2 Samwiri 3 - KITAWO MALEŊ

¹ Lweny i dier ot pa Saulo gi ot pa Daudi omedere ma hongo malac; aka Daudi olokere matek kendo matek, to jokwor pere jolokere manyap kendo manyap.

Wot Daudi

² Me wot Daudi m'onywol rigo i Hebron i nywolirok pajo. Okayo pere oyido Amon ma min oyido obedo Ahinowam ma wok Yezirel,

³ mar'ario obedo Kiliab wod pa Abigayili ma wok Kamel, m'oyido ciliendi Abigayili, mar'adek obedo Absalom wod pa Maka nyar Talmay kere ma Gerihur.

⁴ Mar'aŋwen obedo Adoniya wod pa Hagith, mar'abic obedo Sefatiya wod pa Abital,

⁵ aka mar'aucel obedo Ithirim wod pa Egila.

Abuner riwere gi Daudi

⁶ Munyo lweny medere i dier ot pa Saulo gi ot pa Daudi, Abuner omedere lokirok ŋatadwoŋ i ot pa Saulo.

⁷ Ndelo acel, Isiboseth osegeya Abuner nindo gi Rizipa nyar Aya m'oyido cipa Saulo ma gi thenge.

⁸ Wac me omiyo Abuner lokirok mager aka owaco ni, “Iparo ni anyalo camo ri Saulo sereko? Iparo ni abedo ŋeca pa Yuda? Wok i ndelo marapena aworo benin Saulo, wutmin go, gi merin pere, aka atieko bothin kwoŋ Daudi kikengila in; kucel onyo konon inwaŋo kwoŋan raco ro dhako.

⁹ Were wonekan k'inen akicowo ri Daudi gima Rwoth ociko go;

¹⁰ kwanyo woko ker wok i ot pa Saulo, aka ketho dhum pa Daudi kwoŋ Isiraili gi Yuda gipi, wok Dan tundo Berseba.”

¹¹ Aka Isiboseth k'odwoko wac kendo rupiri oyido lworo Abuner.

¹² Abuner ooro jomikwenda moro bongi Daudi m'oyido nitie Hebron waco rigo ni, “Ŋa ma kidho dhumo piny me? Tim kodan cikirok, aka abino thielin loko Isiraili paka rom aperin.”

¹³ Daudi odwoko ni, “Meno ber. Alatimo kodin cikirok k'itimo gimoro acel. Iripo kelo Mikal nyar Saulo bongan k'ibino nenan.”

¹⁴ Aka Daudi odhiro ri Isiboseth wac ni, “Dwoki ran dhako paran Mikal rupiri anywomo go gi kwo pa Jofilistia miya acel.”

¹⁵ Ameno Isiboseth ooro cwo pere kwanyo Mikal kwoŋ cwore Paltiel wod pa Layis.

¹⁶ To cwore luwo go kiri i tindi Bahurim kanyo ywako go. To munyo Abuner owaco ri Paltiel ni wodoki peco pere, otimo ameno.

¹⁷ Abuner okidho bongi jotel ma Isiraili aka owaco rijo ni, “Wok con oyido wimito ni Daudi wobedi kere mewin.

¹⁸ Pama silwany mewin ee. Poyi win ni Rwoth otieko waco ni, ‘Alaoro ŋeca paran Daudi botho ji paran Isiraili wok i cingi Jofilistia kodi kwoŋ jokwor pajo man je.’ ”

¹⁹ Abuner oluwo bende gi jonono pa Benyamin aka okidho Hebron to waco ri Daudi gima jonono pa Benyamin gi Joisiraili joyere ni ber timo.

²⁰ Munyo Abuner obino bongi Daudi Hebron gi cwo piero ario, Daudi otimo rijo kalima.

²¹ Abuner owaco ri Daudi ni, “Weyi alaay t'akidho aka alaywayo Joisiraili je i thenge perin jadwoŋ paran kere; ŋey jowotimi cikirok kodin, aka idhumi kisi gima cunyin yenyo.” Ameno Daudi oyere gi Abuner aka osewila go to kadho i siem.

Yowab neko Abuner

²² Rumacen Yowab gi cwo pa Daudi man jowok kam'oyido jonyag'iye aka jodwoko gi gigipiny mathoth ma jonyaga. To Abuner oyido otieko eye kenyo bongi Daudi rupiri Daudi oyido otieko kisewila go, aka go oyido otieko kadho i siem.

²³ Munyo Yowab gi cwo pere jotundo, nyatoro moro owaco ri Yowab ni, “Abuner wod pa Ner nende obino ka bongi kere Daudi aka kere oweyo go to kadho i siem.”

²⁴ Ameno Yowab okidho bongi kere aka owaco rigo ni, “Itimo aŋo? Neni, Abuner obino bongin t'iweyo go kadhi i siem?

²⁵ Iŋeyo paka Abuner wod pa Ner obino nyaka wondin gi niaŋ kisi gim'itimo gi kam'initie iye.”

²⁶ Munyo Yowab oeye bongi Daudi, ooro jomikwenda bongi Abuner aka jonwaŋo go i waŋ pi ma Sira to jodwoko gi go. Daudi oyido k'oŋeyo kwoŋe.

²⁷ Munyo otundi gi Abuner Hebron, Yowab oywayo go gi thenge i waŋkac paŋini oyido mito luwo gine manyaliŋliŋ; aka kenyo ocwowo iye. Aka ameno Yowab oneko Abuner rupiri go oneko Asahel omin Yowab.

²⁸ Munyo Daudi owinjo wac me, owaco ni, “Rwoth oŋeyo paka an gi ji paran wangoye gi banja ro tho pa Abuner.

²⁹ Weyi gir'acula mere wopodhi kwoŋ Yowab gi peco pere. I kisi luse ji ma peco pere bino bedo jacwo moro manitie gi nyac kosa dhowo; kosa ma latimo tic pa mon, kosa m'ilaneko i lweny, kosa langoye gi cemo.”

³⁰ Ameno Yowab gi omin go Abisay joculo kwor kwoŋ Abuner ro neko omin jo Asahel i lweny i Gibeon.

Iyiko Abuner

³¹ Daudi omiyo Yowab gi cwo pere cik yeco woko nangin pajo, aka joruko kutiya to joywako Abuner; aka i liel, kere Daudi won am'owotho yuŋey del pa jatho.

³² Oyiki Abuner i Hebron; aka kere otiŋo dwonde malo to goyo ndur i kaliel pa Abuner aka ji je bende joywak.

³³ Daudi owero ajore me ri Abuner, “Raŋo Abuner itho pa jamiŋo?

³⁴ Cingin oyido k'otwey, aka tiendin oyido k'otwey itho paka ŋata jonek joneko.” Aka ji joywako Abuner kendo.

³⁵ I ndelo no gipi ji jotemo naŋo Daudi ni wocemi, to go kwero; aka okwoŋere ni, “Weyi Were wonekan k'acemo mafodi piny k'oyutho.”

³⁶ Ji jomako gime i cuny gin aka osiemo jo; adieri kisi gima kere Daudi otimo osiemo jo.

³⁷ Ji pa Daudi je kiri gi Joisiraili je joniaŋ ni Daudi oyido bubanja ro tho pa Abuner.

³⁸ Kere Daudi openjo cwo pere ni, “Wikipar ni konon jatel madwoŋ otho Isiraili?

³⁹ Makada nende abedo kere ma Were am'oyero, awinjo manyap konon. Wot dhakodwoŋ Zeruya me joasa bedo ran gi maker. Weyi Rwoth womiy jo gir'acula ma ripo gi kidakana pajo.”