Agecin 17 - KITAWO MALEŊ

¹ Ber camo ŋinje cemo gi siem, loyo bedo gi kalima i ot m'opoŋ dhaw.

² Ŋeca ma tiyo gi rieko ladhumo nyathi ma timo giwickwot, aka lalimo gir'alunja paka acel kwoŋ jopeco.

³ Paka mac temo feza gi zahabu, apaka Rwoth temo cuny dhano.

⁴ Jatim gimarac winjo jakidakana, aka jatwodo winjo twodo.

⁵ Jono ma jonyoma jacandi joyeto Jacwec pajo, aka jono ma josangala ri teko jolalimo gir'acula.

⁶ Nyikway jo obedo dwoŋ pa jom'otegino, aka dwoŋ pa nyithindho obedo jonywol pajo.

⁷ Luwo maber kiripi gi jamiŋo, aka twodo kiripi gi jadhum.

⁸ Cami nyew cale tele ma miliel ruwaŋ jono ma jomiyo, kwoŋbedo kisi kama jowir'iye jotimo maber.

⁹ Ŋata cwako gimarac kelo mar, to ŋata mena gimarac neko mere.

¹⁰ Apuse donjo ri ŋata niaŋ, loyo goco dimiya ri jamiŋo.

¹¹ Jomarac jorango nyaka gwenyirok, t'iladhiro jamikwenda mager rijo.

¹² Ber romo gi arara madhako m'okwal nyithindhe, loyo monjo jamiŋo ma timo gimiŋo.

¹³ Raco kilangoye i ot, pa ŋata culo raco ri bero.

¹⁴ Cako dhaw cal gi pi ma mol, riameno juki mafodi k'ocako.

¹⁵ Ŋata thielo jokidakana gi ŋata thumo banja ri ŋat'otire, je jobedo amien ruwaŋ Rwoth.

¹⁶ Aŋo m'omiy jomamiŋ culo pesa, ma nyewo rieko ma to jongoye gi nyaŋith?

¹⁷ Mere bedo gi mar hongo je, aka wade joripo karo teko.

¹⁸ Obedo gim'ongoye kony miyo cikirok, ma culo banja pa jager.

¹⁹ Ŋat'omaro reco omaro teko, aka ŋata ŋawo dhiot pere malo rango rerok.

²⁰ Ŋata japaro marac kilim bero, aka ŋata dhoke rep podho i teko.

²¹ Ŋata nywolo jamiŋo limo teko, aka janywol pa jamiŋo ongoye gi kisangala.

²² Cuny ma sangala obedo yath maber, to cuny ma rembo ŋinyo jo.

²³ Jokidakana jojolo cami nyew aponda, ma wiro yo ma tiro.

²⁴ Dhano ma niaŋ timo gi rieko, to jamiŋo ongoye g'atoŋa.

²⁵ Nyithindho ma jomiŋ jobedo rem ri bajo, gi keco ri yok jo.

²⁶ Miyo ŋat'ongoye gi banja cul k'otire, kosa cwado ŋat'otire kiber.

²⁷ Ŋata kano wac nigi ŋeyo, aka ŋata liŋ nigi niaŋ.

²⁸ Kiri jomamiŋ ma jobedo liŋ itero jo paka jomariek, ka joumo dhok gin, itero jo paka joma niaŋ.