Amos 7 - KITAWO MALEŊ

Menyirok ma bonyo

¹ Rwoth Were onyuthan menyirok. Aneno go cweyo tome bonyo munyo nyaka otiek ŋado ri kere lum, aka lum oyido doko lothi.

² I menyirok no aneno munyo bonyo jocamo woko kisi gima nyaboke pendi i lowo. Kenyo awaco ama: Awi Rwoth Were, cwaki ji perin, akwayin. Jokwo nedi? Jomoki aka joloc!

³ Rwoth owiro paro pere to waco ama: Gim'ineno k'otimere.

Menyirok ma mac

⁴ Me gima Rwoth Were onyuthan menyirok man. Aneno go lwoŋo gir'acula gi mac, aka osika woko lutho madwoŋ aka oyido camo woko lowo.

⁵ Kenyo awaco ama: Weyi Rwoth, akwayin! Ji perin jokwo nedi? Jomoki aka joloc!

⁶ Rwoth owiro paro pere doko, aka owaco ama: Me je k'otimere.

Menyirok ma kabiro

⁷ Rwoth onyuthan menyirok man. Aneno go ocungo i ŋeti kor ot m'ogeti gi kabiro, aka go oyido otiŋo kabiro i cinge.

⁸ Aka Rwoth openjan ni, “Amos, ineno aŋo?” Adwoko ni, “Aneno kabiro.” Kenyo Rwoth owaco ama: Neni, aoro kabiro me, ma nyutho ni ji paran Isiraili, jocale kor ot m'oban. Akibino wiro paro paran ma miyo jo gir'acula.

⁹ Abino reyo woko kabedo je, ma nyikway Isaka jolam'iye. Abino kisika woko Kabedo Maleŋ je i Isiraili. Abino kelo ker pa Yerobowam i gike.

Amos gi Amaziya

¹⁰ Kenyo Amaziya jacway ri Were i wi migam ma Bethel odhiro ri Yerobowam kere ma Isiraili wac ni, “Amos camo rin sereko i dier ji aka dhodhok pere bino reyo woko piny.”

¹¹ Kole Amos waco ama: “Yerobowam bino tho g'abor, aka ibino kwanyo woko Joisiraili wok i piny pajo, kidho bedo jowiloka.”

¹² Kenyo Amaziya owaco ri Amos ni, “A jatuci wac Were, kadhi, iŋwec i Yuda, aka icami mugat kenyo, aka ituci wac Were koro.

¹³ To doko ikir'ituci wac Were i Bethel, rupiri obedo Kabedo Maleŋ pa kere, aka ot ma lamo ma ker.”

¹⁴ Kenyo Amos odwoko Amaziya ni, “Akibedo jatuci wac Were ma tuco wac Were ma cul. Abedo jakwath dhok, aka akuro yen makuyu.

¹⁵ To Rwoth okwanyan bedo jakwath dhok to oran bino tuco wac Were ri ji pere Isiraili.”

¹⁶ Riameno pama winji wac pa Rwoth. “Iwaco ran ni akir'atuci wac Were kwoŋ Isiraili, aka akir'atiti kwoŋ Joisiraili.”

¹⁷ “Riameno Rwoth waco rin ni, ‘Dhako perin bino lokirok malaya i tindi madwoŋ, aka wotin gi nyikin jobino tho g'abor. Lowo perin ibino poko t'imiyo ji man, aka in won ibino tho i piny makoc, adieri ibino kwanyo woko Joisiraili wok i piny pajo bedo jowiloka.’ ”