2 Samwiri 4 - KITAWO MALEŊ

Jotel pa jolweny ario joneko Isiboseth

¹ Munyo Isiboseth wod pa Saulo owinjo ni oneki Abuner i Hebron, obedo gi lworo, aka Joisiraili je meni oloyo jo.

² Isiboseth oyido nitie gi jotel pa jokinyaga ario; nyingi jo Bana gi Rekab wot jacwo m'ilwoŋo ni Rimon janono Benyamin ma wok i tindi Beroth. (Beroth obedo adec ma Benyamin.

³ Ji m'oyido jobedo kenyo con joringo i tindi Gitayim, kama jobed'iye jopath kiri konon.)

⁴ Yonathan, wod pa Saulo oyido nitie gi wode ma tiende oŋol. Oyido ilwoŋo go ni Mefiboseth. Mefiboseth oyido jaoro abic ndir ma wac otundo i Yezirel ni Saulo gi Yonathan jotho. Aka munyo japidi pere otiŋo go to ŋweco gi gine, japidi pere oyido kwakere aka oredho go piny to tiende ŋol.

⁵ Ndelo acel, Rekab gi Bana jokidho peco pa Isiboseth cegin sawa aucel, aka jonwaŋo go ywomere m'odieceŋ.

⁶ Dhako m'oyido jakur ma dhiot oyido ool swa ro piedho ŋano, aka oyido nindo. Ameno Rekab gi Bana jokwale to jodonjo i ot.

⁷ Munyo jodonjo i ot, jokidho i kisika pa Isiboseth kama nindo oyido okwal'iye go aka joneko go. Joŋado ŋuti Isiboseth aka jokadho gine. Joluwo i milelo ma Yordan.

⁸ Munyo jotundo Hebron, jomiyo Daudi wic Isiboseth aka jowaco rigo ni, “Wic Isiboseth wod pa jakwor perin Saulo m'otemo nekin ee. Konon me Rwoth oyeyin jadwoŋ kere culo kwor kwoŋ Saulo gi nyithindho pere.”

⁹ Daudi odwoko jo ni, “Akwoŋere i nyingi Rwoth makwo, m'obothan i teko je!

¹⁰ Jamikwenda m'obino bongan Ziklag to waco ran kwoŋ tho pa Saulo oyido oparo ni okelo ran wac maber. To amako go aka aneko go. Meno a kemba m'amiyo go ri wac pere maber.

¹¹ Onyo anomiy kemba madwoŋ nedi ri cwo ma jokidakana ma joneko ŋata bubanja m'oyido nindo i kitanda pere! Onyo pama alaculo kwoŋ win kwor ma neko go aka alareyo woko kwo mewin wok i piny.”

¹² Daudi omiyo cwo pere cik aka cwo pere joneko Rekab gi Bana to joŋado cingi gin gi tiendi gin aka joŋawo cegin gi kidiwa i Hebron. Jotero ŋuti Isiboseth to joyiko i kaliel pa Abuner i Hebron.