Cakirok 17 - KITAWO MALEŊ

Thumirok paka ranyuth ma cikirok

¹ Munyo Abram jaoro piero abuŋwen g'abuŋwen, Rwoth omenyere rigo aka owaco rigo ni, “An Were Majameni je; winjan, aka noknok tim gi tiro.

² Abino timo cikirok paran i dier an kodin, t'amiyin nyikwayin kweth.”

³ Kenyo Abram okule piny gi nyime; aka Were owaco rigo ni,

⁴ “Neni, atimo cikirok me kodin: Acikin n'ibino bedo kwari nonin kweth.

⁵ Doko nyingin k'olwoŋ ni Abram, to ni Abraham rupiri atieko lokin ba nonin kweth.

⁶ Abino miyin nyikwayin kweth, aka megi jobino bedo kerin. Ibino bedo gi nyikwayin kweth aka jobino timo nonin.”

⁷ “Abino ketho cikirok paran i dier an kodin gi nyikwayin i luse ma yuwaŋe paka cikirok ma cil gi cil, bedo Were perin, aka Were pa nyikwayin.

⁸ Abino miyin gi nyikwayin lowo ma kama pama ibed'iye japath. Lowo je ma Kanan bino bedo apa nyikwayin cil gi cil; aka abino bedo Were pajo.”

⁹ “Paka ri in, ilakuro cikirok paran kodin, in kiri gi nyikwayin i luse ma yuwaŋe.

¹⁰ Me a cikirok paran ma in gi nyikwayin wiripo kuro; kisi jacwo ripo thumirok.

^11-12 Wok pama kadho yuwaŋe wiripo thumo kisi nyathi majayac ka ja ndelo aboro, kiri gi ŋecin m'onywol pecin mewin, kodi ŋecin m'onyew wok bongi jopath. Me bino bedo ranyuth ma cikirok i dier win kodan.

¹³ Kisi nyatoro ripo thumirok, aka me bino bedo ranyuth ma neno ni cikirok paran kodin obedo ma cil gi cil.

¹⁴ Jacwo moro je ma k'othumere k'okwanere paka acel kwoŋ ji paran, rupiri go k'okuro cikirok kodan.”

¹⁵ Aka Were owaco ri Abraham ni, “Paka ri Saray cegin, wok pama nyingi go obedo Sara.

¹⁶ Abino miyo go silwany, aka abino miyin wodin luwo i go. Abino miyo go silwany aka go bino bedo yok piny kweth; kerin jobino wok kwoŋ go.”

¹⁷ Kenyo Abraham okule piny gi nyime aka onyero to waco ni, “Jacwo bende nyalo limo nyathi munyo jaoro 100? Sara nyalo nywolo nyathi i oro piero abuŋwen?”

¹⁸ Aka Abraham owaco ri Were ni, “Raŋo ikiwey Isimayil wolunjan?”

¹⁹ To Were owaco ni, “Be, cegin Sara bino nywolo rin wodin, aka ibino cwoko nyinge ni Isaka. Abino timo cikirok paran gi go paka cikirok ma cil gi cil ri nyikwaye.

²⁰ Paka ri Isimayil, atieko winjo kwac perin; neni, abino miyo go silwany t'amiyo go nyithindho kweth gi nyikwaye kweth. Go bino bedo ba wot kere apar g'ario, aka alatimo piny madwoŋ wok i go.

²¹ T'abino timo cikirok paran gi Isaka, ma Sara lanywolo rin i hongo me i oro ma bino.”

²² Munyo Were otieko luwo gi Abraham, okadho.

²³ Kenyo Abraham okwanyo wode Isimayil, ŋecin ma cwo m'onywol i ot pere gi m'onyew gi pesa kodi cwo je ma ot pere aka othumo jo.

²⁴ Abraham oyido jaoro piero abuŋwen g'abuŋwen munyo othum go,

²⁵ aka Isimayil oyido jaoro apar g'adek.

²⁶ Joje jothumere i ndelo acel,

²⁷ kanyacel gi ŋecin ma ot pa Abraham.