Daniel 4 - KITAWO MALEŊ

Lek pa Nebukadineza mar'ario

¹ Kere Nebukadineza, owaco ri ji je, nonin je, kodi dhodhok ma i piny ni: Weyi siem wobedi riwin gibe!

² Awinjo gi kisangala nyutho gir'aura, kodi ranyuth ma Were Ma Jamalo Swa otieko timo ran.

³ Ranyuth pere dongo nedi, nga gir'aura pere dimeni! Ker pere obedo ma cil gi cil, aka adhum pere obedo ma wok i luse tundo i luse.

⁴ An Nebukadineza oyido abedo i ot paran, i kwo mayom;

⁵ Aleko lek m'obwokan swa; aka paro kodi menyirok m'obino ran i kanindo ocandan.

⁶ Ameno amiyo or ni wokel cwo mariek je i Babilon ruwaŋan ŋey jowonyal waco ran dwoŋ ma lek no.

⁷ Kenyo jondijo ma jotimo gir'aura, jondijo ma neno gima latimere, Jokaldin, kodi jothieth jobino, awaco rijo lek no, to jok'onyalo tito ran dwoŋ mere.

⁸ I cowe mere Daniel, ma nyinge obedo Beltesazar, paka nyingi were paran, go m'opoŋ gi cuny pa Were maleŋ obino ruwaŋan, t'awaco rigo lek no:

⁹ Beltesazar, jadwoŋ pa cwo mariek, aŋeyo paka cuny pa Were maleŋ nitie kwoŋin, aka ongoye nyaliŋliŋ matek rin, wac ran dwoŋ ma lek me.

¹⁰ Me menyirok m'aneno munyo anitie i kanindo paran, aneno yath i cuny piny, aka oyido bor swa.

¹¹ Yath no odongo madwoŋ aka matek, ma withe mere ogeyo polo, aka oyido neno gi kisi gike ma piny.

¹² Yath no orwako fuc mere piny, boke mere oyido oloth to nyak olemo mathoth, aka omiyo cemo ri cwec je. Ogwaŋe madudi oyido joywomere i tipo mere, winyin ma koyo oyido jogeto od jo i jange mere, aka kisi cwec onwaŋ'iye cemo.

¹³ Paka amedere ŋiyo, i menyirok paran i kanindo aneno jakur maleŋ oloro piny wok i polo.

¹⁴ Jakur maleŋ okoko ni, “Toŋ woko yath, jange, kodi withe mere, kedhi olemo mere, aka ŋey ogwaŋe jowongoye i tiende, aka winyin jowongoye i jange.

¹⁵ To weyi kasik mere kodi fuc mere i lowo, wothok gi nyweny kodi ywel, i lum mayom ma samba.” “Weyi wodhieki gi thoyo ma polo, aka wolimi adec pere g'ogwaŋe madudi i lum ma piny.

¹⁶ Weyi cunye wolokere paka cuny ogwaŋ, ma oro abirio.

¹⁷ Me obedo or pa jakur maleŋ, ŋey jomakwo je jowoŋey nike Jamalo Swa dhumo ji je, aka nike go miyo dhum ri ŋata go oyero kiri jono ma josisiri.”

¹⁸ Me lek ma an, Nebukadineza aneno. Onyo Beltesazar, titi dwoŋ mere, paka cwo mariek je i ker paran jokinyal tito ran dwoŋ mere. To in inyalo, kwoŋbedo initie gi cuny pa Were Maleŋ kwoŋin.

Daniel tito lek mar'ario

¹⁹ Daniel m'oyido ilwoŋo ni Beltesazar, obedo gi dhier, aka paro pere ocando go swa ma sawa acel. Kere owaco rigo ni, “Beltesazar, ikir'iwey lek no kosa dwoŋ mere wocandi paro perin.” Beltesazar odwoko ni, “Jadwoŋ paran, weyi lek me wobedi ri jono ma jodakin kodi jokwor perin!

