2 Samwiri 2 - KITAWO MALEŊ

Iketho Daudi kere ma Yuda

¹ Munyo gigipiny no otieko timirok, Daudi openjo Rwoth ni, “Akidhi adhum acel kwoŋ tindin ma Yuda?” Rwoth odwoko ni, “Ey kadhi.” Daudi doko to penjo ni, “Mene?” To Rwoth dwoko ni, “Hebron.”

² Ameno Daudi okidho Hebron, kanyacel gi mon pere ario; Ahinowam ma wok Yezirel, kodi Abigayili, ciliendi Nabal ma wok Kamel.

³ Okadho bende gi cwo pere kodi pecin pajo to jogeto pecin i tindi Hebron.

⁴ Kenyo cwo ma Yuda jobino Hebron, aka jowiro Daudi gi mo bedo kere ma Yuda. Munyo Daudi owinjo ni ji ma Yabes i tindi Giliad joyiko delkwoŋ Saulo,

⁵ odhiro rijo cwo pere moro gi mikwenda ni, “Weyi Rwoth womiy win silwany ma nyutho wor ri kere mewin to wiyiko go.

⁶ Aka onyo weyi Rwoth bende wonyuthi win mar makirum g'adieri pere. An bende abino tero win maber ro gima witimo.

⁷ Bedi win jomeni aka jomiseni! Saulo kere mewin otho, aka ji ma Yuda jotieko wiran gi mo bedo kere pajo.”

Iketho Isiboseth kere ma Isiraili

⁸ Jamituka jolweny pa Saulo, Abuner wod pa Ner oyido oringo gi wod pa Saulo Isiboseth, aka otero go Mahanayim.

⁹ Kenyo Abuner oketho Isiboseth kere mar'adec ma Giliad, Aser, Yezirel, Efrayim, kodi Benyamin, gi Isiraili gipi.

¹⁰ Isiboseth oyido jaoro 40 munyo okethi go bedo kere ma Isiraili, aka odhumo ma oro ario. To Joyuda oyido joworo Daudi

¹¹ aka Daudi odhumo Hebron paka kere ma Yuda ma oro abirio g'adec.

Lweny i dier Isiraili gi Yuda

¹² Ndelo acel, Abuner gi jolweny pa Isiboseth jokadho wok Mahanayim kiri i tindi madwoŋ Gibeon.

¹³ Yowab, wod pa Zeruya, gi cwo pa Daudi man jonwaŋo jo jobedo i kidiwa, kama jobedo piny, kitipa acel i thenge acel, aka kitipa man i thenge ca.

¹⁴ Abuner owaco ri Yowab ni, “Weyi cwo mawan moro wok i kisi thenge jowoay malo jopiem lweny ruwaŋ wan.” Yowab odwoko ni, “Weyi jowoay.”

¹⁵ Ameno cwo apar g'ario wok i thenge pa Isiboseth wod pa Saulo, aka jonono pa Benyamin joay malo lweny gi cwo pa Daudi apar g'ario.

¹⁶ Kisi jacwo omako jakwor pere gi ŋute, aka orwako toŋ i ŋuti jakwor pere; aka joje piero ario g'aŋwen jopodho piny to jotho kanyacel. Aka kabedo no i Gibeon ilwoŋo ni, “Kisawe mar'abor.”

¹⁷ Ameno won lweny otur, aka cwo pa Daudi jokengila Abuner gi Joisiraili.

¹⁸ Wot dhako m'ilwoŋo ni Zeruya adek, Yowab, Abisay, gi Asahel m'oyido jodwir pa amudhe,

¹⁹ jocako riemo Abuner kanyo joringo tirtir gi go.

²⁰ Abuner oŋiyo cen aka openjo ni, “Meno in Asahel?” Asahel odwoko ni, “Obedo an.”

²¹ Abuner owaco ri Asahel ni, “Weyi rieman! Riemi acel kwoŋ cwo paran imaki aka inyaga gima nitie gine.” To Asahel omedere riemo go.

²² Abuner doko owaco ri Asahel ni, “Weyi rieman, raŋo imito anekin?”

²³ To Asahel k'oweyo riemo go. Ameno Abuner ocwowo iy Asahel gi loki toŋ pere to wok gi yuŋey go aka Asahel opodho piny kenyo to tho. Aka kisi ŋat'obino kama Asahel opodho iye to tho ocungo liŋ.

²⁴ To Yowab gi Abisay joriemo Abuner, aka munyo waŋceŋ podho jotundo i tendere ma Ama, manitie yuthenge ma wok ceŋ ma Giya i yo ma kidho i thim ma Gibeon.

²⁵ Cwo ma nono pa Benyamin jocokere thoko Abuner aka joyere kanyacel i wi tendere.

²⁶ Abuner okoko ri Yowab ka penjo ni, “Wanomedere nekirok gi toŋ cil gi cil? Ikineni ni cowe mere labedo gwayo? Oterin hongo aŋo ŋey inocer cwo perin riemo wan?”

²⁷ Yowab odwoko ni, “Akwoŋere rin i nyingi Were makwo ni ka bedi ikiluwo, adieri cwo paran di joriemo win tundo dikin odikin.”

²⁸ Ameno Yowab okudho gwara ma nyutho cwo pere ni jowey riemo Joisiraili; aka kenyo nyaka to lweny jukere.

²⁹ Abuner gi cwo pere jokadho wor no aka joluwo gi Araba, joŋado malawa Yordan, aka munyo jotieko woth yawere odikin gipi, jotundo Mahanayim.

³⁰ Munyo Yowab oweyere gi riemo Abuner gi cwo pere, ocoko cwo pere je aka onwaŋo ni apar g'abuŋwen oyido jongoye, kiri gi Asahel.

³¹ Cwo pa Daudi oyido joneko cwo pa Abuner jonono pa Benyamin 360.

³² Yowab gi cwo pere jotero delkwoŋ Asahel aka joyiko i kaliel pa bamere i Bethelehem. Kenyo Yowab gi cwo pere jowotho wor gipi aka piny ocot rijo munyo jotundo Hebron.