Amos 1 - KITAWO MALEŊ

¹ Me wac pa Amos jakwath rombo m'oyido wok i tindi Tekowa, ma go oneno ma mako kwoŋ Isiraili, i ndir ma dhum pa Uziya kere ma Yuda, kodi i ndir ma dhum pa wod Yowas, Yerobowam kere ma Isiraili oro ario mafodi musisi.

Meni pa Were ma miyo gir'acula

² Amos owaco ni, “Rwoth jero wi got Zayon aka dwonde mor i Yerusalem, lum pa jokwath rombo thwo woko, aka lum ma wi got Kamel oner.”

Reco pa Isiraili gi joger pere Siria

³ Me apaka Rwoth waco: Ji ma Damasiko jomedere timo reco kendo, aka ro gime abino miyo jo gir'acula adieri. Jotero ji ma Giliad gi gwayo.

⁴ Ameno abino dhiro mac i ot pa Hazael, aka abino reyo woko kapondo pa kere Benhadad.

⁵ Abino turo woko waŋkac ma tindi madwoŋ Damasiko, t'akwanyo woko ji ma jobedo i milelo Aven, kodi jadhum ma Betheden. Ibino tero ji ma Siria paka jotwec ma lweny i piny Kiri. Rwoth waco.

Filistia

⁶ Me apaka Rwoth waco: Ji ma Gaza jomedere timo reco kendo, aka ro gime akibino wiro gir'acula pajo, rupiri jotiŋo piny gibe to jotero jo bedo jowiloka to jomiyo Edom.

⁷ Ameno abino dhiro mac waŋo woko kor ot ma tindi madwoŋ Gaza, aka bino waŋo woko kapondo pajo.

⁸ Abino kwanyo woko jodhum ma tindin madongo Asdod gi Asikelon. Abino miyo tindi madwoŋ Ekiron gir'acula, aka Jofilistia je ma jodoŋ jobino tho. Rwoth waco.

Tire

⁹ Me apaka Rwoth waco: Ji ma Tire jomedere timo reco kendo, aka ro gime akibino wiro gir'acula pajo, rupiri jomiyo piny gibe ri Edom, to wiy gin wil gi cikirok ma wutmere.

¹⁰ Ameno abino dhiro mac i kor ot ma Tire, aka bino reyo woko kapondo pajo.

Edom

¹¹ Me apaka Rwoth waco: Ji ma Edom jomedere timo reco kendo, aka ro gime akibino wiro gir'acula pajo, rupiri joredho piny wade pajo Joisiraili gi toŋ, aka jok'onyutho jo wor. Nge pajo kidhumere aka jokiwey otho.

¹² Ameno abino dhiro mac kwoŋ tindi madwoŋ Teman, aka bino reyo kapondo pa Bozra.

Amon

¹³ Me apaka Rwoth waco: Joamon jomedere timo reco kendo, aka ro gime akibino wiro gir'acula pajo, rupiri munyo joyawo adec pajo, joreyo woko mon ma yac i lowo ma Giliad.

¹⁴ Ameno abino dhiro mac i kor ot ma tindi madwoŋ Raba, aka bino reyo kapondo pere. Kenyo bino bedo koko i ndelo ma lweny, lweny bino bedo malieth p'asur.

¹⁵ Kere pajo gi jodhum pere jobino bedo jowiloka. Rwoth waco.