2 Timothe 3 - KITAWO MALEŊ

Ndelo ma Rumacen

¹ To ŋey gime: Teko bino bedo madit i ndelo ma rumacen.

² Ato ji jobino bedo jogwondo, joma wor i pesa, jokwoto, joyumirok, joyet, joma kiwinji jonywol pajo, joma kifoy gimoro, joma kileŋ.

³ Jobino bedo joma jongoye gi wor, joma jongoye gi cwaki, jowaci nyingi wadi gin, joma wany kendo mager, jobino dak gimaber.

⁴ Jobino bedo jokwedirok, joma kidew gimoro, joma kwot gi pakirok, jobino maro kisangala ma piny loyo Were.

⁵ Jobino moko kwoŋ gima wiyewiye i yeyo Were, to jokwero meni mere. Gwokere kwoŋ joma pameno.

⁶ Jomegi kwoŋ jo jodonjo i udi to jodiyo mon ma miŋmiŋ, ma jopoŋ gi reco aka awanya ma nger je ywayo jo.

⁷ Mon ma ndir je jotemo fonjirok to jokinyal ŋeyo adieri,

⁸ paka Janes kodi Jambure gin jopiemo gi Musa, ameno jono bende jopiemo kodi adieri. Jobedo ji ma paro pajo kitiy, aka yeyo odhiero jo.

⁹ To jok'okadhi bor, rupiri dhano je bino neno miŋo pajo, paka joneno apa cwo ario no.

Fonji macowe

¹⁰ T'itieko kikaŋasa fonji paran, kula paran, kodi atoŋa paran ma kwo. Itieko kikaŋasa yeyo paran, diyo cuny paran, mar paran, ciro paran,

¹¹ lweny pa ji kodan kodi candirok paran. Iŋeyo gigipiny me je m'otimere ran i Antiok, Ikoniam kodi Listira. Je jobedo lweny mager m'aciro to Rwoth bothan kwoŋ je no.

¹² Iy'adieri dhano je ma mito bedo gi kwo i Kristo Yesu, ji bino lwenyo gine.

¹³ Aka ji mareco kodi ma jor'aporapora jobino medirok gi reco, munyo jowondo jowoti gin kareno iwondo jo bende.

¹⁴ To in, medere iy'adieri m'ofonjin aka iyeyo m'icwiny'iye. Kole iŋeyo joma jofonjin adieri no,

¹⁵ gi paka wok i thino oyido iŋeyo Ndiko Maleŋ, manyalo miyin rieko ma limo both kwoŋ yeyo Yesu Kristo.

¹⁶ Kole ndiko je Were am'omiyo meni, aka konyo swa ma fonjo adieri, kipusa komo, tiro podho, gi fonjo bedo gi kwo m'otire.

¹⁷ Ŋey nyaka dhano ma tiyo ri Were wobedi ŋat'ocowere maber, ma nigi gigipiny ma timo tic mabeyo ma nger je.