1 Samwiri 16 - KITAWO MALEŊ

Iwiro Daudi gi mo paka kere

¹ Ndelo acel Rwoth owaco ri Samwiri ni, “Ilarembo ri Saulo kiri keraŋo? Atieko kwero go paka kere ma Isiraili. To onyo pama poŋi mo i tungi ogwaŋ, aka ikidhi; alaorin bongi Yese Jabethelehem, rupiri atieko yero kere wok kwoŋ wot go.”

² Samwiri openjo ni, “Anyalo nedi timo gino? Ka Saulo owinji, go bino nekan.” To Rwoth dwoko ni, “Kwany rwath ikidhi gine, aka i wac ni, ‘Abino miyo Rwoth cowirok.’

³ To ilwoŋo Yese gi wote je i cowirok, aka abino waco rin gir'atima. Ibino wiro gi mo ŋat'anowaci rin paka kere.”

⁴ To Samwiri timo gima Rwoth owaco rigo ni wotim to kadho Bethelehem. Jotel ma tindi jobino romo gi go munyo jokirin, aka jopenjo ni, “Me wendo ma siem, jatuci wac Were?”

⁵ Samwiri odwoko ni, “Abino i siem miyo Rwoth cowirok; lokere win maleŋ aka wibin kodan i cowirok.” To go waco ri Yese gi yac pere bende lokirok maleŋ to lwoŋo jo i cowirok.

⁶ Munyo Yese gi yac pere jotundo, Samwiri oneno wod pa Yese m'ilwoŋo ni Eliab, to go waco i cunye ni, “Adieri jal m'ocungo ruwaŋ Rwoth me ama go oyero.”

⁷ To Rwoth waco rigo ni, “Ikir'inen ŋono kosa boro pere, kole atieko kwero go; rupiri An akinen paka dhano neno. Ji joneno ŋono to an aneno adundo.”

⁸ To Yese waco ri wode m'ilwoŋo ni Abinadab luwo ruwaŋ Samwiri. To Samwiri waco ni, “Be, Rwoth k'oyero go je.”

⁹ Yese doko to kelo Sama. To Samwiri doko waco ni, “Be, Rwoth k'oyero go je.”

¹⁰ I nger acel Yese to miyo yac pere abirio je luwo ruwaŋ Samwiri. To Samwiri waco ni, “Be, Rwoth k'oyero ŋatimoro je kwoŋ jome.”

¹¹ To Samwiri penjo Yese ni, “Initie kendo gi wotin man?” Yese odwoko ni, “Nitie ocoko ama fodi odoŋ, to go nitie i thim kwayo rombo.” Samwiri owaco ni, “Waci rigo wobin ka, wakilamiyo cowirok cuka go bino.”

¹² Ameno Yese owaco ni wolwoŋi go. Go oyido obedo jayac maŋon, ma mbute, aka ma waŋe liw. Rwoth owaco ri Samwiri ni, “Me won ago, ay malo iwir go gi mo.”

¹³ Kenyo Samwiri okwanyo mo to wiro Daudi ruwaŋ wutmin go. Piyo piyo no to cuny pa Rwoth loro kwoŋ Daudi i meni wok i ndelo no kadho yuwaŋe. Kenyo to Samwiri ay to dok Rama.

¹⁴ Cuny pa Rwoth onyo to weyo Saulo, aka cuny m'ocido m'owok bongi Rwoth to pilo go.

¹⁵ Ŋecin pere jowaco rigo ni, “Waŋeyo paka cuny m'ocido ma Rwoth odhiro pilin.

¹⁶ Riameno, jadwoŋ, miy cik, aka wadwar nyatoro manyalo goyo tongol. Aka ka cuny m'ocido obin kwoŋin, ŋato lagoyo tongol, t'ibedo maber.”

¹⁷ To Saulo miyo ŋecin pere cik ni, “Dwar win nyatoro manyalo goyo tongol maber wi keli go bongan.”

¹⁸ Acel kwoŋ ŋecin pere owaco rigo ni, “Neni, aŋeyo wod pa Yese ma wok Bethelehem manitie gi ndijo ma goyo tongol. Go bende obedo jamiseni, ŋon, go jalweny, aka riek i luwo; aka Rwoth nigi go.”

¹⁹ To Saulo oro jomikwenda waco ri Yese ni, “Dhiri ran wodin m'ilwoŋo ni Daudi ma jakwath rombo.”

²⁰ To Yese dhiro Daudi bongi Saulo gi nyathi diel, punde m'otiŋo mugat, kodi pien m'opoŋ'iye vini.

²¹ Munyo Daudi otundo bongi Saulo, ocako tiyo rigo. Saulo omaro Daudi tektek, to yero go bedo ŋeca pere.

²² Kenyo Saulo odhiro wac ri Yese ni, “Amaro Daudi. Weyi go wodoŋ ka wotiy ran.”

²³ Wok kenyo, kisi ka Rwoth odhiro ri Saulo cuny m'ocido Daudi oyido mako tongol pere to goyo. Cuny m'ocido oyido weyo go to doko Saulo winjo maber.