2 Jokorintho 5 - KITAWO MALEŊ

Ot mawan ma polo

¹ Kole waŋeyo ni ka kayindi ma wabed'iye i piny, delkwoŋ wan me, okedhi woko, Were bino miyo wan ot ma cil gi cil i polo, ma dhano ama k'ogero.

² Pama onyo wacukere g'awanya ma ruko ot mawan man polo.

³ Ato k'oruki riwan ot no, wak'obedi kinyoro.

⁴ Kafodi wakwo i kayindi ma piny me, wacur aka wacukere gi paro ma diyo wan; ki rupiri wamito lunyo woko delkwoŋ wan, to rupiri wamito woruki riwan del manyapolo ayino, aka ŋey kwo makirum womwonyi woko tho.

⁵ Were am'oyiko wan ri wirok me, aka omiyo wan Cuny Maleŋ ma ridho ni lamiyo wan gimoro je ma go ociko miyo wan.

⁶ Am'omiyo hongo je wanitie gi miseni. Waŋeyo nike ka tekin waripo i del me meno wanitie bor gi Rwoth.

⁷ Kole wakwo gi yeyo, makiweno gi gima waneno.

⁸ Awaco ni wapoŋ gi miseni, aka di wayenyi kiri weyo delkwoŋ wan to wakadho bedo gi Rwoth.

⁹ To maloyo gimoro je, wamito kisangala go, kada fodi wanitie i del mawan me kosa be.

¹⁰ Kole wajoje waripo cungo ruwaŋ Kristo, go wothum riwan banja, ŋey kisi dhano kwoŋ wan wolimi gima ripo gine cungo kwoŋ gima go otimo gi delkwoŋe, maber kosa marac.

Tiyirok gi Were i Kristo

¹¹ Waŋeyo dwoŋ lworo Rwoth, am'omiyo watemo naŋo ji. Were oŋeyo kwo mawan maber, aka ageno ni i cuny win wibende wiŋeyo wan.

¹² Wakitem pakirok riwin kendo; kucel watemo miyo win thwolo ma yumirok gi wan ayin, aka nyaka wibino nyalo dwoko wac ma dhok joma fodi joyumere gi cal pa dhano ma woko, makiweno ma i adundo.

¹³ K'inen neko omako wan adieri meno omako wan r'atoŋa pa Were; to ka wiy wan otire, meno otire ma bero mewin.

¹⁴ Ato mar pa Kristo ama dhumo wan, kareno waŋeyo ni dhano acel otho ri ji je, ma nyutho ni kere ji je jotieko tho.

¹⁵ Aka go otho ri ji je, nike jomakwo kiri jowoteri kwo paka apajo wegi to paka apa Kristo m'otho rijo to icerino go kwoŋ jom'otho.

¹⁶ Am'omiyo, wok pama wakithum ri nyatoro banja cungo kwoŋ paro manyadhanodhano. Kada yado onwaŋo watero Kristo gi paro manyadhanodhano, pama wakitim ameno kendo.

¹⁷ Am'omiyo ka moro nitie i Kristo, go obedo cwec manyen: Gima con okadho woko, manyen ama obino.

¹⁸ Gime je wok bongi Were, ma i Kristo odwoko wan i tiyirok gine; aka omiyo wan tic ma dwoko joman bende i tiyirok gine.

¹⁹ Mikwenda mawan obedo ni: Were onyo dwoko ji ma piny i tiyirok gine i Kristo, aka kikwan reco kwoŋ jo kendo. Were omiyo wan mikwenda paka go dwoko ji tiyirok gine kendo.

²⁰ Am'omiyo, wabedo jomikwenda ma joluwo ri Kristo, paŋini Were won gipi onyo goyo koko ri ji i wan. Kapa Kristo, wakwayo win ni dwoki win witiyere kodi Were!

²¹ Kristo oyido ongoye gi gimarac, to Were omiyo go riwirok gi wan i gimarac mawan, ŋey i Kristo, wanyal bedo paka tiro pa Were.