Daniel 1 - KITAWO MALEŊ

Yac i kapido pa Nebukadineza

¹ I oro mar'adek ma dhum pa Yehoyakim kere ma Yuda, Nebukadineza kere ma Babilon obino to thoko Yerusalem mako.

² Rwoth omiyo Yehoyakim kere ma Yuda i cingi Nebukadineza, kanyacel gi gigipiny ma Ot pa Were. Nebukadineza otero jo i lowo ma Sinar, to ketho i kakan ma ot pa werin pere.

³ Kere Nebukadineza owodho or ri Asipenaz jatel ma muluwir pere kelo Joisiraili mogo ma jowok i peco pa kere kodi jodhum.

⁴ Yac ma jongoye gi ŋolo aka joŋon, ma jonitie gi rieko kweth, ŋeyo kodi niaŋ, jonyalo tiyo i muluwir pa kere; aka inyalo fonjo jo ndiko kodi dhodhok pa Jokaldin.

⁵ Kere oyero rijo pith ma kisi ndelo wok kwoŋ cemo ma kere won camo kodi vini ma go madho. Oyido iripo fonjo jo ma oro adek, aka rumacen wokel jo ruwaŋ kere.

⁶ Kwoŋ yac me obedo yac ma Yuda, Daniel, Hanania, Misael kodi Azaria jonono pa Yuda.

⁷ Jatel ma muluwir ocwoko rijo nyingi jo. Ri Daniel olwoŋo go Beltesazar, ri Hanania olwoŋo go Sadirak, ri Misael olwoŋo go Misaki, aka Azaria olwoŋo go Abedinego.

⁸ To Daniel obedo g'atoŋa i cunye ma kwero kocirok gi camo cemo kodi madho vini pa kere. Ameno okwayo jatel ma muluwir ŋey wokiri wokocere.

⁹ Were omiyo Daniel nwaŋo wor kodi wor ruwaŋ jatel ma muluwir.

¹⁰ Jatel ma muluwir owaco ri Daniel ni, “Alworo rwoth jadwoŋ paran kere, m'oyero cemo kodi math mewin. Ka go onen nike win wimok loyo yac man ma jobedo m'iworo mewin, ilaketho kwo paran i teko.”

¹¹ Daniel okwayo jakur m'oyido jatel ma muluwir oketho kuro Daniel, Hanania, Misael, kodi Azaria ni,

¹² “Mondo tem ŋecin perin ma ndelo apar. Weyi womiy wan fufa wacam kodi pi wamadhi.

¹³ Inyalo kipima cal mawan gi cal pa yac ma jocamo cemo pa kere, t'itiyo gi wan paka in won ineno.”

¹⁴ Go owinjo wac pajo me, aka otemo jo ma ndelo apar.

¹⁵ I gike ma ndelo apar, onwaŋere nike joneno maber aka oyido jocwe loyo yac man m'oyido jocamo cemo pa kere.

¹⁶ Ameno jakur omedere kwanyo woko adec ma cemo pajo kodi vini m'oyido joripo madho, aka omiyo jo fufa.

¹⁷ Were omiyo yac aŋwen me bedo gi ŋeyo, niaŋ ndiko je kodi rieko. Daniel oyido nitie gi niaŋ kwoŋ menyirok je kodi lek.

¹⁸ I gike ma oro adek ma kere oyido owaco nike wokel'iye jo, jatel ma muluwir okelo jo ruwaŋ kere Nebukadineza.

¹⁹ Kere oluwo gi jo, aka kwoŋ yac je ongoye ŋat'onwaŋ m'oyido pimere gi Daniel, Hanania, Misael, kodi Azaria. Riameno jotiyo ruwaŋ kere.

²⁰ Kwoŋ kisi gimoro ma rieko kodi niaŋ ma kere openjo jo, onwaŋere nike jo oyido joloyo dipar jomiliel kodi jondijo ma joneno gima latimere i ker pa kere je.

²¹ Daniel odoŋ kenyo kiri i oro marapena ma dhum pa Kere Siras.