Daniel 2 - KITAWO MALEŊ

Lek pa Nebukadineza

¹ I oro mar'ario ma dhum pa Nebukadineza, Nebukadineza oleko lek m'ocando cuny go to waro kwoŋe nindo.

² Kere owodho or wolwoŋi jomiliel, jondijo ma neno gima latimere, jothieth, kodi Jokaldin bino waco ri kere lek pere. Ameno jobino to jocungo ruwaŋ kere.

³ Kere owaco rijo ni, “Aleko lek ma cunyan oraman niaŋ kwoŋe.”

⁴ Jokaldin jowaco ri kere i Dhoaramayik ni, “Awi kere, yindira! Waci ri ŋecin perin lek, aka walanyutho dwoŋ mere.”

⁵ Kere odwoko Jokaldin ni, “Lek orwenyo ran. Ka wikiwaco ran lek no kodi dwoŋ mere, ilatoŋo win mathindho thindho, aka udi mewin lalokere gundin.

⁶ To ka wiwaco ran lek kodi dwoŋ mere, alamiyo win mic, kemba kodi wor madwoŋ. Riameno wac ran win lek kodi dwoŋ mere.”

⁷ Jodwoko madirio ni, “Weyi kutho kere wowaci ri ŋecin pere lek, aka nyaka walamiyo dwoŋ mere.”

⁸ Kere owaco ni, “Aŋeyo maber swa nike witemo nyeko sawa, kwoŋbedo wiŋeyo ni atieko ridho paro paran.

⁹ Ka wikiwaco ran lek no, nitie nyaka or acel riwin. Witieko yerok luwo wac twodo kodi banirok cuka hongo owire. Riameno wac ran win lek no, aka nyaka aŋey ni winyalo tito dwoŋ mere.”

¹⁰ Jokaldin jodwoko ruwaŋ kere ni, “Ongoye dhano i piny manyalo tuco gima kere mito! Adieri ongoye kere, makada nende dwoŋ kosa jameni m'otieko penjo jandijo ma timo gir'aura, kosa jondijo ma neno gima latimere, kosa jathieth nger gime.

¹¹ Kwac pa kere tek swa m'ongoye ŋata nyalo tuco kwanyo woko werin, ma jokibedi i dier ji.”

¹² Gime omiyo kere nge gi gero swa, aka omiyo or nike worey woko cwo mariek je i Babilon.

¹³ Munyo or owok nike woneki cwo mariek, orangi Daniel kodi wadi neko jo.

Were nyutho Daniel dwoŋ ma lek pa kere

¹⁴ Daniel odwoko Ariok jatel pa jonek pa kere m'oyido kadho neko cwo mariek i Babilon gi gwokirok kodi rieko.

¹⁵ Daniel openjo Ariok ni, “Raŋo kere omiyo or ma piyo ameno?” Ariok otito ri Daniel ginago.

¹⁶ Onyo Daniel okidho bongi kere to kwayo nike womiy go hongo mogo, ŋey wonyali tito ri kere dwoŋ ma lek pere.

¹⁷ Daniel odok peco to waco ri wadi, Hanania, Misael, kodi Azaria;

¹⁸ aka owaco rijo rango wor pa Were ma i polo kwoŋ nyaliŋliŋ me, ŋey Daniel kodi wadi kanyacel gi cwo ma joriek i Babilon jokiri joworere.

¹⁹ Kenyo nyaliŋliŋ no onyuthere ri Daniel i menyirok wor, aka Daniel opako Were ma i polo.

²⁰ Daniel odwoko ka waco ni: “Pak wobedi ri nyingi Were mar'adieri cil gi cil, kole rieko kodi meni obedo apere.

²¹ Go wiro hongo kodi ndir, kwanyo woko kerin aka ketho man, miyo rieko ri jomariek, kodi ŋeyo ri joma niaŋ.

²² Go nyutho nyaliŋliŋ kodi gim'opanere, go oŋeyo gima nitie i mudho, aka lero nitie gi go.

²³ Afoyin, aka apakin, Awi Were pa kwarere paran, kole itieko miyan rieko kodi meni, inyuthan gima wakwayin, itieko miyo wan ŋeyo gima kere mito.”

Daniel waco ri Kere dwoŋ ma lek aka tito

²⁴ Daniel okidho bongi Ariok, ma kere oyido oyero neko woko cwo mariek je i Babilon, aka owaco rigo ni, “Ikir'ineki cwo mariek ma Babilon, teran bongi kere, aka alatuco dwoŋ ma lek pere.”

²⁵ Ariok oredo piyo tero Daniel bongi kere aka owaco ri kere ni, “Atieko nwaŋo jacwo i dier jotwec ma jowok i Yuda manyalo tuco dwoŋ ma lek.”

²⁶ Kere odwoko ka penjo Daniel, m'oyido ilwoŋo ni Beltesazar ni, “Inyalo waco ran lek m'aleko kodi dwoŋ mere?”

