Agecin 4 - KITAWO MALEŊ

Kemba ma rieko

¹ Winji win, awi nyithindho, fonji pa bawin, aka ciki ithi win, ŋey winyal niaŋ.

² Kole amiyo win fonji maber, wikiri wijwangi fonji paran.

³ Munyo fodi abedo jayac gi baba, ma nyaka ay, aka kendan ruwaŋ mama,

⁴ baba ofonjan. Go oyido waco ni, “Poyi gim'afonjin, aka wiyin wokiri wowil gine. Kur or paran aka ibino kwo.

⁵ Wiyin wokiri wowil, aka ikir'iwire, kwoŋ gim'atieko waco. Lim rieko, aka lim ŋeyo.

⁶ Ikir'ijwangi rieko, bino kurin, mar go, bino kikwonga in.

⁷ Cakirok ma rieko obedo gime: Lim rieko, aka kwoŋ giman je m'inolim, lim niaŋ.

⁸ Ter rieko paka gimadwoŋ, aka latiŋin malo. Rieko lamiyin dwoŋ k'imako go matek.

⁹ Rieko laketho i wiyin ŋono, aka lakelo rin sangaria maŋon.”

Arom ma woth i yo m'otire

¹⁰ Winji, awi nyathi paran, aka iyey wac paran, ŋey inyal kiyindira.

¹¹ Atieko fonjin royo ma kwo; atieko nyuthin yo ma tiro.

¹² K'iwotho, ongoye gima lageŋin; aka k'iŋweco, ik'otangatanga.

¹³ Maki fonji paran matek; ikir'iwey wokadhi; kwonga go, rupiri obedo kwo perin.

¹⁴ Ikir'idonji i yo pa jokidakana, aka ikir'iwothi i yo pa joreco.

¹⁵ Weyere gine, ikir'ikidh'iye, wire yuthenge man t'ikadho.

¹⁶ Kole jokidakana jokinyal nindo cuka jotieko timo gimarac. Nindo kikwal jo cuka jomiy dhano litho.

¹⁷ Kole jocamo kidakana pa mugat, aka jomadho akaka pa vini.

¹⁸ To yo pa jom'otire obedo lero ma ŋamba, maliel maber tundo odieceŋ.

¹⁹ Royo pa jokidakana cal gi mudho madwoŋ; jokiŋey gima jocer i wiye.

²⁰ Awi nyathi paran, ciki ithin iwinji wac paran, winji gim'awaco.

²¹ Ikir'iwey jowongoye ruwaŋin, kuri jo iy'adundo perin.

²² Rupiri jobedo kwo ri jono ma jonwaŋo, aka cango delkwoŋ jo.

²³ Gwok adundo perin, kwoŋbedo obedo waŋ kwo.

²⁴ Ikir'ibanere i luwo perin, kethi gicen luwo marac.

²⁵ Weyi waŋin woŋiy tirtir, aka nyangil waŋin woŋiy maber.

²⁶ Woth tirtir, aka kisi gimoro je m'icano, lakadho maber.

²⁷ Ikir'iwire racuc kosa racam; kwany woko tiendin kwoŋ gimarac.