1 Timothe 5 - KITAWO MALEŊ

Tic i dier jom'oyeyo

¹ Ikir'iay kwoŋ ŋat'otegino gi gero, to nyuthi go wor paka d'itimo ri benin. Ter yac ma nyaka joay paka wutmin in,

² mondongo paka megin, aka mon ma fodi nyir paka nyimin in, gi leŋo je.

³ Pari kwoŋ mon ma cwogi jo otho ma jonitie i candirok.

⁴ Ka citho moro nitie gi nyithindho kodi nyikwaye, joripo kutho fonjirok timo tic ma mako kwoŋ yeyo i pecin pajo, jowonyal konyo jonywol pajo, rupiri meno a gima sangala Were.

⁵ Dhako m'obedo citho ma candere, m'ongoye kodi jakur, wobedi dhako m'oketho geno pere i Were, aka ywakere ri Were noknok, ka kwayo go kony wor g'odieceŋ.

⁶ To citho ma kethere yenyo gir'awanya meno otieko tho, kada nende go kwo i del.

⁷ Miy jo or me aka nyaka wongoye ŋata wopusa jo.

⁸ To ka nyatoro kipar kwoŋ wade pere, tektek mere joot pere won, meno otieko kwedere kwoŋ yeyo aka rac loyo ŋata fodi k'oyeyo.

⁹ Ikir'indiki nyingi citho moro ni wokwan go i kweth pa mon ma cwogi jo otho ka go fodi kikal oro piero aucel. Kendo citho m'indiko ripo bedo ni oyido k'onywomere ma kalo ka dicel.

¹⁰ Kendo go ripo bedo ni oŋeyere ri tic mabeyo: Dhako m'okuro nyithindho pere maber, ojolo ji maber i ot pere, okonyo ji pa Were, okonyo joma ni teko, aka omiyere ri tic je mabeyo.

¹¹ T'ikir'irwaki mon ma fodi nyir i kweth pa mon ma cwogi jo otho; kole k'awanya pajo omiy jo yenyo nywomirok to jowiro ŋey gin ri Kristo,

¹² gikenyo to joturo cikirok pajo marapena gine.

¹³ Medo kwoŋ meno, jonyalo fonjere nyapo gi kula ma woth i dhoudi pa ji; aka maloyo kenyo, jonyalo fonjere kiwerawera gi luwirok kicar, gi bedo mayil yil, gi luwo kwoŋ gima di kiripi jowoluwi kwoŋe.

¹⁴ Am'omiyo, ayenyo ni mon ma cwogi jo otho kareno jo fodi nyir jowonywomere, jowolimi nyithindho, aka jowokuri pecin pajo, ŋey jokiri jowomiy jokwor mawan hongo ma luwo marac kwoŋ wan.

¹⁵ Kole mon megi ma cwogi jo otho jotieko wirok aka onyo joluwo Sitan.

¹⁶ To ka dhako moro m'oyeyo nitie gi wade ma jobedo mon ma cwogi jo otho, weyi won wokonyi jo, wokiri wokel peko ri kitipa pa jom'oyeyo, aka ŋey kitipa wonyali konyo mon ma cwogi jo otho ma jocandere.

¹⁷ Jodongo ma jotiyo maber paka jotel, ripo miyo jo kemba ma romo, tektek mere joma asa timo tic ma tito wac gi fonji.

¹⁸ Kole ndiko waco ni, “Ikir'iculi dhok mirikwa gi thac ka ywayo kwer furo.” Odoko ni “Jatic je ripo gi kemba pere.”

¹⁹ Ikir'iyey wac m'okel kwoŋ jadwoŋ moro kwanyo woko ka j'ario kosa adek joridho wac no.

²⁰ Bwoki joma cwire i timo gimarac i dier ji kamaler, ŋey joman lworo womaki jo.

²¹ Ruwaŋ Were kodi Yesu Kristo, kodi jomalaika maleŋ, aorin ni winji fonji me m'ongoye yero, aka ikir'itim ri ji gimoro je kareno idok yuthenge acel.

²² Ikir'ikwakere ketho cingin i wiy nyatoro ri tic pa Were. Odoko ikir'iriwere gimoro i tim pere mareco; bedi m'ilony.

²³ Onyo, ikir'imadhi pi kende, to bili ye vini manok ma konyo iyin gi toyo cemo paka imaro two.

²⁴ Reco pa jomegi yot neno, aka bino miyo ithumo rijo banja; to reco pa joman nenere rumacen.

²⁵ Meno bende apaka, tic mabeyo nenere kamaler; kendo kada jok'othangere kamaler jokinyal panirok.