1 Samwiri 12 - KITAWO MALEŊ

Samwiri luwo gi Joisiraili macowe

¹ To Samwiri waco ri Joisiraili ni, “Neni, atieko timo riwin gim'oyido wimito, aka amiyo win kere dhumo win.

² Neni, onyo kere ama pama telo win; an onyo ati anitie gi lwar, aka yac paran jonitie gi win. Atieko telo win wok i soye paran tundo gunyo ni.

³ To onyo pama an e segeya win an ruwaŋ Rwoth, kodi ruwaŋ kere ma go oyero: Akwalo ye dhiaŋ, kosa punda pa nyatoro moro? Nitie ŋat'atieko kwalo kosa diyo? Nitie nyatoro m'ocowo nyewan ye ma umo waŋan? Ka nitie kwoŋ gigipiny me m'atieko timo, abino dwoko gimoro je m'akwanyo.”

⁴ Ji jodwoko ni, “Be, fodi ikikwalo, kosa idiyo wan, kosa ikwanyo gimoro kwoŋ kada ŋat'acel.”

⁵ Samwiri odwoko ni, “Rwoth kodi kere ma go oyero jobedo jokony paran konon ni ongoye gimarac m'atimo.” To Joisiraili jodwoko ni, “Rwoth obedo jakony mawan.”

⁶ Samwiri omedere waco ri Joisiraili ni, “Rwoth obedo jakony, rupiri go oyero Musa kodi Aron to jowodho kwarere mewin wok i piny Misir.

⁷ To onyo pama cungi win liŋ, ŋey asegeya win ruwaŋ Rwoth k'apoyo win gir'aura ma Rwoth otimo ma botho win gi kwarere mewin.

⁸ Munyo Yakobo gi peco pere jokidho Misir to Jomisir jodiyo jo, kwarere pajo joywak ri Rwoth aka Rwoth ooro Musa kodi Aron wodho jo wok piny Misir, aka omiyo jo lowo me.

⁹ To wiy gin wil gi Rwoth Were pajo, to Rwoth jwango jo i cingi Sisera, jamituka pa jolweny pa Yabin kere ma tindi Hazor, kodi i cingi Jofilistia, kodi i cingi kere pa Jomowab; to jolwenyo gi jo

¹⁰ To joywak ri Rwoth, aka jowaco ni, ‘Watimo reco, rupiri wakwero Rwoth, to walamo Bal gi Asitate; t'onyo pama both wan i cingi jokwor mawan ŋey walamin.’

¹¹ To Rwoth oro Yerubal m'ilwoŋo ni Gideon, Barak, Yefitha, kodi an Samwiri, to botho win wok i cingi jokwor mewin wok i kisi thenge; to wibedo i siem.

¹² To munyo wineno Nahas kere ma Amon cegin monjo win, wiwaco ran ni, ‘Be, wamito kere ma wodhum wan.’ Kole Rwoth, Were mewin oyido obedo kere mewin.

¹³ Onyo ee kere mewin ma wiyero, ma ro go wikwayo. Neni, Rwoth otieko miyo win kere wodhum win.

¹⁴ Ka winolwor Rwoth, to wilamo go, to wiwinjo dwonde, to wiluwo or pere, aka ka win gi kere ma dhumo win winoluw Rwoth Were mewin, kisi gimoro je labedo maber gi win.

¹⁵ To ka wik'owinji dwondi Rwoth, to wikwero luwo or pere, cingi go labedo kwoŋ win gi kere mewin.

¹⁶ Riameno, cungi win liŋ winen gigipiny madongo ma Rwoth kidho timo i waŋ win.

¹⁷ Me k'obedo hongo ma keco ŋano? Alakwayo Rwoth, ni wodhiri derino ma koth gi koth; aka nyaka wibino ŋeyo ni kidakana mewin dwoŋ, ma witimo ruwaŋ Rwoth, munyo wikwayo go miyo win kere.”

¹⁸ Ameno to Samwiri kwayo Rwoth, aka Rwoth odhiro derino ma koth gi koth ndelo no won; to ji je jolworo Rwoth kodi Samwiri.

¹⁹ To Joisiraili jowaco ri Samwiri ni, “Kway riwan Rwoth Were perin, ŋey wakiri watho; rupiri wamedo i wi reco mawan raco me, munyo wakwayo kere.”

²⁰ Samwiri odwoko ni, “Wikiri wilwor; kada witieko timo reco me je, wikiri wiwey lworo Rwoth, to tiyi win rigo g'adundo mewin je.

²¹ Wikiri wirangi cal m'ongoye kony wilam rupiri jokinyal botho aka jobedo gigipiny m'ongoye.

²² Rwoth kilabolo ji pere woko, ma miyo nyingi go dwoŋ, rupiri osangala Rwoth loko win ji pere.

²³ To ri an, Rwoth ogeŋan timo reco, t'aweyo kwayo riwin; kwanyo woko alafonjo win royo maber m'otire.

²⁴ Nyaka lwor win Rwoth, to witiyo rigo gi genirok g'adundo mewin je; poyi win gigipiny madongo ma go otieko timo riwin.

²⁵ To ka wimedere i kidakana mewin, win kiri gi kere mewin je, ibino reyo win woko.”