Agecin 5 - KITAWO MALEŊ

Gwokirok kwoŋ timo cot

¹ Nyathi paran, winji odoco rieko paran, ciki ithin ri fonji paran.

² Kenyo nyaka ibino ŋeyo nger ma bedo gi kula maber, aka wac perin lanyutho ni inigi ŋeyo.

³ Dhok dhako ma jaweco thon mo kic, aka luwo pere foth loyo mo,

⁴ t'icowe mere, go kiwey rin gimoro, kwanyowoko aŋedha cuny gi litho.

⁵ Tiende tero jo i tho, royo ma go luwo tero jo i piny pa jom'otho.

⁶ Go kikur royo m'otire ma tero jo i kwo, to lera kicar, aka go kiniaŋ gima timere.

⁷ Riameno, winjan win, awi nyithindho paran, aka wiy win wokiri wowil gi gim'awaco.

⁸ Bedi bor swa gi nger dhako no, aka ikir'icore cegin gi dhiot pere.

⁹ K'inotim ameno, iweyo dwoŋ perin ri joman, aka ilatho i cingi jogero.

¹⁰ Ey, jokicar jolakwanyo ŋaŋo perin je, aka gim'ilimo m'owok i kwok perin labedo apa japath.

¹¹ Onyo i hongo ma gike ma kwo perin ilaywak gi litho, ka riŋo perin gi delkwoŋin nyekere woko,

¹² aka nyaka ibino waco ni, “Awi, raŋo akwero winjo fonji? Adundo paran ocayo tiro m'oyido imiyan!

¹³ Akiwinjo dwondi jofonji paran, aka ikiwinjo dwondi jomic rieko paran.

¹⁴ Onyo pama acegin rere woko i dier cokirok pa lwak.”

¹⁵ Miti dhako perin won kende, aka imiy mar perin rigo kende.

¹⁶ Nyithindho m'ilimo gi dhako man woko kelo litho.

¹⁷ Weyi nyithindho perin jowobedi aperin won kende, makiweno oro jo bende gi jokicar.

¹⁸ Weyi dhako perin wolimi silwany, aka fore gi dhako perin m'inywomo munyo fodi i soye,

¹⁹ maŋon paka apol, paka diel ma nema. Weyi mitirok pere woyeŋin i hongo je; i hongo je mer gi mar pere.

²⁰ Raŋo doko irweny wodan, gi dhako man, t'ipodho i kor dhako ma japath?

²¹ Rwoth neno kisi tim pa dhano, aka menyo kisi kama go kadh'iye.

²² Reco pa jokidakana obedo bwo rijo, aka imako jo i bwo mareco pajo.

²³ Jotho kwoŋbedo jokwero fonji, aka kwoŋbedo miŋo pajo dwoŋ, jorwenyo.