1 Samwiri 8 - KITAWO MALEŊ

Joisiraili jokwayo kere

¹ Munyo Samwiri oti, oketho wote paka jothum banja i piny Isiraili.

² Wode makayo oyido obedo Yowel, aka mathin oyido ilwoŋo ni Abija; oyido jothumo banja Berseba.

³ To yac me jok'oluwo royo pa bajo, oyido joworo pesa; ameno joyeyo ji nyewo jo to jothumo banjin m'ongoye tiro.

⁴ Kenyo jotel je jocokere kanyacel to jobino bongi Samwiri Rama,

⁵ To jowaco rigo ni, “Neni, pama iti, aka yac perin jokiluwi royo perin onyo pama yer riwan kere ma wodhum wan paka piny man.”

⁶ Samwiri owinjo marac swa munyo jome jokwayo kere; ameno to go kwayo Rwoth womiy go rieko.

⁷ Rwoth owaco rigo ni, “Winji gimoro je ma jowaco rin. K'obedo in ama jokwero; to jokwero an bedo kere pajo.

⁸ Wok i hongo m'awodho jo wok i piny Misir kiri gi konon jowiro ran dieŋey jo aka jolamo werin man; jotimo rin gima kisi hongo jotimo ran.

⁹ Riameno, winji jo, to gwok jo aka ititi rijo nger ma kere pajo bino dhum'iye jo.”

¹⁰ Ameno to Samwiri waco ri jom'oyido mito kere wac je ma Rwoth owaco rigo.

¹¹ Owaco ni, “Me apaka kere mewin bino dhumo win, go bino loko yac mewin jolweny, megi jolatic i cawila pere ma lweny, megi jolagweyo kayina pere, aka megi jolabedo jokur ma joŋweco yuwiy kayina pere.

¹² Go laloko jomegi jomituka pa jolweny pere i kitipin ma ganin kodi ma piero abic. Jomegi jobino furo i ndelin pere to jokeco ranyak, aka jomegi jobino timo rigo gilweny kodi cumin ma cawila pere.

¹³ Go bende bino kwanyo nyir mewin to loko jo joyiki rigo mo maŋwe kur, kodi bedo jotedo pere gi timo rigo mugat.

¹⁴ Go bende bino mayo win ndelin mewin mabeyo ma vini kodi ma nanzi to miyo ŋecin pere.

¹⁵ Go lakwanyo acel wiy apar ma duma kodi nyingi vini mewin to miyo jodhum pere gi ŋecin pere man.

¹⁶ Go lakwanyo ŋecin mewin ma cwo gi mon, gi dhok mewin mabeyo, kodi punde mewin to ketho jo tic rigo.

¹⁷ Go lamito acel wiy apar ma mwendi mewin aka wibino bedo ŋecin pere.

¹⁸ Aka ka hongo no otundi wilakiŋunyaŋunya gi gwayo kwoŋbedo kere mewin ma wiwegi wiyero; to Rwoth kiladwoko win.”

¹⁹ To kad'ameno ji jokwero winjo wac pa Samwiri, to jowaco ni, “Be, wamito kere

²⁰ ŋey bende wabedi paka piny man, ka kere mawan won bende dhumo wan aka telo wan kidho i lweny mawan.”

²¹ Samwiri owinjo gimoro je ma jowaco to kidho waco ri Rwoth.

²² To Rwoth waco rigo ni, “Winji gimoro je ma jowaco, aka imiy jo kere.” Kenyo Samwiri owaco ri Joisiraili je dok peco.