2 Timothe 1 - KITAWO MALEŊ

¹ Balwa m'owok bongi Paulo, jamoor pa Kristo Yesu i mito pa Were, m'oor tito kwo m'ocik ma wanigine i Kristo Yesu.

² Ri Timothe wodan m'amaro. Weyi Were Bawan kodi Kristo Yesu Rwodhiwan womiyin nema, gi wor, kodi siem.

Foyo gi miyo miseni

³ Afoyo Were m'atiyo rigo gi paro ma cunyan m'olony, paka kwarere paran jotimo. Apoyin noknok i kwayo paran, wor g'odieceŋ.

⁴ K'apoyo pigi waŋin, amito nenin swa, ŋey kisangala wopoŋ i cunyan.

⁵ Apoyo yeyo perin m'ocwiny, kiti yeyo ma adhenin Loy kodi yokin Yunisi oyido jonigine, aka aridho nike ibende inigine.

⁶ Ro wac no, apoyin inyal ketho i tim mic ma Were omiyin munyo aketho cingan kwoŋin.

⁷ Kole Were k'omiyo wan Cuny ma lworo, t'omiyo wan Cuny ma bedo gi meni, gi mar, kodi ma dhumo kwo mawan maber.

⁸ Am'omiyo, ikir'ibedi giwickwot ma luwo kwoŋ Rwoth, kosa wickwot kwoŋan, jatwec pere. Kucel bedi kodan i candirok ri Wac Manyen Maber paka Were miyin meni ma ciro,

⁹ go m'obotho wan to lwoŋo wan bedo ji pere won, ki ro gima watieko timo, to r'atoŋa pere won kodi nema. Go omiyo wan nema no i Kristo Yesu mafodi ndir k'ocakere,

¹⁰ aka pama onyo onyuthi wan i menyirok pa Jaboth mawan, Kristo Yesu, m'otieko reyo woko meni pa tho, to kelo kwo gi kiyindira makirum i lero munyo oro Wac Manyen Maber.

¹¹ Were ooran tito Wac Manyen Maber no paka jamoor kodi jafonji;

¹² meno am'omiyo acandere ama. To kad'ameno wiyan kikwoti, rupiri aŋeyo ŋat'ayeyo kwoŋe, aka aridho ni go nyalo kuro gim'atieko miyo go cuka Ndelo no tundo.

¹³ Cwire kwoŋ wac m'itieko winjo bongan, paka fonji m'otire aluwa, aka bedi i yeyo kodi i mar i Kristo Yesu.

¹⁴ Kuri gigipiny mabeyo m'oketh i cingin gi kony pa Cuny Maleŋ manitie i wan.

¹⁵ Iŋeyo nike dhano je iy'adec ma Asia ojwangan, kiri Figelo kodi Hamogene.

¹⁶ Weyi Rwoth wonyuthi peco pa Onesiforo wor, rupiri go omiyan kisangala ndir madit aka wiye k'okwoti nike anitie i twec.

¹⁷ Odoko tekin go tundo i Roma, orangan tektek cuka onwaŋan.

¹⁸ Weyi Rwoth womiy go silwany ma limo wor bongi Rwoth i Ndelo no! Kole iŋeyo maber gima go otimo ran munyo anitie i Efeso.