1 Kerin 9 - KITAWO MALEŊ

Were menyere ri Solomon kendo

¹ Munyo Solomon otieko geto Ot pa Rwoth, ot pa kere, kodi kisi gima go omito geto,

² Rwoth omenyere rigo madirio, paka oyido omenyere rigo i Gibeon.

³ Aka Rwoth owaco rigo ni, “Atieko winjo kwayo perin. Alonyo Ot pa Were me m'igeto paka kabedo m'ilalaman'iye cil gi cil. Abino kuro t'agwoko i hongo je,

⁴ k'inowothi ruwaŋan paka benin Daudi owotho, gi cunye macil kodi tiro, timo kisi gim'amiyin cik timo, kodi kuro cik kodi Or paran je,

⁵ Abino kuro cikirok m'atimo gi benin Daudi munyo awaco rigo nike nyikwaye ama jobino dhumo Isiraili noknok.

⁶ To ka in kodi nyikwayin wiweyo luwan, ka wikikuro cik kodi Or paran m'amiyo win to wilamo werin man,

⁷ kenyo alafudho woko ji paran Isiraili wok i lowo m'atieko miyo jo, aka alajwango Ot pa Were m'atieko loko maleŋ paka kam'iripo laman'iye. Isiraili lalokere gir'ageca aka ji jolatero gi cay.

⁸ Ot pa Were me bino lokere kidhur gunda aka kisi ŋat'oluwi ka labwok to dhier; aka jobino penjo ni, ‘Raŋo Rwoth otimo gime ri lowo me kodi Ot pa Were me?’

⁹ Ji joladwoko ni, ‘Kwoŋbedo jojwango Rwoth Were m'owodho woko kwarere pajo wok i piny Misir. Joworo werin man, to jolamo jo; riameno go okelo teko me kwoŋ jo.’ ”

Solomon timo cikirok gi Hiram

¹⁰ Solomon ocowo oro piero ario geto Ot pa Were kodi cel pa kere.

¹¹ Kere Hiram oyido omiyo go yen sida je kodi yen madongo maboyo kodi zahabu je ma Solomon omito ma timo tic pere. Rumacen kere Solomon omiyo Hiram tindin piero ario iy'adec ma Galili.

¹² Kere Hiram obino wok i Tire neno tindin, aka k'ofoyo jo.

¹³ Ameno Hiram owaco ri Solomon ni, “Me nger tindin aŋo m'imiyan, omin an?” R'atoŋa me kabedo no ilwoŋo ni Kabul kiri konon.

¹⁴ Hiram oyido odhiro ri Solomon zahabu ma romo kilo 4,000.

Gigipiny ma Solomon otimo man

¹⁵ Kere Solomon ooro tic mar'arom geto Ot pa Were, cel pa kere, yiko lowo ma yuwok ceŋ ma tindi madwoŋ, geto kor tindi madwoŋ kodi geto kendo tindin madongo Hazor, Megido, kodi Gezer.

¹⁶ (Con mere Farawo ma Misir oyido omonjo to omako Gezer, oneko ji mere, to waŋo woko. Kenyo omiyo nyare paka mic munyo onywomere gi Solomon,

¹⁷ aka Solomon ogeto kendo) kodi Bethhoron piny,

¹⁸ Balath, Tamar, i thim ma Yuda,

¹⁹ tindin madongo m'oyido ikano iye gigipiny pere, tindin madongo ma kayina kodi cawilin pere, kodi kisi gimoro ma Solomon omito geto i Yerusalem, i Lebanon, kodi kamoro je i ker pere.

^20-21 Ri tic pere arom, Solomon ooro nyikway ji ma Kanan ma Joisiraili oyido jok'oneko munyo jotero lowo pajo. Me obedo Joamor, Johiti, Joperiz, Johivi, kodi Joyebus, ma nyikway jo jomedere bedo ŋecin kiri konon.

²² To Solomon k'oloko Joisiraili ŋecin; jo jotiyo paka jolweny pere, jodhum, jomituka jolweny, jogwey cawilin, jotel pa jokur pere, kodi jogwey kayinin pere.

²³ Solomon oyido nitie gi jodhum 550 ma jotelo tic mar'arom i geto pere m'opokere opokere.

²⁴ Nyar Farawo oeye wok i tindi madwoŋ pa Daudi to kadho i ot pere won ma Solomon ogeto rigo, aka Solomon ogeto mayilo i lowo ma yuwok ceŋ ma tindi madwoŋ.

²⁵ Kisi oro Solomon oyido miyo cowirok awaŋa kodi cowirok ma siem didek i wi migam m'ogeto ri Rwoth. Go bende owaŋo buban ri Rwoth. Ameno Solomon otieko geto Ot pa Were.

²⁶ Kere Solomon bende ogeto bogi mel i Eziongeba, macegin gi Eloth i thengi Nam M'obokere i lowo ma Edom.

²⁷ Kere Hiram ooro cwo pere moro ma jotieko niaŋ tic ma Nam tiyo gi cwo pa Solomon.

²⁸ Jocewere kidho i lowo ma Ofir, aka jokelo ri Solomon zahabu ma kalo kilo 14,000.