2 Kerin 5 - KITAWO MALEŊ

Naman both dhowo

¹ Naman, jamituka pa jolweny ma Siria oyido obedo ŋata kere ma Siria miyo dwoŋ swa aka woro, kwoŋbedo luwo kwoŋ Naman Rwoth oyido omiyo jolweny ma Siria loyo. Go oyido obedo jalweny madwoŋ, to oyido two dhowo.

² I kinyaga pajo acel kwoŋ Joisiraili, Josiria oyido jotiŋo nyako Jaisiraili ma nyaka ay m'olokere ŋeca pa cipa Naman.

³ Ndelo acel, nyako no owaco ri dhakodwoŋ pere ni, “Kabedi jadwoŋ paran nyalo kidho bongi jatuci wac Were ma bedo Samaria, oyido nyalo both dhowo pere.”

⁴ Munyo Naman owinjo gime, okidho bongi kere to waco rigo gima nyako owaco.

⁵ Kere ma Siria owaco ni, “Kidhi bongi kere ma Isiraili aka ter rigo balwa me.” Ameno Naman okadho aka otero feza 30,000 zahabu 6,000 kodi nangin mafoth apar awira.

⁶ Balwa ma Naman otero oyido somere ni, “Balwa me nyutho jatel pa jolweny paran Naman. Amitin ibothi go kwoŋ dhowo pere.”

⁷ Munyo kere ma Isiraili osoma balwa, oyeco woko law pere to waco ni, “Kere ma Siria paro nike anyalo botho jame nedi? Go paro nike abedo Were manitie gi meni ma kwo kodi tho? Me nyuthere kamaler nike go temo kwinyan!”

⁸ Munyo jatuci wac Were Elisa owinjo gim'otimere, odhiro wac ri kere ma Isiraili ni, “Raŋo irembo? Weyi go wobin bongan, ŋey woŋey nike jotuci wac Were jonitie i Isiraili.”

⁹ Ameno Naman obino to cungo i dhiot pa Elisa gi punde pere kodi cawilin.

¹⁰ Elisa ooro ŋeca woko waco ri Naman wokidhi wolwokere i malawa Yordan dibirio ŋey wobothi two pere.

¹¹ To Naman okadho i nge ka waco ama: “Oyido aparo nike go lawok woko kwayo Rwoth Were pere, to tiŋo cinge i wi two me to bothan!

¹² Kucel malawin Amana kodi Farifari jonitie i Damasiko ma joloyo malawin moro je i Isiraili. Oyido anyalo lwok'iye t'aboth!”

¹³ To ŋeca pere jocore bonge aka jowaco rigo ni, “Jadwoŋ, ka bedi jatuci wac Were oyido oorin timo gima matek, dinyo itimo. Onyo raŋo ikilwokere paka go owaco aka ibothi?”

¹⁴ Ameno Naman oloro piny i Yordan to munyere dibirio paka Elisa oyido owaco, aka obothi kicutho. Delkwoŋe olokere m'ocwiny aka m'olony.

¹⁵ Ogik bongi Elisa gi cwo pere aka owaco ni, “Neni, onyo aŋeyo nike were man ongoye i piny gibe, kwanyo woko Were pa Isiraili; riameno mondo joli mic wok bongi ŋeca perin.”

¹⁶ Elisa odwoko ni, “Akwoŋere i nyingi Rwoth makwo, m'atiyo rigo nike akibino jolo mic moro je.” Naman omena go nike wojol to Elisa kwero.

¹⁷ Kenyo Naman owaco ni, “K'ikwero jolo mic, yeyan akadhi gi lowo ma nyithindhi kayinin ario jonyalo tiŋo tero peco kodan, kwoŋbedo wok pama akibino miyo cowirok kosa mic awaŋa ri were moro je kwanyo woko Rwoth.

¹⁸ Ameno aparo nike Rwoth bino cwako ran ka akwaŋo kere paran i ot pa Rimon were ma Siria lamo go. Adieri Rwoth bino cwako ran!”

¹⁹ Elisa owaco ni, “Kadhi i siem.” Aka Naman okadho. To munyo Naman oyido fodi k'okadho bor,

²⁰ ŋeca pa Elisa Gehazi owaco ni, “Neni, jadwoŋ paran oweyo Naman kadho ma k'oculo gimoro! Dinyo go ojolo gima Jasiria me omiyo go. Akwoŋere i nyingi Rwoth makwo nike abino luwo go akwany gimoro kwoŋe.”

²¹ Ameno Gehazi oluwo Naman. Munyo Naman oneno jacwo moro ŋweco luwo go, oloro piny wok i cawila pere romo gine, aka openjo ni, “Nitie gimarac?”

²² Gehazi odwoko ni, “Be. To jadwoŋ paran ooran awaci rin nike cwo ario ma jowok i kitipa pa jotuci wac Were ma jowok i piny matendere Efrayim nyaka jotundo, aka go kwayin imiy go feza 3,000 kodi nangin mafoth ario awira.”

²³ Naman odwoko ni, “Mondo jol feza 6,000 me.” Naman omena go aka otweyo rigo feza 6,000 i mugowa ario kodi nangin mafoth ario awira to miyo ŋecin ario kadho gine yuwiy Gehazi.

²⁴ Munyo jotundo i tendere ma Elisa bed'iye, Gehazi okwanyo mugowa ario to rwako i ot aka osewila ŋecin pa Naman.

²⁵ Gehazi ogik i ot aka Elisa openjo go ni, “Iwok kune?” Gehazi odwoko ni, “Ongoye.”

²⁶ To Elisa owaco rigo ni, “Oyido angoye kenyo i cuny munyo jalo oloro wok i cawila pere romo kodin? Me k'obedo hongo ma jolo pesa kodi nangin, ndelo nanzi kodi ndelo vini, rombo kodi dhok, kosa ŋecin!

²⁷ Riameno dhowo pa Naman bino yimere kwoŋin kodi nyikwayin cil gi cil.” Ameno Gehazi oeye ruwaŋ Elisa gi dhowo matar pa pe.