Daniel 11 - KITAWO MALEŊ

¹ Aka onyo paka ri an, Daniel, i oro marapena ma dhum pa Dario Jamedes, acungo ma ridho kodi thielo go.

Kerin ma Misir kodi Siria

² Aka onyo pama alawaco riwin adieri. Kerin adek man jolaay i Pasia. Kere mar'aŋwen labedo gi ŋaŋo loyo wadi, aka k'otieko lokere matek gi ŋaŋo pere, go lamiyo kisi dhano lweny gi ker ma Gris.

³ Kere ma jameni laay, aka ker pere labedo madwoŋ to timo paka go yenyo.

⁴ Aka ka go nyaka ay ker pere ilaturo woko, t'ipoko diŋwen yu koyo aŋwen ma polo, to ki ri nyikwaye, kosa cungo kwoŋ ker ma go odhumo; kole ilafudho woko ker pere to kadho ri joman ma jok'obedo nyikwaye.

⁵ Kere ma yupiny lalokere matek aka acel kwoŋ jomituka pere lalokere matek loyo go aka dhum pere labedo dhum madwoŋ.

⁶ Ka oro mogo okadho jolatimo can ma makirok kanyacel, aka nyar kere ma yupiny labino bongi kere ma yumalo ma timo siem; to go kodi nyithindho pere jok'ocir; t'ibino kijala jo, jokur pere, nyathi pere, kodi nyatoro m'othielo go.

⁷ I hongo no jange ma wok i fuc pere latwi i kabedo pere; go labino kwoŋ jolweny to donjo i cel pa Kere ma yumalo, aka go bino tic gi jo to kengila jo.

⁸ Aka werin pajo bende gi calin pajo m'oleny g'atewe pajo ma welo ma feza gi zahabu ma jonitie i katwec, go lakwanyo to tero Misir aka go lajuko ma oro mogo monjo kere ma yumalo.

⁹ Aka go bino kidho i ker pa kere ma yumalo, to bino dok i piny pere won.

¹⁰ Wote jolakitugila lweny to jocoko muma jolweny mathoth, jolakidho i thotho to joluwo, aka jobino kitugila lweny kendo tundo kiri i cel pere.

¹¹ Nyaka to kere ma yupiny, ka cunye otieko ŋedhere, lawok to lwenyo gi kere ma yumalo; aka go latiŋo malo muma jolweny madwoŋ, t'iketho jolweny no i cinge.

¹² Aka ka jolweny no otiek tiŋo okadhi gi jo, adundo pere latiŋere malo aka lamiyo cuny ji kweth podho, to go k'oloy.

¹³ Kole kere ma yumalo bino doko miyo dongo ri muma, madwoŋ loyo macon; aka ka gike otundo, go labino gi jolweny madwoŋ gi gigipiny kidhur.

¹⁴ I hongo no jokweth jolaay kwoŋ kere ma yupiny; aka wot jogwayo i dier ji perin won jolatiŋere malo ma ketho i kare awanya pajo; to jobino podho.

¹⁵ Kenyo kere ma yumalo labino to konjo woko rageŋ, to mako tindi madwoŋ m'otinda. Jolweny ma yupiny jok'ocir jo kodi ji mere m'oyer aka jok'obedi gi meni ma ciro.

¹⁶ To ŋati m'obin kwoŋe latimo paka go won mito, aka ongoye ŋata bino cungo ruwaŋe; aka lacungo i lowo maŋon, aka rerok mere makicutho labedo i cinge.

¹⁷ Go laketho paro pere ma bino gi meni ma ker pere je, go lakelo winjirok ma siem to timo jo. Go lamiyo go nyar mon ma reyo woko ker; to k'ocir kosa olim kwoŋe.

¹⁸ Aka rumacen go lawiro waŋe yuthengi nam, aka lakwanyo mathoth kwoŋ jo; to jamituka laketho i gike kwoto pere; adieri go ladwoko kwoto pere rigo.

¹⁹ Kenyo go lawiro waŋe yu cel ma piny pere won; to go lakitangatanga to podho, aka k'onwaŋ go.

²⁰ Go laay i kabedo pere to dhiro jadhum madwoŋ ma ker, aka i hongo manok, ilaturo go, kada k'obedi i nge kosa i lweny.

Kere marac ma Siria

²¹ I kabedo pere lawok dhano m'iŋisa m'oyido fodi k'oyim kwoŋe dwoŋ ma dhum ma ker; go labino nyaliŋliŋ to mako ker, kareno inyero go.

²² Ilareyo woko kicutho jolweny ruwaŋe aka ilaturo jo kodi wod kere ma cikirok bende.

²³ Aka wok i hongo m'otimi gi go yerok ma makirok kanyacel, latimo tim ma twodo; aka lalokere matek gi nyaka ji manok.

