Kwoŋ ri ŋata k'omaki wac je ma cik me kodi kuro je. Ji je joladwoko ni, “Obedi Ameno!”