1 Yohana 3 - KITAWO MALEŊ

Nyithindho pa Were

¹ Neni win paka Bawan omaro wan m'oasere m'omiyo ilwoŋo wan ni nyithindho pa Were, aka iy'adieri, wabedo ameno. Gim'omiyo piny kuya wan obedo rupiri k'oŋeyo Were.

² Jowotan, pama onyo wabedo nyithindho pa Were, aka fodi kiŋeyere gima wabino bedo. To waŋeyo ni ka Kristo onenere wabino bedo paka go, rupiri wabino neno go paka go nitie won.

³ Nyatoro je manitie gi geno me i Kristo ripo lonyo kwo pere paka Kristo olony.

⁴ Moro je ma timo gimarac meno turo cik pa Were; aka bedo i reco nyutho kwero winjo cik.

⁵ Wiŋeyo ni Kristo omenyere ŋey wokwany woko reco mawan, aka go ongoye gi gimarac.

⁶ Am'omiyo moro je ma kwo i Kristo kimedere timo gimarac; to ŋata medere gi timo gimarac meno fodi k'oneno go, aka fodi kuya go.

⁷ Nyithindho paran, dhano moro je wokiri wowondi win. Nyatoro je ma timo gim'olony meno ŋat'otire paka Kristo otire.

⁸ Ŋata medere gi timo reco meno dhano pa jwogi, rupiri jwogi ocako gi reco pere wok con. Wod Were obino ro wac me: Reyo woko tic ma jwogi oyido otieko timo.

⁹ Nyathi pa Were moro je kimedere gi timo reco, rupiri kodhi pa Were ama nitie i go; aka rupiri Were obedo Bamere, go kidok ripi medo timo gimarac.

¹⁰ Me apaka wanyalo poko maber i dier nyithindho pa Were kodi apa jwogi: Nyatoro je ma kitim gim'otire kosa ma k'omaro omin go, meno k'obedo nyathi pa Were.

Mare win

¹¹ Kole me a mikwenda ma witieko winjo wok con ni waripo mare.

¹² Wikiri wibedi paka Kayin: Go oyido obedo apa Jaraco, aka oneko omin won. Raŋo ma Kayin oneko omin? Kwoŋbedo tim pere oyido rac, aka gigipiny m'omin otimo oyido beyo.

¹³ Am'omiyo wutmera, wikiri widhier ka ji ma piny jodak win.

¹⁴ Waŋeyo nike watieko weyo tho to wabino i kwo, rupiri wamaro wutmin wan. Ŋata kimar wadi meno fodi nitie i tho.

¹⁵ Ŋat'odak omin meno janek; aka wiŋeyo ni janek ongoye gi kwo makirum i go.

¹⁶ Me apaka waŋeyo gim'obedo mar: Kristo omiyo kwo pere riwan; aka wabende waripo miyo kwo mawan ri wutmin wan.

¹⁷ Ka dhano oŋaŋ to neno omin nitie i candi, to kidew kwoŋ omin, go nyalo waco nedi nike go nitie gi mar i cunye ri Were?

¹⁸ Nyithindho paran, mar mawan wokiri wobedi nyaka adhok won kende; to ripo bedo mar'adieri, ma nyuthere i tim.

Miseni ruwaŋ Were

¹⁹ Am'omiyo, me apaka wanoŋey nike wabedo joma nitie g'adieri, kendo apaka cuny wan bino bedo gi siem ruwaŋ Were:

²⁰ Kisi ka cuny wan nyutho wan banja moro; ato waŋeyo ni Were dwoŋ loyo cuny wan, aka oŋeyo gimoro je.

²¹ Am'omiyo jowotan, ka cuny wan kinyuthi wan banja moro, meno aka wabedo gi miseni ruwaŋ Were,

²² aka walimo bonge gimoro je ma wakwayo, rupiri wawinjo or pere aka watimo gima sangala go.

²³ Me a gima go oro wan timo: Nike waripo yeyo kwoŋ nyingi Wode Yesu Kristo to wamare paka Kristo ooro wan timo.

²⁴ Nyatoro je ma winjo or pa Were bedo i Were aka Were bedo i go. Aka me apaka waŋeyo ni Were bedo i wan: Waŋeyo kwoŋ Cuny ma go omiyo wan.