Amos 6 - KITAWO MALEŊ

Rerok pa Isiraili

¹ Kidamba riwin ma wibedo i kwo mayom i Zayon, kodi jono ma joparo ni jonitie kama ber i Samaria. Win jotel madongo ma piny madwoŋ me Isiraili, win ma ji jobino bongi win rango kony.

² Kadhi winen tindi madwoŋ Kaline. Kosa kadhi winen tindi madwoŋ Hamath, to wiloro wineno Gath tindi madwoŋ ma Filistia. Oyido jober loyo win! Adec pajo oyido lac loyo mewin!

³ Wikwero yeyo ni ndelo ma teko bino, to gima witimo coro ndelo no cegin.

⁴ Kidamba riwin ma winindo i kanindin m'otimi gi lak liec, to wiriere i kitandin mewin, aka wicamo rombo gi dhok.

⁵ Wimito swa cwogo wer, paka Daudi oyido cwogo to wigoyo i tongol.

⁶ Wimadho vini iy'atewe, aka wioro mo maŋwe kur, to wikiywaki ri kisika pa Isiraili.

⁷ Riameno wiŋati wilabedo marapena bedo jowiloka, aka kalima mewin bino tundo i gike.

⁸ Rwoth Were pa lwak jolweny waco ama: Adaki pakirok pa Joisiraili, aka acayo kapondo pajo. Abino miyo tindi madwoŋ pajo gi kisi gima nitie iye ri jokwor.

⁹ K'inen nitie cwo apar ma jodoŋ i peco, jobino tho.

¹⁰ Aka wat pa jacwo m'otho, ŋata waŋo delkwoŋ go, bino tero delkwoŋ go woko ma ot. Wat no bino lwoŋo ŋata nitie i ot ni, “Nitie ŋatiman manitie kodin kenyo?” Dwondi nyatoro bino waco ni, “Be!” Aka wat no bino waco ni, “Liŋ! Wakiri watuci nyingi Rwoth.”

¹¹ Ka Rwoth omiy cik, udi madongo gi mathindho je bino ŋinyirok.

¹² Kayina bende joŋweco i wi telin? Nitie ŋata nyalo furo gi megikwe i nam? To kucel wiwiro tiro butwa, aka gim'otire yath makec.

¹³ Win ma wisiemere i tindi Lodebar, aka wiwaco ni, “Wamako Kenayim gi meni mawan won.”

¹⁴ Rwoth, Were pa lwak jolweny won waco ama: Ji ma Isiraili, akidho dhiro jolweny ma jobedo jowiloka mako piny mewin. Jobino diyo win cako i ger ma Hamath, tundo kiri i milelo Araba.