2 Kerin 1 - KITAWO MALEŊ

Elia gi kere Ahazia

¹ Munyo Ahab otieko tho, Mowab ogwenyere kwoŋ Isiraili.

² Onyo kere Ahazia ma Isiraili opodho wok i wi kisul ma cel pa kere pere i Samaria, aka olimo litho swa. Ameno ooro jomikwenda penjo Balzebub, were ma Ekiron tindi madwoŋ ma Filistia niaŋ ka go obothi.

³ To malaika pa Rwoth owaco ri Elia jatuci wac Were ma wok Tisibe wokidhi worom gi jomikwenda pa kere ma Samaria aka wopenji jo ni, “Raŋo wikidho penjo were ma Ekiron? Rupiri wiparo nike Were ongoye i Isiraili?

⁴ Onyo riameno Rwoth waco ri kere ni, ‘Ikibino ay i kanindo, adieri ibino tho.’ ” Ameno to Elia kadho.

⁵ Jomikwenda jogik bongi kere aka openjo jo ni, “Raŋo widwoko?”

⁶ Jodwoko go ni, “Jacwo moro obino romo gi wan, aka owaco riwan ni, ‘Gik win bongi kere m'ooro win aka wiwaci rigo nike Rwoth waco ama, raŋo ioro jomikwenda penjo Balzebub kere ma Ekiron? Rupiri iparo nike Were ongoye i Isiraili? Riameno ikibino ay wok i kanindo, adieri ibino tho.’ ”

⁷ Kere openjo jo ni, “Jacwo no cale nedi?”

⁸ Jodwoko ni, “Oruko law ma pien ogwaŋ to tweyo piere gi del ma pien diel.” Kere odwoko ni, “Meno Elia!”

⁹ Kenyo kere ooro jatel pa jolweny kodi jolweny piero abic bongi Elia. Jonwaŋo go obedo i wi tendere aka jatel pa jolweny owaco rigo ni, “Jacwo pa Were, kere miyin cik loro piny.”

¹⁰ Elia odwoko ni, “K'inen abedo jacwo pa Were, weyi mac wobin wok i polo wonekin kodi cwo perin.” Kenyo mac obino wok i polo to reyo jo.

¹¹ Kere ooro jatel pa jolweny man kendo, kodi jolweny piero abic. Jatel pa jolweny oidho malo to waco ri Elia ni, “Jacwo pa Were, kere miyin cik loro piny piyo!”

¹² Elia odwoko jo ni, “K'inen abedo jacwo pa Were, weyi mac wobin wok i polo aka wonekin kodi cwo perin!” Kenyo mac pa Were obino wok i polo to neko jatel pa jolweny kodi cwo pere.

¹³ Kere kendo ooro jatel pa jolweny kodi cwo piero abic. Jatel pa jolweny no oidho malo to guro conge ruwaŋ Elia aka oywakere ri Elia ni, “A jacwo pa Were, mondo akwayin maki wor kodan kodi cwo paran. Both kwo mawan!

¹⁴ Neni mac m'owok i polo oneko woko jotel pa jolweny ario ca kodi cwo pajo; to mondo Ikir'ineki wan!”

¹⁵ Kenyo malaika pa Rwoth owaco ri Elia ni, “Lori piny gi go Ikir'ilwor.” Ameno Elia oloro piny gi jatel pa jolweny bongi kere

¹⁶ aka owaco ri kere ni, “Rwoth waco ni, ‘Kwoŋbedo ioro jomikwenda penjo Balzebub were ma Ekiron, gi paro nike Were ongoye i Isiraili m'inyalo penjo, ikibino ay i kanindo, adieri ibino tho.’ ”

¹⁷ Ahazia otho paka Rwoth oyido owaco luwo kwoŋ Elia. Ahazia oyido ongoye gi wote aka omin go Yoram ama olunjo go paka kere i oro mar'ario ma dhum pa Yehoram wod pa Yehosafat, paka kere ma Yuda.

¹⁸ Gigipiny man je ma kere Ahazia otimo ondiki i kitawo ma kigana ma mako kwoŋ kerin je ma Isiraili.