1 Samwiri 4 - KITAWO MALEŊ

Jofilistia jomayo Joisiraili Kakan ma Cikirok

¹ I hongo no, Jofilistia jocokere to jokidho lweny kodi Joisiraili. Joisiraili joay aka jokidho romo gi jo. Joisiraili jocokere kam'ilwoŋo ni Ebeneza aka Jofilistia jocokere kam'ilwoŋo ni Afek.

² To Jofilistia jocanere i bol aka jomonjo Joisiraili; lweny olieth swa to Jofilistia jonyalo Joisiraili aka joneko cwo ma romo 4,000 kama lweny obed'iye.

³ Munyo lweny okwe, to Joisiraili ma joboth jodok Ebeneza, jotel pajo jopenjere ni, “Raŋo Rwoth konon oyeyo Jofilistia nyalo wan! Weyi wakidhi waomi Kakan ma Cikirok pa Rwoth wok Silo, wotel wan aka wobothi wan i cingi jokwor mawan.”

⁴ To jomoro jokidho Silo omo Kakan ma Cikirok pa Rwoth pa lwak jolweny m'oguro kom pere kama nitie iye cwec ma jobwombi gin. Wot Eli ario, Hofin gi Finehas am'oyido jokur ma Kakan ma Cikirok to bende jobino gine.

⁵ Munyo Joisiraili joneno Kakan ma Cikirok otundo, josangala to koko pajo yengo piny.

⁶ Munyo Jofilistia jowinjo koko pa Joisiraili, jopenjo ni, “Koko ma malo me i kambi pa Joebulaniya nyutho aŋo?” To munyo joniaŋ nike Kakan ma Cikirok oyido otundo i kambi pajo,

⁷ lworo omako Jofilistia aka jowaco ni, “Werin jobino i kambi pajo. Kidamba riwan! Nger gima cale g'ama fodi oyido k'otimere riwan.

⁸ Kidamba riwan. Ŋa m'obothi wan wok i cingi werin ma jomeni me! Me werin ma jothumo Jomisir i thim.

⁹ Bedi win jomiseni, lweny win paka cwo, Jofilistia! Kakameno, wilalokere ŋecin pa Joebulaniya, paka oyido jobedo ŋecin mawan. Lweny win paka cwo.”

¹⁰ To Jofilistia jolwenyo matek to jonyalo Joisiraili, ma megi joŋweco dok pecin pajo. Joneko Joisiraili mathoth; 30,000.

¹¹ Jomako Kakan ma Cikirok pa Rwoth; aka wot Eli Hofin gi Finehas oneki jo.

Tho pa Eli

¹² Jal moro ma janono pa Benyamin oringo wok kama lweny oyido timer'iye to tundo Silo i ndelo no won. Ma nyutho rem pere, oyeco woko law pere to konjo fukefuke i wiye.

¹³ Eli onwaŋo obedo i kom pere i thengi royo ŋiyo, aka cunye oyido rembo ri Kakan ma Cikirok pa Were. Aka munyo jalo oywoyo wac me i tindi gipi paka rom, kisi nyatoro oywaki i lworo.

¹⁴ Munyo Eli owinjo woy me, openjo ni, “Woy me je ma ginaŋo?” To jalo redo bongi Eli to waco rigo gim'otimere

¹⁵ Eli oyido jaoro piero abuŋwen g'aboro aka waŋe oyido cegin tho

¹⁶ Jalo owaco ri Eli ni, “Akwale wok kama lweny obed'iye t'aringo tundo ka konon me.” Eli openjo go ni, “Aŋo m'otimere wodan?”

¹⁷ Jalo odwoko Eli ni, “Joisiraili joringo Jofilistia, aka Jofilistia jothumo Joisiraili kweth, wotin Hofin gi Finehas bende oneki jo; aka Kakan ma Cikirok pa Were omaki.”

¹⁸ Tekin jalo tuco Kakan ma Cikirok pa Were, Eli ogore piny gi yu dieŋeye wok i kom kam'oyido obed'iye i thengi royo to ŋute tur to go tho; oyido go oti aka nitie gi del mapek. Go oyido obedo jatel i piny Isiraili ma oro piero aŋwen.

Tho pa ciliendi Finehas

¹⁹ Ciwod Eli, cipa Finehas oyido nitie gi iye, aka oyido cegin nywol. To munyo owinjo ni omaki Kakan ma Cikirok pa Were, aka ni ba cwore kiri gi cwore je jotho, to ŋedi cakere gine to nywol.

²⁰ Munyo go cegin tho, ji ma jocolo go jowaco rigo ni, “Bedi gi miseni, inywolo nyathi majayac.” To go liŋaliŋa ma k'odwoko gimoro.

²¹ Ocwoko ri nyathi nyinge ni Ikabod dwoŋ mere ni, “Dwoŋ pa Were oweyo Joisiraili” Rupiri Kakan ma Cikirok pa Were omaki, aka ba cwore gi cwore je to jotho.

²² To go waco ni, “Dwoŋ pa Were oweyo Joisiraili rupiri Kakan ma Cikirok pa Were omaki.”