Agecin 21 - KITAWO MALEŊ

¹ Cuny kere cal pi ma mol i cingi Rwoth, go wiro kama go mito.

² Tim pa dhano je otire ruwaŋ go won, to Rwoth pima cuny jo.

³ Timo gim'otire gi tiro, sangala Rwoth loyo miyo cowirok.

⁴ Waŋtek gi cuny ma nor, obedo yo pa jokidakana, aka me reco.

⁵ Can pa jarieko kelo bedo gi mathoth, to kisi jakwakirok kibedi gi ma romo.

⁶ Limo lim gi lew jo ma twodo, obedo luya ma duny aka bwo ma tho.

⁷ Akaka pa jokidakana reyo woko jo, kwoŋbedo jokwero timo gim'otire.

⁸ Yo pa jabanja oban, to tim pa ŋat'olony otire.

⁹ Ber bedo i wi kisul ot, loyo ot manitie i iye dhako ma jakigeŋisa.

¹⁰ Cuny jokidakana wanya timo raco, joger pajo jokinwaŋ wor ruwaŋ jo.

¹¹ K'omiy jaminyom gir'acula, ŋata kiniaŋ je fonjere, k'ofonji ŋatariek, jomedo bedo mariek.

¹² Rwoth kaŋasa ot pa jokidakana, aka go bolo jo piny to josika.

¹³ K'iculo ithin ri ywak pa jacandi, in bende ilaywak aka ongoye ŋata lawinjin.

¹⁴ Miyo mic manyaliŋliŋ cowo nge, aka nyewirok amuŋa, waro woko keme.

¹⁵ K'itimo tiro, obedo kisangala ri joma timo gim'otire, to jotimi marac jodhier.

¹⁶ Ŋata weyo yo ma niaŋ, laluwo jom'otho.

¹⁷ Ŋat'omaro kwo ma malo kilabedo gi ma romo, aka ŋat'omaro vini gi cemo ma dibor kilaŋaŋo.

¹⁸ Jokidakana jocandere i kawaŋ joma timo gim'otire, aka ji ma buyeyo i kawaŋ ji ma jotimo adieri.

¹⁹ Ber bedo i thim, loyo bedo gi dhako ma jakigeŋisa aka jamijokere.

²⁰ Lim ma welo bedo i ot pa jomariek, to jamiŋo nyeko piyo.

²¹ Ŋata dwaro timo gim'otire gi wor, labedo gi kwo mabor kodi wor.

²² Jarieko acel omonjo tindi madwoŋ pa jolweny, aka oredho piny kapondo m'oyido jogeno.

²³ Kuro dhokin gi lewin, geŋin kwoŋ teko.

²⁴ Janoro, ma ja waŋtek, m'ilwoŋo ni jaminyom, timo gigipiny gi noro kodi gero.

²⁵ Awanya pa ŋata nyap kelo rigo tho, kwoŋbedo go kwero tic.

²⁶ Jokidakana jobedo ka jowanya ndelo gipi, to joma timo gim'otire jopoko ma jokigwondi.

²⁷ Cowirok pa jakidakana obedo amien, t'onyo kosa obedi nedi ka okeli g'atoŋa marac?

²⁸ Ŋata luwo gitwodo i kapido larere woko, to ŋata bedo moth luwo adieri i kapido.

²⁹ Jokidakana jocoko nyim jo, to ŋata timo gim'otire kutho kaŋasa yo pere.

³⁰ Ongoye rieko, ongoye niaŋ, kosa mic rieko, manyalo loyo Rwoth.

³¹ Inyalo yiko kayina ma kidho lweny, to Rwoth ama miyo loyo.