Kitawo mar'abic mapa Musa m'ilwoŋo ni Cik 22 - KITAWO MALEŊ

¹ Ikir'inen dhiaŋ kosa rombo pa jager perin ocodo to kadho, t'iweyo, adieri iripo dwoko jo ri won mere.

² To k'inen won mere nitie bor kodin, kosa ikuya won mere, iripo tero peco perin, aka ripo doŋ bongin cuka won mere obin rango t'idwoko rigo.

³ Ameno apaka iripo timo gi punde pa jager perin, nanga pere, kosa gimoro je pa jager perin m'orweny t'inwaŋo ikir'ikan paka aperin.

⁴ Ikir'inen punde pa jager perin kosa dhiaŋ opodho i royo t'iweyo, iripo konyo woay malo.

⁵ Dhako kiripi rukirok paka jacwo, aka jacwo kiripi rukirok paka dhako, kwoŋbedo ŋata timo nger gino obedo amien ri Rwoth Were mewin.

⁶ K'inwaŋo od winyo, i yath moro je kosa i lowo, gi nyithindhe kosa i tonge, gi min munyo buto i wi nyithindhe kosa tonge, ikiripi kwanyo nyithindhe kodi min.

⁷ Adieri iripo weyo min wokadhi, t'ikwanyo nyithindhe mere, ŋey inwaŋ bero aka ibedi gi kwo mabor.

⁸ K'igeto ot, iripo timo acurcur ri wiy ot perin, ŋey ka dhano opodho wok i wi ot to tho, ikibedi gi banja ma oyo remo.

⁹ Ikiripi cwoyo kodhi man i ndelo vini perin, k'akameno kodhi m'icwoyo kodi ma vini lanyekere.

¹⁰ Ikiripi fur gi megikwe kodi punde munyo otwey jo kanyacel.

¹¹ Ikiripi ruko nangin m'otimi kodi yer rombo gi nanga mafoth kanyacel.

¹² Wiripo kwoyo lwodo i sonda aŋwen i gium mewin.

Cik ma mako tim ma weco

¹³ Ka jacwo onywomo dhako, aka rumacen ma nindo gi go, to bedo ma k'omaro go,

¹⁴ to osa go, kanyo waco ni, “Anywomo dhako me; to munyo anindo gine, akinwaŋo gima nyutho nike go oyido obedo nyako mambula.”

¹⁵ Ba dheno kodi min joripo kelo gima ridho nike dheno oyido obedo nyako mambula bongi jodongo ma tindi madwoŋ i waŋkac.

¹⁶ Ba dhako no lawaco ri jodongo ni, “Amiyo nyaran i nywomirok ri jacwo me, onyo go k'omaro dhako.

¹⁷ Onyo pama go osa nyaran gi wac ni, ‘Akinwaŋo nyarin munyo nyako mambula.’ To ee gima ridho nike nyaran oyido nyako mambula.” Aka ilayaro suka ruwaŋ jodongo ma tindi.

¹⁸ Jodongo ma tindi no jolamako jacwo no to jomiyo go gir'acula.

¹⁹ Go ripo culo feza kilo 1.2 (m'iripo miyo ba dhako) kwoŋbedo go onyeko nyingi nyako Jaisiraili mambula. Dhako no ladoŋ paka cege, aka kilayeyo go riemo woko dhako no ka go fodi kwo.

²⁰ To ka onwaŋere nike obedo adieri, dhako no oyido k'obedo dhako mambula,

²¹ ilakelo dhako no i dhiot ma ot pa bamere aka yac ma tindi pere jolacadho go gi telin cuka tho, kwoŋbedo go otimo giwickwot i Isiraili gi timo malaya i ot pa bamere. Ameno wilakwanyo woko reco me i dier win.

²² K'omaki jacwo nindo gi cipa nyawote, joje joripo tho, jacwo m'onindo gi dhako no kiri gi dhako no. Ameno wilakwanyo woko reco no i Isiraili.

²³ Ka nitie nyako, mambula, aka obedo ombego pa jacwo moro, to jacwo man romo gi go i tindi to nindo gi go,

²⁴ joje iripo kelo jo i waŋkac ma tindi t'icadho jo gi tele cuka jotho, kwoŋbedo nyako k'oywaki ri kony i tindi aka jacwo no onindo gi cipa jager pere. Ameno wilakwanyo woko reco no i dier win.

²⁵ To ka jacwo oromo gi nyako m'obedo ombego pa jacwo man to podho kwoŋe gi mbaka kam'othangere to nindo gine, jacwo kende m'onindo gine am'iripo neko.

²⁶ Wongoye gima witim ri nyako, go k'otimo banja ma cul mere bedo tho, kwoŋbedo banja no cale gi banja pa ŋata monjo jager pere to neko.

²⁷ Paka jacwo no onwaŋo go kam'othangere, nyalo bedo nike go oywaki ri kony, to ngoye ŋat'okony go.

²⁸ Ka jacwo oromo gi nyako mambula ma k'obedo ombego pa jacwo man, aka omako go to nindo gi go, t'inwaŋo jo,

²⁹ jacwo no ripo miyo kilo 0.6 ma feza ri ba nyako, aka labedo dhako pere. Kwoŋbedo jacwo no okwoto wi nyako no aka kilayeyo go riemo woko go ka go fodi kwo.

³⁰ Jacwo kiripi nywomo cipa bamere, kosa neno kinyoro pa bamere.