Agecin 20 - KITAWO MALEŊ

¹ Medho kelo minyom, aka math matek kelo dhaw. Ŋata medho rwenyo kibedi ŋatariek.

² Nge pa kere miyo ilworo go paka simbwor ma hola, ŋata miyo go nge won dere.

³ Obedo gi dwoŋ geŋo piem, to kisi jamiŋo kwakere dhaw.

⁴ Ŋata nyap kicwoy i ndir, ka hongo ma keco otundo, go ngoye gine.

⁵ Atoŋa ma paro pa dhano cal pi maluth, to ŋatariek nyalo wodho kamaler.

⁶ Ji kweth jowaco ni jotimo adieri, to ŋa manyalo nwaŋo ŋata genere?

⁷ Jono ma jotimo gim'otire jowotho iy'adieri, aka nyithindho ma joluwo jo jobedo josilwany.

⁸ Kere ma bedo i kom ma thumo banja, oŋeyo yeko raco je gi waŋe.

⁹ Ŋa manyalo waco ni, “Atieko lonyo cunyan, an alony kwoŋ reco?”

¹⁰ Rapim gi latir ma k'otire, je jobedo amien ruwaŋ Rwoth.

¹¹ Nyithindho bende joŋeyere gi tim pajo, obedi ni gima jotimo obedo adieri kosa otire.

¹² Rwoth am'ocweyo ithi jo ma winjo, gi waŋ jo ma neno.

¹³ Ikir'imar nindo swa, kosa ilalokere jacandi, yaw waŋin, aka ilabedo gi cemo mathoth.

¹⁴ Janyew gimoro geŋisa ni, “Rac, rac.” To go kadho munyo pakere.

¹⁵ Nitie zahabu gi thiwino kweth, to dhok jo ma luwo gim'oŋeyo obedo gima welo.

¹⁶ Maki nanga pa ŋata cungo ri banja pa jakicar, gi ri banja pa japath.

¹⁷ Cemo m'olim gi twodo mit ri dhano, to rumacen lacale dhok jo m'opoŋ kwoyo.

¹⁸ Can tundo i kare gi winjo mic rieko, aka turo lweny gi luwo can ma rieko.

¹⁹ Japokopoko wodho nyaliŋliŋ, riameno ikir'imakere gi jaluwirok kicar.

²⁰ K'ikwoŋo benin kosa yokin, tala perin latho i mudho m'oasere.

²¹ Lim m'olim i yoto i cakirok, kilabed'iye silwany i cowe.

²² Ikir'iwaci ni, “Alaculo raco.” Kur Rwoth, aka go lakonyin.

²³ Rapim ma k'otire obedo amien ri Rwoth, aka latir ma twodo kiber.

²⁴ Rwoth ama telo woth mawan, onyo walaniaŋ nedi yo mawan wegi?

²⁵ Obedo bwo ri dhano kwako ciko timo gi leŋo, to bwok rumacen matieko timo cikirok.

²⁶ Kere mariek yeko jokidakana, aka ringo kwoŋ jo paka lipangala.

²⁷ Cuny dhano obedo tala pa Rwoth, aka rango paro ma iye.

²⁸ Adieri gi tiro medo dhum pa kere, aka kom pere ma dhum cowere i gim'otire.

²⁹ Dwoŋ pa soye wok i meni pajo, to wor pa jom'otegino wok i lwar pajo.

³⁰ Goco ma kelo adhola lwoko woko raco, aka lonyo tim ma iye.