2 Kerin 9 - KITAWO MALEŊ

Iwiro Yehu bedo Kere ma Isiraili

¹ Kenyo Elisa jatuci wac Were olwoŋo acel kwoŋ jotuci wac Were ma nyaka ay aka owaco rigo ni, “Yikere aka ikidhi i tindi Ramoth i Giliad. Ter agwata mo me kodin,

² aka ka itundo, rangi Yehu wod pa Yehosafat aka nyakwar Nimisi. Kwany go kwoŋ wadi iter go i kisika kakende.

³ Kenyo kwany agwata mo, aka ikonji i wiye t'iwaco ni, ‘Rwoth waco nike owirin bedo kere ma Isiraili.’ Aka eye kenyo piyo.”

⁴ Ameno jatuci wac Were no okadho i Ramoth,

⁵ kam'onwaŋo jotel pa jolweny i romo aka owaco ni, “Jadwoŋ anitie gi mikwenda perin.” Yehu openjo ni, “Ŋa kwoŋ wan m'iluwo gine?” Go odwoko ni, “In jadwoŋ.”

⁶ Kenyo jario jokadho i ot, aka jatuci wac Were ma nyaka ay okonjo i wi Yehu mo to waco ni, “Rwoth, Were pa Isiraili waco ni, ‘Awirin bedo kere pa ji paran Isiraili.

⁷ Iripo neko jadwoŋ perin kere, wod pa Ahab no, ŋey amiy Yezebel gir'acula ma neko jotuci wac Were paran kodi ŋecin paran man.

⁸ Peco pa Ahab je kodi nyikwaye joripo tho; abino reyo woko cwo ma peco pere je mathindho kodi m'oti.

⁹ Abino timo ri peco pere paka peco pa Yerobowam wod pa Nebat kodi kere Basa wod pa Ahija.

¹⁰ Delkwoŋ Yezebel k'oyik iy'adec ma Yezirel, gwokere jobino camo.’ ” Kenyo jatuci wac Were oyawo thigo to ringo.

¹¹ Munyo Yehu ogik bongi jotel pa jolweny wadi, jopenjo go ni, “Gigipiny je ber? Aŋo ma janeko no omito kwoŋin?” Yehu odwoko ni, “Wiŋeyo go kodi luwo pere.”

¹² Jodwoko ni, “Be wakuya! Waci riwan gima go owaco!” Aka Yehu owaco ni, “Owaco ran nike Rwoth waco ni, ‘Awirin bedo kere ma Isiraili.’ ”

¹³ Kenyo jotel pa jolweny wadi joyaro nangin pajo i wi madala ri Yehu wocungi iye, jokudho gwara, aka jokoko ni, “Yehu obedo kere!”

Tho pa kere Yoram

^14-15 Kenyo Yehu ocamo sereko ri Yoram m'oyido nitie i Yezirel kam'oyido okadh'iye cango adhola m'onwaŋo munyo lwenyo gi kere Hazael ma Siria i Ramoth. Ameno Yehu owaco ri jotel pa jolweny wadi ni, “Ka winitie kodan, neni win nike ongoye ŋat'okwale wok Ramoth kidho gwoko ji ma Yezirel.”

¹⁶ Kenyo Yehu oidho cawila pere to kadho i Ramoth. Yoram oyido k'obothi aka kere Ahazia ma Yuda oyido nitie kenyo owendo rigo.

¹⁷ Jakur m'oyido ocungo i wi acurcur ma Yezirel oneno Yehu kodi cwo pere jobino, aka owaco ni, “Aneno cwo jogweco jobino.” Yoram odwoko ni, “Or jacwo gi kayina worom gi jo woŋey ka jobedo merin kosa jokwor.”

¹⁸ Ameno jamikwenda ogweco kiri bongi Yehu aka owaco ni, “Kere mito ŋeyo ka wibino i siem.” Yehu odwoko ni, “Gir'atima aŋo m'initie gine gi siem? Wire igweci yu dieŋeyan.” Jakur m'oyido nitie i wi acurcur owaco ni, “Jamikwenda otundo bongi jo, to kidwoki.”

