1 Samwiri 11 - KITAWO MALEŊ

Saulo kengila Joamon

¹ Munyo dwe ma romo acel okadho, Nahas Jaamon okidho to mako tindi Yabes Giliad. To ji ma Yabes jowaco rigo ni, “Tim kodi wan cikirok, aka wabino bedo ŋecin perin.”

² Nahas odwoko ni, “Alatimo gi win cikirok ka wiyere ni, afudhi waŋ kisi nyatoro moro je maracuc ŋey akel wickwot ri Isiraili gipi.”

³ To jotel ma Yabes jowaco rigo ni, “Miy wan ndelo abirio wadhir jomikwenda Isiraili paka rom; k'ongoye ŋata nyalo botho wan, to wamiyere rin.”

⁴ Munyo jomikwenda jotundo Gibeya, kama Saulo oyido bed'iye, jowaco ri ji gime; aka ji je jogoyo ndur to joywak.

⁵ Saulo oyido nyaka owok i ndelo fur dwoko gi megikwe pere, to penjo ni, “Aŋo marac? Raŋo ji joywak?” T'iwaco rigo gima jomikwenda ma jowok Yabes jowaco.

⁶ Munyo Saulo owinjo gime, cuny pa Rwoth opie kwoŋe, aka omako keme.

⁷ Saulo omako megikwe pere ario, othumo jo i muma to oro jomikwenda wotho gi jo i piny Isiraili paka rom ka jowaco ni, “Me a gima latimere ri megikwe pa ŋatimoro je m'okwer luwo Saulo gi Samwiri kidho i lweny.” To Rwoth miyo Joisiraili je lworo, aka joje jomakere kanyacel.

⁸ Saulo ocoko jo i tindi Bezek, aka oyido joromo ji 300,000 wok Isiraili kodi 30,000 wok Yuda.

⁹ To jowaco ri jomikwenda ma jowok Yabes ni, “Waci win ri ji mewin ni dikin mafodi k'otundo sawa aucel m'odieceŋ, ibino botho win.” Munyo ji ma Yabes jowinjo mikwenda me, josangala swa.

¹⁰ Ameno to ji ma Yabes jowaco ri Nahas ni, “Dikin walamiyere rin, aka itim gi wan gima cunyin mito.”

¹¹ Wor no Saulo opoko jolweny pere i kitipin adek, aka munyo piny yawere jokidho to jomonjo Joamon kam'oyido jocokere iye. Joneko Joamon kweth tundo sawa aucel, aka ma joboth jokedhere kicar, kisi nyatoro to ŋweco.

¹² Joisiraili jopenjo ni, “Nikune cwo ma jowaco ni Saulo kinyal bedo kere mawan? Keli win jo ŋey waneki jo.”

¹³ Saulo odwoko ni, “Ongoye ŋati m'ilaneko konon me, rupiri konon obedo ndelo ma Rwoth obotho iye Isiraili.”

¹⁴ To Samwiri waco ni, “Biye win, wakadhi Gilgal, aka kenyo waridhi Saulo paka kere mawan.”

¹⁵ Ameno joje jokadho Gilgal, aka kenyo jokwoŋo Saulo paka kere ruwaŋ Rwoth. Kenyo to jomiyo cowirok ma siem ruwaŋ Rwoth, aka Saulo gi ji je ma Isiraili jofore swa.