Daniel 3 - KITAWO MALEŊ

Cal ma zahabu

¹ Kere Nebukadineza otimo cal ma zahabu ma mita piero adek i boro kodi mita adek i laco; go oketho kam'obipere ma Dura i Babilon.

² Kere Nebukadineza ooro wocok, jodhum, jogavana, jomic rieko, jothum banja, jopido, jokan, kodi jotel je mar'adec je bino i kalima ma cal ma Kere Nebukadineza oyido otimo.

³ Ameno jodhum, jomic rieko, jothum banja, jopido, jokan, kodi jotel mar'adec je jocokere i kalima ma cal ma Kere Nebukadineza oyido otimo.

⁴ Kenyo mogo ogoyo koko malo ni, “Kere miyo or ri ji je, nonin je, kodi dhodhok je,

⁵ nike kisi ka wiwinjo dwondi tungi ogwaŋ, milowe, dingidi, dongo, tongol, bul kodi nger gi wer je, wiripo podho piny lamo cal ma zahabu ma Nebukadineza otimo.

⁶ Ŋata kilapodho piny lamo ilabolo go i mac m'okur gi sawa no won.”

⁷ Riameno, tekin ji je jowinjo dwondi tungi ogwaŋ, milowe, dingidi, dongo, tongol, bul, kodi nger gi wer je, ji je, nonin je, dhodhok je, jopodho piny lamo cal ma zahabu ma Kere Nebukadineza oyido otimo.

Isegeya merin pa Daniel adek ro cay

⁸ Obedo i sawa paka meno ma Jokaldin mogo jowok kisegeya Joyuda.

⁹ Jowaco ri Kere Nebukadineza ni, “Awi Kere, yindira cil gi cil!

¹⁰ In, Awi Kere, itieko miyo or nike kisi dhano m'owinji dwondi tungi ogwaŋ, milowe, dingidi, dongo, tongol, bul kodi nger gi wer je, ripo podho piny to lamo cal ma zahabu;

¹¹ aka ŋata kilapodho piny lamo ilabolo go i mac m'okur.

¹² To nitie Joyuda m'iketho jo i tel i Babilon: Sadirak, Misaki, kodi Abedinego. Jo jokiluwi or perin, Awi Kere. Jokilam werin perin kosa cal ma zahabu m'itimo.”

¹³ Kenyo Nebukadineza i nge omiyo or nike wokel Sadirak, Misaki, kodi Abedinego; ameno okeli cwo no ruwaŋ kere.

¹⁴ Nebukadineza openjo jo ni, “Obedo adieri, Sadirak, Misaki, kodi Abedinego, nike wikilam werin paran kosa cal ma zahabu m'atimo?

¹⁵ Onyo ka wiyikere ka wiwinjo dwondi tungi ogwaŋ, milowe, dingidi, dongo, tongol, bul, kodi nger gi wer je, podho piny lamo cal m'atimo; meno ber. To ka wikilamo ilabolo win i mac m'okur gi sawa no won; aka were mene no ma labotho win wok i cingan?”

¹⁶ Sadirak, Misaki, kodi Abedinego jodwoko kere ni, “Awi Nebukadineza, wakilabedo gi kiosa kwoŋ wac me.

¹⁷ K'inen Were ma walamo nyalo botho wan kwoŋ mac m'okur kodi wok i cingin, awi kere, weyi go wobothi wan.

¹⁸ To makada nende go k'obothi wan, Awi kere, ŋey adieri nike wakilalamo werin perin kosa cal ma zahabu m'itimo.”

Ithumo banja ma tho ri merin pa Daniel adek

¹⁹ Nebukadineza omako nge swa gi Sadirak, Misaki, kodi Abedinego to coko nyime. Go omiyo or nike woloki mac m'okur dibirio loyo paka kisi ndelo.

²⁰ Nebukadineza omiyo or ri cwo matek loyo kwoŋ jolweny pere tweyo Sadirak, Misaki kodi Abedinego kodi bolo jo i mac m'okur.

²¹ Ameno otwey cwo me, munyo fodi joruko law pajo, aka obol jo i mac m'okur.

²² Onyo kwoŋbedo kere oyido omiyo or nike woloki mac m'okur dibirio loyo paka kisi ndelo, lietho ma mac oneko woko cwo ma jotiŋo Sadirak, Misaki, kodi Abedinego.

²³ To cwo adek me, Sadirak, Misaki, kodi Abedinego jopodho m'otwey jo i mac m'okur.

²⁴ Kere Nebukadineza obedo gi dhier swa aka opor malo piyo. Go openjo jomic rieko pere ni, “K'obedo cwo adek ma watweyo to wabolo i mac?” Jodwoko ni, “Meno adieri Kere.”

²⁵ Nebukadineza odwoko ni, “To kole aneno cwo aŋwen ma jogonyere, jowotho i dier mac, aka jok'owaŋ. Mar'aŋwen mere cal wod werin.”

Igonyo cwo adek me aka imedo jo dwoŋ

²⁶ Nebukadineza ocore cegin dho dhok mac m'okur to lwoŋo: Sadirak, Misaki, kodi Abedinego, ŋecin pa Were ma Jamalo Swa, wok win, aka biye win ka! Ameno jowok i mac.

²⁷ Jodhum, jogavana, jomic rieko pa kere jocokere kanyacel aka joneno cwo me, ma mac k'onyalo waŋo jo, kosa yer pajo k'orewere, kosa law pajo k'owaŋ, aka kiri ŋwece mac oyido ongoye kwoŋ jo.

²⁸ Nebukadineza owaco ni, “Were pa Sadirak, Misaki kodi Abedinego wopak, m'ooro malaika pere botho ŋecin pere ma jogeno i go. Jokwero luwo or pa kere to jojwango delkwoŋ jo makiweno lamo were man je kwanyo woko Were pajo won.”

²⁹ “Riameno amiyo or: Ji mogo je, nono mogo je, kosa dhodhok m'oluwere kwoŋ Were pa Sadirak, Misaki, kodi Abedinego ilatoŋo mathindho thindho t'isika woko udi pajo; kole ongoye were manyalo botho i nger me.”

³⁰ Kenyo kere omedo Sadirak, Misaki, kodi Abedinego dwoŋ iy'adec ma Babilon.