2 Kerin 2 - KITAWO MALEŊ

Rwoth tero Elia i polo

¹ Onyo munyo Rwoth cegin tero Elia malo i polo g'asur, Elia kodi Elisa oyido jonitie i yo jowok i Gilgal.

² Aka Elia owaco ri Elisa ni, “Onyo mondo bedi ka, kole Rwoth ooran denge Bethel.” To Elisa odwoko ni, “Akwoŋere i nyingi Rwoth makwo kodi rin nike akibino weyin.” Ameno jokadho i Bethel.

³ Kitipa pa jotuci wac Were jobino bongi Elisa aka jopenjo ni, “Iŋeyo paka konon me Rwoth kidho tero jadwoŋ perin woko?” Elisa odwoko ni, “Ey, aŋeyo, to weyi wakiri waluw kwoŋe.”

⁴ Kenyo Elia owaco ri Elisa ni, “Bedi ka, kole Rwoth ooran i Yeriko.” Elisa odwoko ni, “Akwoŋere i nyingi Rwoth makwo kodi rin nike akibino weyin.” Ameno jokadho i Yeriko.

⁵ Kitipa pa jotuci wac Were ma jobedo kenyo jopenjo Elisa ni, “Iŋeyo paka konon me Rwoth kidho tero woko jadwoŋ perin?” Elisa odwoko ni, “Ey, aŋeyo, to weyi wakiri waluw kwoŋe.”

⁶ Kenyo Elia owaco ri Elisa ni, “Bedi ka Rwoth ooran i Malawa Yordan.” Elisa odwoko ni, “Akwoŋere i nyingi Rwoth makwo kodi rin nike akibino weyin.” Ameno jomedere woth.

⁷ Jotuci wac Were piero abic joluwo jo to jocungo bor ye gi jo, aka Elia kodi Elisa jocungo i thengi Malawa Yordan.

⁸ Kenyo Elia olunyo kanzu pere to dolo aka ogoyo gine wi pi; pi otiakere aka Elia kodi Elisa joŋado i thenge ca i lowo m'othwo.

⁹ Gikenyo Elia openjo Elisa ni, “Kway gim'imito atim rin mafodi k'okwanyan woko bongin.” Elisa odwoko ni, “Weyi alimi kwoŋ meni perin ma bino miyan lunjo waŋin.”

¹⁰ Elia odwoko ni, “Meno kwac matek miyo, to ibino limo k'inenan paka ikwanyan woko bongin. K'ikinenan, ikibino limo.”

¹¹ Aka munyo jomedere luwo ka jowotho, neni, cawila ma mac kodi kayina ma mac opoko jo i diere aka Elia okadho malo i polo gi asur.

¹² Elisa oneno aka ogoyo ndur ni, “Baba, baba! Jameni ma thielo Isiraili! Ikadho!” Aka k'oneno Elia kendo. Kenyo oyeco woko kanzu pere iy'adec ario i rem.

¹³ Odimo kanzu pa Elia m'oyido opodho wok kwoŋ Elia, to gik cungo i thengi Yordan.

¹⁴ Ogoyo wi pi gi kanzu pa Elia ka waco ama: “Nikune Rwoth Were pa Elia?” Kenyo ogoyo pi kendo aka otiakere to ŋado i thenge ca.

¹⁵ Jotuci wac Were piero abic joneno go aka jowaco ni, “Meni pa Elia nitie kwoŋ Elisa!” Jokidho romo gi go, jokule piny ruwaŋ go,

¹⁶ aka jowaco rigo ni, “Wanitie ka cwo piero abic matek, weyi wakadhi warangi jadwoŋ perin. Kono Cuny pa Rwoth otiŋo go to weyo go wi got moro kosa i milelo moro.” Elisa odwoko ni, “Be, wikiripi kadho.”

¹⁷ To jomena go cuka Elisa oyeyo jo kadho. Cwo piero abic no jokadho to jorango Elia ma ndelo adek to jok'onwaŋo go.

¹⁸ Kenyo jogik bongi Elisa m'oyido kuro jo i Yeriko aka owaco rijo ni, “Akiwaco riwin nike wikiri wikadhi?”

Gir'aura pa Elisa

¹⁹ Onyo cwo mogo ma jowok i Yeriko jobino bongi Elisa to jowaco rigo ni, “Paka iŋeyo, jadwoŋ, tindi madwoŋ me ber, to pi mere rac aka kelo ici apodho.”

²⁰ Elisa owaco ni, “Keli ran win acero manyen, aka kethi win'iye cumbi.” Jokelo rigo,

²¹ aka Elisa okidho i waŋ pi to konjo cumbi i pi to waco ni, “Me a gima Rwoth waco ni, ‘Aloko pi me macil aka kilakelo tho kosa podho ici kendo.’ ”

²² Aka pi no obedo macil wok i hongo ma Elisa owaco nike labedo.

²³ Elisa oeye Yeriko kadho Bethel, aka i yo yac mogo jobino wok i tindi to jojwiyo go ka jokoko ni, “Ngoye ka, japata!”

²⁴ Elisa owire, oŋiyo jo, to kwoŋo jo i nyingi Rwoth. Kenyo arara ario ma mon jowok i lul to joyeco woko yac piero aŋwen g'ario no mathindho thindho.

²⁵ Elisa owok kenyo to kidho i Got Kamel, aka rumacen ogik i Samaria.