2 Kerin 15 - KITAWO MALEŊ

Kere Uziya ma Yuda

¹ I oro mar'apar g'abirio ma dhum pa Yerobowam mar'ario kere ma Isiraili, Uziya obedo kere ma Yuda

² munyo jaoro apar g'aucel aka odhumo i Yerusalem ma oro piero abic g'ario. Yokimere oyido obedo Yekolia ma wok i Yerusalem.

³ Go oluwo kite pa bamere, aka otimo gim'osangala Rwoth.

⁴ To kalamo manyakafir k'orey, aka ji jomedere miyo cowirok kodi waŋo buban kenyo.

⁵ Rwoth ogoyo Uziya gi two dhowo m'oramo go i kwo pere m'odoŋ je. Uziya obedo i ot pere munyo kidhum, aka wode Yotham am'oyido dhumo piny Yuda.

⁶ Gigipiny man je ma Uziya otimo ondiki i kitawo ma kigana ma mako kwoŋ kerin ma Yuda.

⁷ Kere Uziya otho aka oyiki go i kaliel pa kerin i tindi madwoŋ pa Daudi, aka wode Yotham olunjo go paka kere.

Kere Zekaria ma Isiraili

⁸ I oro ma piero adek g'aboro ma dhum pa Uziya kere ma Yuda, Zekaria wod pa Yerobowam mar'ario obedo kere ma Isiraili aka odhumo i Samaria ma dwe aucel.

⁹ Paka kerin ma jotelo dhumo rigo, otimo reco kwoŋ Rwoth to luwo kite pa kere Yerobowam wod pa Nebat m'omiyo Joisiraili timo reco.

¹⁰ Salum wod pa Yabes ocamo sereko ri kere Zekaria to neko go i Ibilim aka olunjo go paka kere.

¹¹ Gigipiny man je ma Zekaria otimo ondiki i kitawo ma kigana ma mako kwoŋ kerin ma Isiraili.

¹² Ameno cikirok ma Rwoth omiyo kere Yehu nike nyikwaye jobino dhumo kiri i luse mar'aŋwen jobino bedo kere i Isiraili to tundo i kare.

Kere Salum ma Isiraili

¹³ I oro ma piero adek g'abuŋwen ma dhum pa kere Uziya ma Yuda, Salum wod pa Yabes obedo kere ma Isiraili, aka odhumo i Samaria ma dwe acel.

¹⁴ Menahem wod pa Gad owok Tiriza to kidho Samaria, oneko Salum, to lunjo go paka kere.

¹⁵ Gigipiny man je ma Menahem otimo kiri gi nger m'ocamo iye sereko ondiki i kitawo ma kigana ma mako kwoŋ kerin ma Isiraili.

¹⁶ Munyo Menahem owok i Tiriza, oreyo woko tindi madwoŋ Tapuwa kicutho, ji mere, kodi adec m'othoko, kwoŋbedo jokwero tiŋo cingi gin malo rigo. Go obaro kiri iy mon je m'oyido joyac.

Kere Menahem ma Isiraili

¹⁷ I oro ma piero adek g'abuŋwen ma dhum pa kere Uziya ma Yuda, Menahem wod pa Gad obedo kere Isiraili, aka odhumo i Samaria ma oro apar.

¹⁸ Go otimo reco kwoŋ Rwoth, cuka ndelo ma tho pere oluwo kite pa kere Yerobowam wod pa Nebat m'omiyo Isiraili timo reco tundo ndelo ma tho pere.

¹⁹ Tiglath Pilesa, kere ma Asiria omonjo Isiraili, aka Menahem omiyo go kilo 34,000 ma feza ma dwoŋo go ŋey woridhi dhum pere i Isiraili.

²⁰ Menahem okwanyo pesa wok bongi joŋaŋo ma Isiraili gi romo kisi acel kwoŋ jo culo feza piero abic. Ameno Tiglath Pilesa ogik i piny pere.

²¹ Gigipiny man je ma Menahem otimo ondiki i kitawo ma kigana ma mako kwoŋ kerin ma Isiraili.

²² Menahem otho aka oyiki go, to wode Pekahia lunjo go paka kere.

Kere Pekahia ma Isiraili

²³ I oro ma piero abic ma dhum pa Uziya paka kere ma Yuda, Pekahia wod pa Menahem obedo kere ma Isiraili, aka odhumo i Samaria ma oro ario.

²⁴ Otimo reco kwoŋ Rwoth, ka luwo kite pa kere Yerobowam wod pa Nebat m'omiyo Isiraili timo reco.

²⁵ Jatel pa jolweny pa Pekahia m'ilwoŋo ni Peka wod pa Remalia ocamo rigo sereko gi cwo piero abic ma jowok Giliad, oneko Pekahia kama tek loyo i cel pa kere i Samaria to lunjo go paka kere.

²⁶ Gigipiny man je ma Pekahia otimo ondiki i kitawo ma kigana ma mako kwoŋ kerin ma Isiraili.

Kere Peka ma Isiraili

²⁷ I oro ma piero abic g'ario ma dhum pa kere Uziya ma Yuda, Peka wod pa Remalia obedo kere ma Isiraili, aka odhumo i Samaria ma oro piero ario.

²⁸ Go otimo reco kwoŋ Rwoth, ka luwo kite pa Yerobowam wod pa Nebat m'omiyo Isiraili timo reco.

²⁹ Obedo munyo Peka kere ma Isiraili ma Tiglath Pilesa kere ma Asiria omako tindi madongo ma Ijon, Abel Beth Maka, Yanowa, Kedes, Hazor, kodi adec ma Giliad, Galili, Nafital, to tero ji mere paka jotwec i Asiria.

³⁰ I oro ma piero ario ma dhum pa Yotham wod pa Uziya kere ma Yuda, Hosea wod pa Ela ocamo ri kere Peka sereko, oneko go, to lunjo go paka kere.

³¹ Gigipiny man je ma Peka otimo ondiki i kitawo ma kigana ma mako kwoŋ kerin ma Isiraili.

Kere Yotham ma Yuda

³² I oro mar'ario ma dhum pa Peka wod pa Remalia paka kere ma Isiraili, Yotham wod pa Uziya obedo kere ma Yuda

³³ munyo jaoro piero ario g'abic, aka odhumo i Yerusalem ma oro apar g'aucel. Yokimere oyido obedo Yerusa, nyar Zadok.

³⁴ Oluwo kite pa bamere Uziya to timo gim'osangala Rwoth.

³⁵ To kalamo manyakafir k'orey, aka ji jomedere miyo cowirok kodi waŋo buban kenyo. Yotham ama ogeto Waŋkac ma Yumalo ma Ot pa Rwoth.

³⁶ Gigipiny man je ma Yotham otimo ondiki i kitawo ma kigana ma mako kwoŋ kerin ma Yuda.

³⁷ Obedo i hongo ma dhum pere ama Rwoth ocako dhiro kere Rezin ma Siria kodi kere Peka wod pa Remalia monjo Yuda.

³⁸ Yotham otho aka oyiki go i kaliel pa kerin i tindi madwoŋ pa Daudi, aka wode Ahaz olunjo go paka kere.