Cakirok 11 - KITAWO MALEŊ

Ot acurcur ma Babilon

¹ Onyo ji ma piny gibe oyido jonitie gi dhodhok acel gi wac manok.

² Aka paka jotuk wok yuwok ceŋ, jonwaŋo kama k'obedo tendere i lowo ma Sinar aka jobedo kenyo.

³ Aka jowaco wegi ni, “Biye win wagoy matafal, aka wawaŋ jo matek.” Ameno jobedo gi matafal ma geto gi odok ma riwo kanyacel.

⁴ Aka jowaco wegi ni, “Weyi wageti tindi madwoŋ gi ot acurcur ma tundo i pondeponde, ŋey wayiki nyingi wan aka wakiri waywore i piny gibe.”

⁵ Aka Rwoth oloro piny to neno tindi madwoŋ kodi ot acurcur ma wot ji oyido jogeto.

⁶ Aka Rwoth owaco ni, “Neni, jobedo ji acel aka joluwo dhodhok acel kende; me nyaka cakirok ma gima jokidho timo. Jolacegin cako timo gima jomito je!

⁷ Weyi wakidhi piny aka wanywow dhodhok pajo ŋey jokiri jowoniaŋere.”

⁸ Ameno Rwoth okedho jo i piny gibe aka joweyo geto tindi madwoŋ.

⁹ Riameno olwoŋi tindi madwoŋ no ni Babel rupiri kenyo Rwoth onywowo dhodhok ma piny gibe; aka kenyo Rwoth okedho ji i piny gibe.

Nyikway Semu

¹⁰ Me nyikway Semu. Munyo Semu jaoro 100 onywol rigo wode Aripakisadi oro ario rumacen ma pi mikula;

¹¹ rumacen go okwo ma oro 500 aka olimo nyithindho man.

¹² Munyo Aripakisadi jaoro piero adek g'abic, onywol rigo wode Sela

¹³ rumacen go okwo ma oro 403 aka olimo nyithindho man.

¹⁴ Munyo Sela jaoro piero adek, onywol rigo wode Eber;

¹⁵ rumacen go okwo ma oro 403 aka olimo nyithindho man.

¹⁶ Munyo Eber jaoro piero adek g'aŋwen onywol rigo wode Peleg;

¹⁷ rumacen go okwo ma oro 430 aka olimo nyithindho man.

¹⁸ Munyo Peleg jaoro piero adek onywol rigo wode Reu;

¹⁹ rumacen go okwo ma oro 209 aka olimo nyithindho man.

²⁰ Munyo Reu jaoro piero adek g'ario, onywol rigo wode Serug;

²¹ rumacen go okwo ma oro 207 aka olimo nyithindho man.

²² Munyo Serug jaoro piero adek, onywol rigo wode Nahor;

²³ rumacen go okwo ma oro 200 aka olimo nyithindho man.

²⁴ Munyo Nahor jaoro piero ario g'abuŋwen onywol rigo wode Tera;

²⁵ rumacen go okwo ma oro 119 aka olimo nyithindho man.

²⁶ Munyo Tera jaoro piero abirio, onywol rigo Abram, Nahor, kodi Haran.

Nyikway Tera

²⁷ Onyo me nyikway Tera. Tera oyido ba Abram, Nahor, Haran; aka Haran oyido ba Loti.

²⁸ Haran open tho ri bamere Tera i piny pere ma nywolirok, i Ur pa Jokaldin.

²⁹ Aka Abram onywomo Saray, aka Nahor onywomo Mika, nyar Haran, m'oyido bende obedo ba Isaka.

³⁰ Saray oyido kinywol; aka oyido ongoye gi nyithindho.

³¹ Tera okwanyo wode Abram, kodi nyakware Loti wod pa Haran, gi Saray ciwode to kanyacel joweyo Ur pa Jokaldin aka jokidho i piny Kanan to jobedo kenyo.

³² Tera otho munyo jaoro 205.