²⁴ Go labino nyaliŋliŋ i kabedo ma lowo ma diwa mar'adec aka latimo gima bacere pere kodi kwarere pere jok'otimo, kedho i dier jo gim'onyaga gi lim. Go latimo can kwoŋ cel, to can pere labedo nyaka ma hongo.

²⁵ Go laguro meni pere kodi adundo pere kwoŋ kere ma yupiny gi jolweny madwoŋ; to kere ma yupiny lakitugila lweny gi jolweny mathoth swa kendo ma jomeni; to go k'ocir, rupiri ilacamo tiende gi piny.

²⁶ Kiri jono ma jocamo cemo pere ma dicwe, jolaturo go, aka ilayweyo woko jolweny pere, aka mathoth kwoŋ jo, jolapodho piny ma jotho.

²⁷ To paka ri kerin ario kwoŋ jo, adundin pajo lagondere kwoŋ gimarac; jolaluwo twodo i meza acel, to jok'oloy; rupiri gike fodi ripo timere i hongo m'oyik.

²⁸ Aka go lagik i piny pere won gi lim madwoŋ, t'adundo pere lajengere kwoŋ cikirok maleŋ. Go latimo mito pere, to gik i piny pere won.

²⁹ I hongo m'oyik, go lagik to bino yupiny; to k'obedi i hongo me paka cango obedo con.

³⁰ Mele ma Kitim jolabino kwoŋe, to bedo gi lworo to tiŋo cinge malo, to gik ma nge omako to raŋo gir'atima kwoŋ cikirok ma leŋo. Go lagik to ketho kinen kwoŋ jono ma jojwango cikirok ma leŋo.

³¹ Jolweny ma wok bonge jolamenyere to jokoco Ot pa Were kodi cel, to jokwanyo woko cowirok awaŋa ma noknok. Jolajengo gimienirok ma kelo kidamba.

³² Go ladwoŋo gi nyero jono ma joturo cikirok; to ji ma joŋeyo Were pajo, jolacungo matek to jonwaŋo gir'atima.

³³ Aka jono ma joriek ma jonitie i dier ji jolamiyo niaŋ ri ji mathoth, kada jolatho g'abor kodi mac m'odheth, gi twec kodi kinyaga, ma hongo mogo.

³⁴ Ka jotangatanga, ibino konyo jo nyaka mathi. Aka ji mathoth jolariwere gi jo gi rendirok,

³⁵ aka manok kwoŋ jono ma joriek jolakitangatanga, ma loko jo m'olonyo gi cido reco pajo cuka tundo hongo ma gike, kole obedo ri hongo m'oyik.

³⁶ Kere latimo paka oyenyo; go latiŋere malo to lokere ŋatadwoŋ maloyo were mogo je, go laluwo gigipiny ma k'ago kwoŋ Were pa werin. Go lanyalo kisi gimoro cuka nge pere orum; kole gima go otieko ridho latimere.

³⁷ Go k'odew kwoŋ werin pa kwarere pere, kodi meno ma mon jomaro; go k'odew kwoŋ were mogo je, go labedo ŋatadwoŋ loyo je.

³⁸ Kwanyowoko go laworo were ma cel makiweno me gin, were ma kwarere pere oyido jokuya, laworo gi zahabu gi feza, gi telin ma welo kodi mic ma welo.

³⁹ Go latic kodi cel ma jotek loyo gi kony pa were ma woko; ŋati mogo m'oyerere gine, bino miyo go dwoŋ gi wor. Go bino loko jo jodhum pa jomathoth to poko lowo atana.

⁴⁰ I hongo ma gike, kere ma yupiny bino monjo go; to kere ma yumalo bino yombere kwoŋe pa asur, gi cawilin kodi cwo ma jogweyo punde, gi mele kweth; aka go bino kidho i piny to mako to luw'iye paka mikula pi.

⁴¹ Go ladonjo i piny maŋon. Jomathoth jolakitangatanga, to jome jobino kwale i cinge: Edom kodi Mowab kodi ji marapena ma Amon.

⁴² Go bino rieyo cinge kwoŋ piny, aka piny ma Misir k'obothi.

⁴³ Go lalokere jadhum ma od lim ma zahabu gi feza, kodi gigipiny je ma welo ma Misir; kodi Jolibia aka Joethopiya jolaluwo masembo pere.

⁴⁴ To radwok ma yuwok ceŋ kodi ma yumalo ladwoko go, aka go lawok woko gi keme madwoŋ matieko gi reyo woko kicutho jomathoth.

⁴⁵ Go bino jengo wemin pere ma cel pa kere i dier name kodi got maŋon ma leŋo; kucel go latundo gike pere, aka langoye ŋat'okony go.