¹⁹ Kenyo oor jamikwenda man m'openjo Yehu penji acel. Yehu kendo odwoko ni, “Gir'atima aŋo m'initie gine gi siem? Wire igweci yu dieŋeyan.”

²⁰ Jakur owaco kendo ni, “Jamikwenda otundo bongi jo, to kidwoki. Aka gweco mere cale apa Yehu; kole go gweco pa janeko!”

²¹ Yoram owodho or nike woyik cawila pere aka otim ameno. Kenyo Yoram kodi Ahazia jogweyo kisi dhano cawila pere kidho romo gi Yehu. Joromo gi go i ndelo m'oyido obedo apa Naboth.

²² Yoram openjo ni, “Ibino i siem?” Yehu odwoko ni, “Siem obedi nedi kafodi wanitie gi yido kodi lamo cal ma yokin Yezebel ocako?”

²³ Yoram okoko ni, “Obedo camo sereko, Ahazia!” Aka Yoram owiro cawila pere to ringo.

²⁴ Yehu ocelo asere pere gi meni pere je aka ocelo dieŋey Yoram to cwowo cunye. Yoram opodho to tho i cawila pere,

²⁵ aka Yehu owaco ri jakur pere Bidikar ni, “Kwany delkwoŋe ibol i ndelo m'oyido obedo apa Naboth. Poyi nike an kodin oyido wagweco kanyacel yu dieŋey Ahab ba kere Yoram, Rwoth owaco gime kwoŋ Ahab:

²⁶ ‘Aneno neki pa Naboth kodi wote nyoro. Aka aciko nike abino miyin gir'acula i ndelo acel me.’ Ameno ter delkwoŋ Yoram ibol i ndelo m'oyido obedo apa Naboth, ŋey cikirok pa Rwoth wotundi i kare.”

Tho pa kere Ahazia ma Yuda

²⁷ Munyo Ahazia kere ma Yuda oneno gime, oringo yu tindi Beth Hagan. Yehu oriemo go aka omiyo cwo pere cik nike woneki go bende. Jowumiya go i cawila pere i yo ma kidho kiri Gur, cegin gi Ibilim. Aka Ahazia oringo kiri Megido to tho kenyo.

²⁸ Jodhum pere jodwoko delkwoŋe i Yerusalem i cawila aka joyiko i kaliel pa kerin i tindi madwoŋ pa Daudi.

²⁹ Ahazia oyido obedo kere i oro mar'apar g'acel ma Yoram wod pa Ahab oyido kere ma Isiraili.

Yehu neko Yezebel

³⁰ Munyo Yehu obino i Yezirel, Yezebel oyido otieko winjo gim'otimere. Ameno owiro biendi waŋe to goyo ye wiye, aka ocungo i dirisa to ŋiyo piny i yo i cel pa kere.

³¹ Munyo Yehu donjo i waŋkac, Yezebel owaco ni, “Obedo siem, in Zimiri, janek pa jadwoŋ perin?”

³² Yehu otiŋo waŋe malo i dirisa, aka okoko ni, “Ŋa manitie i thenge paran? Ŋa?” Ario kosa adek kwoŋ jodhum ma cel pa kere joŋiyo go piny gi dirisa,

³³ aka Yehu owaco rijo ni, “Bol win go piny!” Jobolo Yezebel piny, aka remo pere okire i kor ot kodi kayinin. Yehu ogweyo kayinin kodi cawila pere kwoŋe,

³⁴ odonjo i cel pa kere to cemo. Kenyo nyaka owaco ni, “Ter win delkwoŋ dhako m'okwoŋ no wiyiki, kole go obedo nyar kere.”

³⁵ To munyo okidhi yiko go, onwaŋ nyaka pado wiye kodi cokin ma cinge kodi tiende.

³⁶ Munyo owaci ri Yehu, owaco ni, “Me gima Rwoth owaco nike bino timere, munyo owaco luwo bongi ŋeca pere Elia ni, ‘Gwokere jobino camo delkwoŋ Yezebel iy'adec ma Yezirel.

³⁷ Aka gigipiny m'odoŋ bino kedhirok kenyo pa woyo, ŋey wongoye ŋat'onyali waco ni, me Yezebel.’ ”