Cakirok 6 - KITAWO MALEŊ

Kidakana pa ji

¹ Munyo ji oyido jomore i piny, jonywolo nyir

² aka cwec moro ma polo joneno ni nyir pa ji oyido joŋon, ameno jonywomo paka joyero.

³ Kenyo Rwoth owaco ni, “Akibino yeyo ji kwo cil gi cil, rupiri jobedo del, to wok pama jokilakwo ma kalo oro miya acel gi piero ario.”

⁴ I ndir no, kodi kiri rumacen, oyido nitie ji m'ogaŋere i piny m'oyido jobedo nyithindho ma cwec ma i polo jonywolo gi nyir pa ji. Oyido jomeni, aka joŋeyere.

⁵ Rwoth oneno ni kidakana pa ji oyido dwoŋ i piny, aka kiri paro ma cuny jo je omedere bedo marac.

⁶ Aka Rwoth owinjo gi rem ni oyido ocweyo ji to ketho jo i piny, aka oramo cunye.

⁷ Ameno Rwoth owaco ni, “Abino reyo woko ji m'acweyo wok i piny, kodi ogwaŋe gi winyin, rupiri arem ni acweyo jo.”

⁸ To Rwoth oyido winjo maber gi Nowa.

Nowa

⁹ Me kigana ma mako kwoŋ Nowa. Nowa oyido obedo jacwo m'otire, ongoye gi komo aka owotho iy'acel gi Were.

¹⁰ Go oyido nitie gi wote adek; Semu, Ham kodi Yafeth.

¹¹ To ji m'odoŋ je oyido joreco ruwaŋ Were, aka akaka oyido nitie kisi kamoro.

¹² Were oneno piny, aka neni, oyido opoŋ reco rupiri ji je oyido jonigi kwo mareco.

¹³ Aka Were owaco ri Nowa ni, “Atieko miyere reyo woko gima kwo je. Abino reyo woko jo kicutho rupiri piny opoŋ tim pajo mar'akaka.

¹⁴ Geti ye perin wok kwoŋ mbawo maber; keth'iye kisikin to ifuy'iye gi woko gi odok.

¹⁵ Boro mere wobedi mita 133 laco mere mita piero ario g'ario, aka ŋawirok mere wobedi mita apar g'adek.

¹⁶ Geti wi ye aka iwey hongo ma romo adec mita i dier wi ye gi kisi thenge; aka geti dier ot adek t'iketho dhiot i iye gi thenge.

¹⁷ Akidho dhiro mikula ma pi i piny to reyo woko kisi gima kwo. Kisi gimoro i piny bino tho,

¹⁸ t'abino timo cikirok kodin. Donji i ye gi dhako perin, wotin kodi mon pajo.

¹⁹ Rwaki kisi gima kwo jario i ye ŋey jowokwo; jowobedi ma jacwo gi madhako.

²⁰ Kisi nger winyo, kisi nger ogwaŋe, kisi nger gima mol i lowo, jario jodonji kodin ŋey ikuri jo makwo.

²¹ Bende ter kisi nger cemo riwin kodi jo.”

²² Nowa otimo paka Were omiyo go or.