2 Yohana 1 - KITAWO MALEŊ

¹ Balwa m'owok bongi Jadwoŋ. Ri dhakodwoŋ m'oyer kodi nyithindho pere m'amaro i adieri, aka ki an kendan, to ji je ma bende joŋeyo adieri jomaro win,

² ro adieri manitie i wan aka bino bedo gi wan ndir je.

³ Weyi Were Bawan kodi Yesu Kristo, Wod go, womiy wan nema, wor kodi siem iy'adieri kodi mar.

Adieri kodi mar

⁴ Asangala makicutho ro nwaŋo ni nyithindho perin megi jonitie i adieri, paka Bawan ooro wan won.

⁵ Am'omiyo, akwayin, dhakodwoŋ, ni wamare win. Me k'obedo or manyen ma nyaka andiko rin; t'obedo or ma watieko bedo gine wok con.

⁶ Aka me a mar; ni wawinji or pere. Paka witieko winjo wok con, go miyo win or bedo gi mar.

⁷ Jotwodo megi jotieko ywoyirok i piny gipi; ji ma jokiyey ni Yesu Kristo obino i del paka dhano. Ŋata pameno jatwodo, kendo a jakwor pa Kristo.

⁸ Am'omiyo, kure win, ŋey gima witieko tiyo rigo wokiri wobudhi win, to wilimi kemba mewin m'opoŋ.

⁹ Ŋata kibedi i fonji pa Kristo, to medere i giman ayino, meno ongoye gi Were. Ŋata doŋ i fonji, meno nitie gi Bawan kodi Wode.

¹⁰ Am'omiyo, ka moro bino bongi win, aka kikel fonji me, wikiri wijoli go peco mewin; odoko wikiri wimothi go kada ni: “Siem wobedi kodin.”

¹¹ Ato ŋata jolo go gi moth meno riwere gine i tim pere mareco.

Wac macowe

¹² Onwaŋo anitie gi wac madit riwin, to kiber awaci riwin i papila kodi vino; kucel, ageno liewo win to waluwo awaŋ g'awaŋ, aka nyaka wabino bedo gi kisangala m'opoŋ.

¹³ Nyithindho pa Nyamerin m'ilith gine jodhiro rin moth pajo.