1 Samwiri 6 - KITAWO MALEŊ

Jofilistia jodwoko Kakan ma Cikirok i Isiraili

¹ Jofilistia jokano Kakan ma Cikirok pa Rwoth ma dwe abirio i piny pajo.

² Kenyo Jofilistia jolwoŋo jocway ri werin pajo i wi migam kodi jothieth to jopenjo jo ni, “Watim aŋo gi Kakan ma Cikirok pa Rwoth? Waci riwan win ginaŋo ma wadwoki gine i kabedo pere i Isiraili.”

³ Jono jodwoko ni, “Ka widwoko Kakan ma Cikirok pa Were pa Joisiraili, wikiri widwoki gi cingi win nono, to paka nyalere je, dwoki win gi mic ma kwanyo woko reco mewin. Nyaka wilaboth aka bende wilaŋeyo raŋo go oyido medere miyo win gir'acula.”

⁴ Ji jopenjo ni, “Wadhir rigo mic aŋo ma kwanyo woko reco.” Jodwoko ni, “Cal ma two akwota kwoŋ jo abic m'otimi gi zahabu, kodi cal ma fuko abic m'otimi gi zahabu, kisi acel wocungi ri kisi kere pa Jofilistia abic. Gir'acula me odhir riwin gi kerin mewin abic.

⁵ Ameno wiripo yiko cal ma two akwota kwoŋ, kodi cal ma fuko ma kunyo piny mewin, aka wimiy Were pa Joisiraili dwoŋ, poyo nyaka miti go owey miyo win, gi werin mewin, gi piny mewin gir'acula.

⁶ Raŋo wimito bedo gi wictek paka Jomisir gi kere pajo Farawo? Munyo Were otieko mieno jo, jok'oweyo Joisiraili to jodok?

⁷ Onyo pama yik win magal kodi nyikuse dhok ario m'inyedho ma fodi k'otwey i ŋuti jo majogi to witweyo majogi i ŋuti jo; aka wikwany woko roci mere to widwoko jo i kigo dhok.

⁸ Wikwany Kakan ma Cikirok pa Rwoth to wiketho i magal; aka wikethi sanduku m'otiŋo mic ma cal m'otimi gi zahabu ma widhiro rigo ma kwanyo woko reco mewin i thengi Kakan ma Cikirok. Widhir magal, to wiweyo won wokadhi yo pere.

⁹ Aka wiriek waŋ win to wineno ka kadho. K'okidhi i piny pere won ma Bethsemes meno nyutho ni Were pa Joisiraili am'okelo kwoŋ wan teko me. To ka k'okadho yukorago, ameno wabino ŋeyo ni go ama k'okelo teko me; t'obedo gim'opodho apodha.”

¹⁰ Jotimo gim'owaci rijo; jokwanyo nyikuse dhok ario m'inyedho no, jotweyo i ŋuti jo majogi, jotweyo jo kwoŋ magal, aka jodwoko roci mere i kigo dhok.

¹¹ Joketho Kakan ma Cikirok pa Rwoth i magal kanyacel gi sanduku m'otiŋo cal ma two akwota kwoŋ gi cal ma fuko m'otimi gi zahabu.

¹² To nyikuse dhok no jotire gi yo ma kadho Bethsemes aka jokadho tirtir gine ma jok'oweyo royo munyo joywak malomalo. Rwodhe abic pa Jofilistia joluwo jo tundo kiri i kew gi Bethsemes.

¹³ I hongo no ji ma Bethsemes oyido jokeco ŋano pajo milelo; to munyo jotiŋo waŋ gin malo to joneno Kakan ma Cikirok pa Rwoth, josangala swa neno go.

¹⁴ Magal no obino to cungo i ndelo pa jacwo m'ilwoŋo ni Yosuwa m'oyido bedo Bethsemes cegin gi got madwoŋ. Ji jobaro yen m'oyido oor ma timo magal no, to jothumo nyikuse dhok no to jomiyo Rwoth paka mic awaŋa.

¹⁵ Jolevi joketho piny Kakan ma Cikirok pa Rwoth kodi sanduku m'oyido otiŋo cal m'otimi gi zahabu, aka joketho wi got madwoŋ no. To ji ma Bethsemes jomiyo Rwoth mic awaŋa kodi mic manman.

¹⁶ Rwodhe abic pa Jofilistia joneno jotimo gime, to jomako yo ma dok Ekiron gi ndelo no won.

¹⁷ Me a cal abic ma two akwota kwoŋ m'otimi gi zahabu ma Jofilistia jodhiro ri Rwoth paka mic ma kwanyo woko reco, kisi acel ocungo ri kisi tindi, acel ri Asidod, acel ri Gaza, acel ri Asikelon, acel ri Gath, aka acel ri Ekiron.

¹⁸ Cal ma fuko abic m'otimi gi zahabu ma bende jodhiro, kisi acel ocungo ri kisi rwodhe abic pa Jofilistia ma tindi je m'othok gi cel kodi ma k'othoki gi cel je. Got madwoŋ m'oketh'iye Kakan ma Cikirok pa Rwoth i ndelo pa Yosuwa i Bethsemes fodi nitie ocungo kiri konon me paka jakony ma gim'otimere.

¹⁹ Rwoth oneko cwo piero abirio Bethsemes rupiri joleŋo waŋ gin i Kakan ma Cikirok pa Rwoth. To ji joywak swa rupiri Rwoth oneko ji kweth i dier jo.

Ikowo Kakan ma Cikirok pa Rwoth Kiriath Yerim

²⁰ Ameno to ji ma Bethsemes jopenjo ni, “Ŋa manyalo cungo ruwaŋ Rwoth, Were maleŋ me? Kune ma wanyalo dhir'iye go ma kwanyo woko go bongi wan?”

²¹ To jodhiro jomikwenda bongi ji ma Kiriath Yerim waco rijo ni, “Jofilistia jodwoko Kakan ma Cikirok pa Rwoth. Lori win wibin wiomi widok gine.”