2 Kerin 21 - KITAWO MALEŊ

Kere Manase ma Yuda

¹ Manase obedo kere ma Yuda munyo jaoro apar g'ario, aka odhumo i Yerusalem ma oro piero abic g'abic. Yokimere oyido obedo Hefiziba.

² Manase otimo reco ruwaŋ Rwoth paka tim ma mijokere pa nonin ma Rwoth oriemo wok i piny no munyo ji pere jodonjo iye.

³ Kole go ogeto kalamo manyakafir ma bamere oyido oturo, ogeto migam ma lamo Bal to timo cal pa were madhako Asera paka kere Ahab ma Isiraili oyido otimo. Manase bende olamo micalin.

⁴ Ogeto migame manyakafir i Ot pa Rwoth, kama Rwoth oyido owaco nike iripo lam'iye go.

⁵ I diedipo ario ma Ot pa Rwoth ogeto migame ario ma lamo micalin.

⁶ Omiyo wode paka cowirok ma mic awaŋa. Oyido to timo jwok aka othiedho. Otimo reco swa ruwaŋ Rwoth to kwinyo nge pa Rwoth.

⁷ Oketho cal pa were madhako Asera i Ot pa Rwoth, kama Rwoth oyido owaco ri Daudi kodi wode Solomon ni, “I Yerusalem ka, i Ot pa Rwoth me, a kabedo m'atieko yero kwoŋ adec ma nonin apar g'ario ma Isiraili paka kabedo m'iripo laman'iye.

⁸ Aka ka Joisiraili joluw Or paran to jokuro cik je ma ŋeca paran Musa omiyo jo, akibino weyo woriem jo wok i lowo m'amiyo kwarere pajo.”

⁹ To ji ma Yuda jok'owinjo Rwoth, aka Manase omiyo jo timo reco madwoŋ loyo kiri ma nonin ma Rwoth oyido oriemo wok i lowo no jotimo munyo ji pere jodonjo iye.

¹⁰ Aka Rwoth owaco ri ŋecin pere jotuci wac Were ni,

¹¹ “Kere Manase otimo gimienirok me, aka otimo gikidakana loyo kiri ma Jokanan jotimo, aka gi cal pere omiyo ji ma Yuda timo reco.

¹² Riameno An, Rwoth Were pa Isiraili, abino kelo i Yerusalem kodi Yuda teko ma kisi ŋat'owinji kwoŋe bino bwok.

¹³ Abino miyo Yerusalem gir'acula paka atimo ri Samaria, paka atimo ri kere Ahab ma Isiraili kodi nyikwaye. Abino lindo ji ma Yerusalem, m'olony paka sen m'olindi t'iriewo piny.

¹⁴ Abino jwango ji ma joboth, aka abino miyo jo i cingi jokwor pajo ma jobino mako jo to jonyaga piny pajo.

¹⁵ Abino timo gime ri ji paran kwoŋbedo jotimo reco kwoŋan aka jokwinyo nge paran wok i hongo ma kwarere pajo jowok i Misir tundo gunyo ni.”

¹⁶ Manase oneko ji ma bubanja cuka royin ma Yerusalem omol gi remo; otimo gime medo kwoŋ miyo ji ma Yuda lamo cal, to miyo jo timo reco kwoŋ Rwoth.

¹⁷ Gigipiny man je ma Manase otimo kiri gi reco m'otimo ondiki i kitawo ma kigana ma mako kwoŋ kerin ma Yuda.

¹⁸ Manase otho aka oyiki go i ndelo ma cel pa kere, ndelo ma Uza, aka wode Amon olunjo go paka kere.

Kere Amon ma Yuda

¹⁹ Amon obedo kere ma Yuda munyo jaoro piero ario g'ario aka odhumo i Yerusalem ma oro ario. Yokimere oyido obedo Mesulemeth nyar Haruz ma wok i Yotiba.

²⁰ Amon otimo reco ruwaŋ Rwoth paka bamere

²¹ aka oluwo tim pa bamere to lamo cal ma bamere oyido lamo.

²² Okwero Rwoth, Were pa kwarere mewin mere, to kwero luwo Or pa Rwoth.

²³ Jodhum pere jocamo rigo sereko to joneko go i cel pa kere.

²⁴ Ji ma Yuda joneko jono ma jocano neko Amon, aka joketho wode Yosia bedo kere.

²⁵ Gigipiny man je ma Amon otimo ondiki i kitawo ma kigana ma mako kwoŋ kerin ma Yuda.

²⁶ Oyiki Amon i kaliel i ndelo ma Uza, aka wode Yosia olunjo go paka kere.