1 Samwiri 30 - KITAWO MALEŊ

Lweny gi Joamalek

¹ Munyo Daudi jotundo Ziklag i ndelo mar'adek, Joamalek oyido jomonjo yupiny ma piny Yuda gi Ziklag aka jowaŋo gi mac.

² Jok'oneko nyatoro kad'acel, aka jomako ji je to jokadho gi jo.

³ Munyo Daudi gi cwo pere jotundo, jonwaŋo ni tindi pajo owaŋ aka mon pajo, gi nyithindho pajo je okadhi gi jo.

⁴ Daudi gi cwo pere jotiŋo dwondi gin malo to jogoyo ndur, aka joywak cuka meni oloyo jo ma ywak.

⁵ Mon pa Daudi ario, Ahinowam ma wok Yezirel, gi Abigayili ciliendi Nabal ma wok Kamel je okadhi gi jo.

⁶ Daudi oyido nitie i teko rupiri cwo pere oyido jonitie gi gwayo i cuny jo aka oyido joluwo kwoŋ goyo Daudi gi telin ro nyithindho pajo. To Rwoth Were pere miyo go miseni.

⁷ Daudi owaco ri wod pa Ahimelek, Abiatha jacway ri Were i wi migam kelo rigo law ma jocway ri Were i wi migam joruko.

⁸ Daudi openjo Rwoth ni, “K'anoluw Joamalek me anomaki jo?” Rwoth odwoko go ni, “Luw jo ilamako jo to ibotho ji ma jomako je.”

⁹ Ameno to Daudi gi cwo pere 600 jokadho to jotundo milelo, aka jomegi jodoŋ kenyo.

¹⁰ Daudi gi cwo pere 400 jomedere; aka cwo 200 oyido meni oloyo jo ma jok'onyalo kalo milelo to jodoŋ kenyo.

¹¹ Cwo pa Daudi jonwaŋo jacwo moro ma Jamisir i thim to jokelo go bongi Daudi; aka jomiyo go mugat gi pi.

¹² Jomiyo go bende nyandere m'othwo, gi kayego ario ma nyingi vini m'othwo. Munyo jacwo no otieko camo, meni odwoko kwoŋe; rupiri go oyido ocowo ndelo adek ma k'ocemo kosa madho gimoro.

¹³ Daudi openjo Jamisir no ni, “Ŋa ma jadwoŋ perin, aka iwok kune?” Go odwoko ni, “An abedo Jamisir, aka abedo ŋeca pa Jaamalek. Jadwoŋ paran oweyan cen rupiri two omakan ndelo adek cen.

¹⁴ Oyido wakwalo iy'adec pa Jokereth yupiny ma piny Yuda, gi iy'adec pa jonono pa Kaleb, aka wawaŋo Ziklag.”

¹⁵ Daudi openjo go ni, “Ilateran bongi Joamalek no?” Jamisir odwoko Daudi ni, “K'ikwoŋere ran i nyingi Were ni ikilanekan, aka ikilamiyan i cingi jadwoŋ paran, alaterin bongi jo.”

¹⁶ Kenyo go otero Daudi bongi jo. Joamalek oyido joywore kisi kamoro, jocemo, jomedho, aka jofore ro gigipiny kweth m'oyido jonyaga wok bongi Jofilistia gi piny Yuda.

¹⁷ Yawere odikin munyo nyaka piny cot, Daudi gi cwo pere jomonjo Joamalek, aka jolwenyo tundo othieno. Ongoye kada Jaamalek acel m'onyalo kwalok wok i cingi Daudi gi cwo pere, kwanyo woko yac 400 ama joidho kayina to jokwale.

¹⁸ Daudi obotho kisi ŋatimoro je m'oyido Joamalek jomako, kiri gi mon pere ario.

¹⁹ Ongoye kada gimoro acel m'orwenyo. Daudi obotho nyithindho pa cwo pere je, kiri gi gigipiny ma Joamalek oyido jonyaga.

²⁰ Daudi bende omako ogwaŋe; aka cwo pere jocwayo dhok no yuwiy jo to jowaco ni, “Me je gigipiny pa Daudi.”

²¹ Kenyo Daudi ogik bongi cwo pere 200 m'oyido meni oloyo jo ma kadho gi Daudi to jodoŋ milelo Besor. Jobino to jojolo Daudi gi cwo pere 400 aka Daudi ocore cegin bongi jo to m'otho jo.

²² To cwo pa Daudi man ma jogwondo aka bukony m'oyido jokadho gi go jowaco rigo ni, “Jono nende jok'okadho gi wan, riameno jok'olim gigipiny ma wadwoko gine. Jowokadhi gi mon kodi nyithindho pajo kende.”

²³ To Daudi dwoko ni, “Wutmera, wikinyal timo ameno gi gima Rwoth omiyo wan; Rwoth ama ogwoko kwo mawan to miyo wan Joamalek i cingi wan

²⁴ Wiparo ni nitie ŋati manyalo yerok gi win i gime! Kisi nyatoro je, ŋati ma nende okidho i lweny gi ma nende odoŋ je; lalimo rapok marom.”

²⁵ Wok ndelo no Daudi oloko gime cik, aka Joisiraili fodi joluwo kiri konon.

²⁶ Munyo Daudi odwoko Ziklag, odhiro ri merin pere, jotel ma Yuda mic kwoŋ gigipiny ma jodwoko gine gi mikwenda ni, “Me mic perin wok kwoŋ gigipiny ma wanyaga kwoŋ jokwor pa Rwoth.”

²⁷ Odhiro ri ji ma Bethel, ji ma Rama yupiny ma piny Yuda, gi ji ma tindi Yatir.

²⁸ Ri ji ma Arower, ji ma Sifimoth, ji ma Esitemowa,

²⁹ ji ma Rakal, ri jonono pa Yeramel, ri Jokena

³⁰ gi ri ji ma tindi Horima, Borasan, Athac,

³¹ gi ri ji ma Hebron. Odhiro i kabedo je ma go kodi cwo pere oyido jotieko tund'iye.