2 Samwiri 15 - KITAWO MALEŊ

Absalom cano lweny gi Daudi

¹ Rumacen ma gigipiny me, Absalom onyewo cawila gi kayinin, gi cwo piero abic ma jokur.

² Absalom oyido cew con to kidho cungo i yo ma waŋkac; aka ka nyatoro moro obino gi banja ri kere wothum, Absalom oyido lwoŋo ŋato aka penjo go kama wok'iye. Aka ka ŋato otieko waco rigo nono pere,

³ Absalom oyido waco rigo ni, “Neni, kwac perin jober aka jotire, to ongoye jakony pa kere manyalo winjo banja perin.

⁴ Kabedi oyido abedo jathum banja i piny Isiraili, di ji je ma jonitie gi teko kosa banja jobino t'atimo rijo tiro.”

⁵ Aka kisi ka nyatoro obino cegin to bwonere rigo, Absalom oyido yaro cinge aka twodo go, to cwiyo lembe.

⁶ Absalom otimo gime ri kisi Jaisiraili m'obino bongi kere kelo banja; aka i cowe mere oywayo cuny jo.

⁷ Rumacen ma oro aŋwen, Absalom owaco ri kere ni, “Mondo akwayin iyeyan akidhi Hebron atim cikirok ma timo gi Rwoth.

⁸ Munyo oyido anitie Gesur, i piny Siria, aciko Rwoth ni ka odwokan i Yerusalem, abino lamo go i tindi Hebron.”

⁹ Kere owaco rigo ni, “Kadhi i siem.” Ameno Absalom oay to kadho Hebron.

¹⁰ To Absalom dhiro jomikwenda manyaliŋliŋ bongi nonin je ma Isiraili waco rijo ni, “Tekin wiwinjo dwondi gwara, koki win ni, ‘Absalom olokere kere ma Hebron.’ ”

¹¹ Oyido nitie cwo 200 m'oyido Absalom olwoŋo jo kadho gi go wok Yerusalem m'ongoye gima joŋeyo.

¹² Aka munyo Absalom miyo cowirok, odhiro nyatoro lwoŋo Ahithofel m'oyido obedo acel kwoŋ jomic rieko pa Daudi wok i tindi madwoŋ Gilo. Aka camo sereko ri Daudi olimo meni, aka ji man jomedere riwirok gi Absalom.

Daudi ringo woko weyo Yerusalem

¹³ Jamikwenda moro obino aka owaco ri Daudi ni, “Cuny cwo ma Isiraili oringo bongi Absalom.”

¹⁴ Ameno Daudi owaco ri ŋecin pere m'oyido jonitie bonge i Yerusalem ni, “Ay win waringi woko kwoŋ Absalom! Redi win! Kakameno go cegin tundo ka, aka lakikengila wan to neko kisi nyatoro i tindi madwoŋ.”

¹⁵ Ŋecin pa kere jodwoko go ni, “Neni, ŋecin perin joyikere timo gimoro je m'iwaco.”

¹⁶ Ameno kere gi ji ma peco pere je gi jodhum pere joringo; kwanyo woko mon pere ma gi thenge apar ama kere oweyo kuro cel pa kere.

¹⁷ Paka kere gi cwo pere oyido joringo, jocungo i ot macowe.

¹⁸ Jodhum pa kere je jocungo cegin gi go munyo jokur pa kere joluwo ruwaŋ go. Jolweny 600 m'oyido joluwo go wok i tindi Gath bende joluwo,

¹⁹ aka kere owaco ri jatel pajo Itay Jagiti ni, “Raŋo ikadho gi wan? Gik ibedi gi kere manyen. Ibedo japath, aka iringo wok i piny perin.

²⁰ Itieko bedo ka nyaka ma hongo macek, t'onyo raŋo aweyin ilera kodan? Akuya kiri kam'akadh'iye. Gik gi wade perin, aka weyi Rwoth wonyuthi win wor g'adieri.”

²¹ Itay odwoko kere ni, “Jadwoŋ, akwoŋere rin i nyingi Rwoth ni abino kadho kodin kamoro je m'inokadh'iye, makada nende bedi tho.”

²² Daudi owaco ri Itay ni, “Meno ber medere woth.” Ameno Itay omedere woth gi cwo pere je kodi jomathindho m'oyido jonitie gi go.

²³ Ji jotiŋo dwondi gin malo aka jogoyo ndur munyo Daudi kadho gi ji ma joluwo go. Kere oŋado gi milelo Kidiron, aka cwo pere bende joluwo go to joje jokidho yo thim.

²⁴ Abiatha, Zadok, gi Jolevi bende oyido jokadho gi kere, aka oyido jotiŋo Kakan ma Cikirok pa Were; aka jojengo piny cuka ji je jowok i tindi madwoŋ.

²⁵ Kenyo kere owaco ri Zadok ni, “Tiŋi Kakan ma Cikirok pa Were idwoki i tindi madwoŋ. Comoro ka Rwoth owinji kodan maber, go bino dwokan t'aneno, gi kam'anitie iye.

²⁶ To k'inen go k'owinji kodan, maber meno ber, aka weyi go wotim ran gima go mito.

²⁷ Neni, kadhi gi wodin Ahimaz, kodi wod pa Abiatha Yonathan, aka wigik i tindi madwoŋ i siem.

²⁸ Kucel an abino kuro kama ji joŋado gine kidho i thim cuka anolimi wac wok bongin.”

²⁹ Ameno Zadok gi Abiatha jodwoko Kakan ma Cikirok pa Were i Yerusalem, aka jodoŋ koro.

³⁰ Daudi oidho wi got Oliv munyo ywak, gi par tiende, aka oyido oumo wiye ma nyutho rem. Ji je m'oyido joluwo go bende joumo wiy gin aka bende joywak.

³¹ Munyo owaci ri Daudi ni Ahithofel bende oyido nitie kanyacel gi ji ma jocamo rigo sereko gi Absalom, go owaco ni, “Mondo Rwoth, akwayin wir rieko pa Ahithofel i miŋo.”

³² Munyo Daudi otundo i wilwindi ma got, kam'oyido ilamo iye Were, mere pere m'ogenere Husay Jarakit obino bonge munyo law pere oyec aka okonjo i wiye lowo.

³³ Daudi owaco rigo ni, “K'imedere kodan, ilangoye ran kony.

³⁴ To inyalo konyan ka igiki i tindi madwoŋ, aka iwaci ri Absalom ni, ‘Jadwoŋ, paka oyido abedo ŋeca pa benin, pama bende alabedo ŋeca perin.’ Aka ikwer rieko moro je ma Ahithofel omiy.

³⁵ Jocway ri Were i wi migam Zadok gi Abiatha jonitie koro; wac rijo gimoro je m'inowinji i cel pa kere pa kere.

³⁶ Jonitie gi wot jo Ahimaz gi Yonathan, aka inyalo oro ran jo gi wac je m'inowinji.”

³⁷ Ameno Husay, mere pa Daudi, ogik i tindi madwoŋ munyo nyaka Absalom donjo i Yerusalem.