²⁷ Daniel odwoko kere ka waco ni, “Ongoye jomariek, jondijo ma timo gir'aura, jondijo ma neno gima latimere kosa jothieth ma jonyalo waco ri kere gima kere penjo.

²⁸ To nitie Were ma i polo ma nyutho nyaliŋliŋ, aka go otieko nyutho Kere Nebukadineza gima latimere i hongo ma bino. Me a lek kodi menyirok m'ineno munyo inindo i kanindo perin:

²⁹ Paro obino rin, awi kere, munyo inindo i kanindo perin, ma gigipiny ma latimere i hongo ma bino, aka ŋata nyutho nyaliŋliŋ oyawo rin gima latimere.

³⁰ To paka ri an, nyaliŋliŋ me k'onyuthere ran kwoŋbedo anitie gi rieko loyo joman, to r'atoŋa ma miyo kere ŋeyo dwoŋ ma lek pere aka ŋey iniaŋ paro ma cunyin.”

³¹ “Aŋiyo, awi kere, aka neni, cal madwoŋ swa ocungo ruwaŋin. Cal me obedo ma ragaŋ swa, aka ma pilin swa ma neno mere bwoko jo.

³² Wic mere obedo ma zahabu macil, kore kodi cinge obedo ma feza, aka diere kodi bambe obedo ma ywel.

³³ Tiende obedo nyweny, olenge mere obedo nyweny m'oruwere gi lowo nyamasiga.

³⁴ Paka iŋiyo, tele mogo, ma k'omukere gi cingi dhano, ogoyo olenge ma cal no ma nyweny kodi nyamasiga to turo mathindho thindho.

³⁵ Kenyo nyweny, lowo nyamasiga, ywel, feza, kodi zahabu joŋinyere mathindho thindho to jolokere paka cuŋ i kisia ma hongo ma ceŋ. Koyo okudho jo woko ma k'oweyo bathi jo. To tele m'ogoyo cal no olokere got madwoŋ aka opoŋo piny gibe.”

³⁶ “Meno a lek; onyo walatuco dwoŋ mere ruwaŋ kere.

³⁷ In awi kere, ibedo kere pa kerin, ma Were ma i polo otieko miyo ker, meni, teko, kodi dwoŋ,

³⁸ go otieko ketho i cingin ji kama jonitie iye je, ogwaŋe madudi kodi winyin ma koyo. Go okethin dhumo je; in iŋat'ibedo wic ma zahabu no.

³⁹ Rumacen yuŋeyin laay ker man mathin loyo aperin, aka kucel ker mar'adek ma ywel, ama ladhumo piny gibe.

⁴⁰ Labedo ker mar'aŋwen, matek paka nyweny, paka nyweny ŋinyo aka ŋidho kisi gimoro, laŋinyo to ŋidho woko ker me je.

⁴¹ Olenge kodi lwete m'ineno obedo lowo nyamasiga kodi nyweny no, labedo ker m'otiakere, to teko ma nyweny mogo labed'iye, pak'ineno nyweny oruwere gi lowo nyamasiga.

⁴² Pak'ineno olenge kodi lwete oyido obedo nyweny kodi lowo nyamasiga, ameno apaka ker labedo, matek to bende manyap.

⁴³ Pak'ineno nyweny oruwere gi lowo nyamasiga, ameno apaka jolaruwere kanyacel i nywomirok, to jokilamakere kanyacel, paka nyweny kinyal makirok gi lowo nyamasiga.

⁴⁴ I hongo pa kerin no Were ma i polo laketho ker ma kilareyo, kosa k'owey ri ji man. Ker me labedo cil gi cil, aka laŋinyo woko kerin je to kelo jo i gike;

⁴⁵ pak'ineno tele ma k'omukere gi cingi dhano oŋinyo nyweny, ywel, lowo nyamasiga, feza, kodi zahabu. Were madwoŋ otieko miyo kere ŋeyo gima latimere i hongo ma bino. Lek no obedo ameno, aka dwoŋ mere otire.”

Kere miyo Daniel kemba

⁴⁶ Kere Nebukadineza ogore piny gi nyime, to lamo Daniel, aka omiyo or nike womiy Daniel mic kodi cowirok.

⁴⁷ Kere owaco ri Daniel ni, “Adieri Were perin obedo Were pa werin je aka nyutho nyaliŋliŋ, kole inyalo tuco nyaliŋliŋ me!”

⁴⁸ Kere omedo Daniel dwoŋ, omiyo go mic madongo, aka oketho go bedo jadhum ma Babilon kodi bedo jadwoŋ pa cwo ma joriek je i Babilon.

⁴⁹ Daniel oketho kwac pere ri kere, aka oyero Sadirak, Misaki, kodi Abedinego bedo i tel i Babilon. To Daniel odoŋ i waŋkac pa kere.