Cakirok 23 - KITAWO MALEŊ

Sara tho, aka Abraham nyewo kayik

¹ Sara obedo ma oro 127.

² Go otho i Hebron, i piny Kanan, aka Abraham okidho to ywako go.

³ Abraham oay kama delkwoŋ cege oyido nitie iye, aka okidho bongi Johiti to waco rijo ni,

⁴ “An ajapath ma bedo i dier win, tana win an lowo moro, ŋey anyal yiko dhako paran.”

⁵ Johiti jodwoko Abraham ni,

⁶ “Winji wan jadwoŋ, waŋeyo nike ibedo jatel madwoŋ yik dhako perin i kaliel maŋon loyo ma wanitie gine. Ongoye kwoŋ wan ŋata nyalo cerin kaliel, kosa yiko jatho perin.”

⁷ Kenyo Abraham oay to kule piny ruwaŋ jo

⁸ aka owaco ni, “K'inen wiyeyan yiko dhako paran ka, mondo kway ran win Efron wod pa Zohar

⁹ wotana an ŋungu ma Makipela, manitie cegin gi kew ndelo pere. Weyi go wotana an i welo ma gikululu, ka ruwaŋ win, ŋey wobedi aparan paka kayik.”

¹⁰ Onyo Efron won oyido obedo i dier Johiti i karomo, aka odwoko Abraham munyo ji jowinjo ni,

¹¹ “Winji jadwoŋ, amiyin ndelo kiri gi ŋungu ma nitie iye; ruwaŋ ji paran won amiyin ŋey inyal yiko dhako perin.”

¹² Kenyo Abraham okule piny ruwaŋ Johiti

¹³ aka owaco ri Efron munyo kisi nyatoro je winjo ni, “Akwayin, mondo winjan ye; alanyewo ndelo gipi. Riameno jol cul paran, aka ayiki dhako paran kenyo.”

¹⁴ Efron odwoko Abraham ni,

¹⁵ “Jadwoŋ, adec lowo ma romo nyaka feza miya aŋwen bende ginaŋo i dier an kodin! Yik dhako perin i iye.”

¹⁶ Abraham oyere gi Efron, aka opima ri Efron feza m'oyido go otieko waco munyo kisi nyatoro je winjo kodi rapim ma jomitan oyido jo oro.

¹⁷ Ameno apaka ndelo pa Efron m'oyido nitie i Makipela, yuwok ceŋ ma Mamire, kodi ŋungu m'oyido nitie iye, kiri gi yen olokere

¹⁸ lim pa Abraham ruwaŋ Johiti, kodi ruwaŋ ji ma jokidho i waŋkac ma tindi je

¹⁹ Rumacen ma gime Abraham oyiko cege i ŋungu ma ndelo ma Makipela yuwok ceŋ ma Mamire i piny Kanan.

²⁰ Ameno ndelo m'oyido obedo apa Johiti, gi ŋungu m'oyido nitie iye olokere lim pa Abraham paka kayik.