²⁰ Yath m'ineno, m'odongo madwoŋ aka matek, ŋey withe mere ogeyo polo aka oyido neno gi gike piny je,

²¹ ma boke mere oloth maŋon aka onyak olemo mathoth, m'oyido miyo cemo ri cwec je, aka ogwaŋe joywomere i tipo mere to winyin jogeto i jange.”

²² Meno in, Awi Kere! Itieko dongo madwoŋ aka matek. Dwoŋ perin omedere aka tundo i polo, aka dhum perin otundo i gike piny.

²³ Paka kere oneno jakur maleŋ oloro piny wok i polo ka waco ama: Toŋ piny yath aka nyek woko, to weyi kasik mere kodi fuc mere i lowo, wotwey gi nyweny kodi ywel, i lum ma samba; aka weyi wodhiekere gi thoyo ma polo, adec pere labedo g'ogwaŋe madudi ma oro abirio.

²⁴ Me dwoŋ mere, Awi kere, aka me or pa Jamalo Swa m'otieko bino kwoŋ rwoth paran kere.

²⁵ Ilakwanyin woko i dier ji, aka ilakwo i dier ogwaŋe madudi. Ilamiyin camo lum paka megikwe, iladhiekere gi thoyo ma polo ma oro abirio cuka inoŋey nike Jamalo Swa dhumo ker pa ji aka nike go miyo dhum ri ŋata go yero.

²⁶ Paka omiy or nike owey kasik yath kodi fuc mere, ker perin lakiyindira wok i hongo ma inoŋey nike Polo dhumo.

²⁷ Riameno, Awi kere, me rieko m'amiyin, aka yere gine. Pusere reco perin, gi timo gim'otire, weyi komo perin aka inyuthi jocandi wor, ŋey bero perin woyindira.

²⁸ Gime je otimere ri Kere Nebukadineza.

²⁹ Rumacen ma gike ma dwe mar'apar g'ario go oyido wotho i wi kisul ot ma muluwir ma Babilon,

³⁰ aka owaco ni, “Me ki Babilon madwoŋ, m'atieko geto paka ot ma ker gi meni paran kodi ri dwoŋ ma dhum paran!”

³¹ Kucel munyo wac no fodi k'opodho wok i dhok kere, dwondi mogo owok i polo ka waco ni, “Awi Kere Nebukadineza, oluwi kwoŋin ni, otiek mayin ker!

³² Ilakwanyin woko wok i dier ji aka ilabedo g'ogwaŋe madudi. Ilamiyin camo lum paka megikwe ma oro abirio cuka inoŋey nike Jamalo swa dhumo ker pa ji aka nike go miyo dhum ri ŋata go yero.”

³³ Gi piyo no won wac no otundo i kare kwoŋ Nebukadineza. Okwany go woko i dier ji, ocamo lum paka megikwe, delkwoŋe odhiekere gi thoyo ma polo, cuka yer kwoŋe odongo paka yer ango aka lwete olokere lwet winyo.

Nebukadineza pako Were

³⁴ Munyo oro abirio no orumo, An Nebukadineza, atiŋo waŋan i polo, aka paro paran odwoko bongan. Apako Jamalo Swa, apako t'amiyo go dwoŋ go makwo cil gi cil; kole dhum pere obedo dhum ma cil gi cil, aka ker pere yindira wok i luse tundo i luse.

³⁵ Go neno ji ma i piny paka gim'ongoye, go timo gim'omito gi Lwak ma i polo kodi ji ma i piny. Ongoye ŋata nyalo juko cinge, kosa penjo go ni, “Itimo aŋo?”

³⁶ I sawa no paro paran odwoko bongan; aka dhum kodi wor odwoko ran ri dwoŋ ma ker paran. Jomic rieko paran kodi jodhum paran jorangan, odwokan dhumo ker paran, aka dwoŋ paran omedere.

³⁷ Onyo an, Nebukadineza, apako aka atiŋo malo Kere ma i polo, Kole tim pere obedo adieri, yo pere obedo tiro, aka jono ma jowotho i noro, go nyalo dwoko jo piny.