1 Petero 1 - KITAWO MALEŊ

¹ Balwa m'owok bongi Petero, jamoor pa Yesu Kristo. Ri ji pa Were m'oyer ma jobedo paka wendo i piny aka jotiakere iy'adec ma Ponto, Galasia, Kapadosia, Asia kodi Bithinia.

² Oyer win r'atoŋa ma Were Baba won oŋeyo kicutho, nike Cuny Maleŋ woloki win maleŋ, ŋey wiwinji Yesu Kristo to lonyo win gi remo pere. Weyi nema gi siem wobedi mewin i thotho.

Geno makwo

³ Weyi wapaki Were Ba Rwodhiwan Yesu Kristo. Ro ŋono pere m'oasere, go omiyo wanywole i kwo manyen munyo ocerino Yesu Kristo kwoŋ jom'otho to miyo wan geno ma kwo i cuny wan,

⁴ to waŋiyo yumalo munyo wakiyo lunjo ŋaŋo ma kitopi, kosa nyekere, kosa rumi, ma Were okano riwin i polo.

⁵ Ato ro yeyo mewin am'omiyo meni pa Were kuro win cuka tundo ndelo ma both m'oyik nyutho ka ndir otundo.

⁶ Sangala win gi wac me, kad'onyo i hongo me witieko nwaŋo candirok munyo wibedo gi rem hongo macek ro tem m'omore m'obino riwin.

⁷ Candirok me obino r'atoŋa ma temo yeyo mewin. Kole kada zahabu ma nyekere je itemo gi mac. Am'omiyo yeyo mewin ma diwelo loyo zahabu, bende yenyere wotem wonen k'otire, ŋey gino wokel riwin pak kodi dwoŋ kodi wor i Ndelo m'ilanyuth'iye Yesu Kristo kamaler.

⁸ Wimaro go kada fodi wikineno go; wiyeyo go, kada pama wikinen go; aka winigi kisangala ma didwoŋ ma kiwacere,

⁹ rupiri onyo wilimo gima wok i yeyo mewin, m'obedo both ma cuny win.

¹⁰ Both me ama jotuci wac ma joluwo kwoŋ nema pa Were ma d'omiyo win, jotemo rango tiende maber.

¹¹ Jotemo rango tiende munyo jomito ŋeyo ni keraŋo ma hongo no d'otund'iye, kodi paka d'obino; ato Cuny pa Kristo i jo oyido cimo hongo no munyo tuco candirok ma go d'ociro, kodi dwoŋ ma d'owok'iye.

¹² Were onyutho jotuci wac me ni oyido jokitiy rijo wegi, to riwin, munyo joluwo kwoŋ adieri ma pama wiwinjo. Jomikwenda ma Wac Manyen Maber, ma joluwo i meni pa Cuny Maleŋ mor wok i polo, ama jotito riwin adieri me. Me adieri ma kiri jomalaika je jomito ŋeyo dwoŋ mere.

Lwoŋo jokristo bedo gi kwo maleŋ

¹³ Am'omiyo yik win paro mewin ma tic; bedi ma widhumo cuny win, aka kethi win geno mewin je kwoŋ nema ma bino riwin k'onyuthi Yesu Kristo kamaler.

¹⁴ Paka nyithindho ma winjo Were, wikiri wiyeyi awanya macon m'onwaŋo winigine munyo fodi wikuya Were wodhum kwo mewin.

¹⁵ Kucel, bedi win maleŋ i gimoro je ma witimo, paka Were m'olwoŋo win leŋ;

¹⁶ rupiri ndiko waco ni, “Wiripo bedo maleŋ, rupiri aleŋ.”

¹⁷ Kole wilwoŋo Were ni Baba ka wikwayo, aka go ama thumo banja ri ji je marom. Am'omiyo or win kwo mewin i piny ka paka joma wendo munyo wimiyo go dwoŋ.

¹⁸ Ato wiŋeyo gim'ocul ma gonyo win woko kwoŋ kwo masisiri ma winwaŋo wok bongi kwarere mewin, aka gim'onyewo win no k'obedo gimoro ma nyekere woko paka zahabu kosa feza,

¹⁹ to remo pa Kristo am'ogonyo win, go m'obedo paka nyathi rombo m'ongoye gi ŋolo moro kosa waŋpoyo.

²⁰ Were oyero go mafodi k'ocwey piny, aka onyuthere i ndelo macowe me ma bero mewin.

²¹ I go wiyeyo Were, m'ocerino go kwoŋ jom'otho to miyo go dwoŋ, m'omiyo yeyo kodi geno mewin nitie kwoŋ Were.

²² To paka onyo wilony ro winjo adieri, aka winigi mar m'ocwiny ri jowoti win ma joyeyo, ere mare win adieri gi cuny win je.

²³ Kole onyo winywolere madirio, ki kwoŋ kodhi ma tho, to kwoŋ makitho, cungo kwoŋ wac pa Were makwo kendo ma yindira cil gi cil.

²⁴ Rupiri ndiko waco ni, “Ji je jocale lum, aka dwoŋ pajo cale thiw lum; Lum tho, to thiwe oy woko,

²⁵ to wac pa Rwoth doŋadoŋa cil gi cil.” Aka me a wac m'otiti riwin.