1 Kerin 7 - KITAWO MALEŊ

Cel pa Solomon

¹ Solomon bende ogeto cel pa kere pere, aka otero go oro apar g'adek cowo.

^2-3 Ogeto ot ma Lul ma Lebanon, boro mere oyido mita piero aŋwen g'aŋwen, laco mere mita piero ario g'ario, aka ŋawirok mere mita apar g'adek g'adec. Oyido nitie gi siro bol adek ma yen sida, apar g'abic i kisi bol, gi mbawin ma sida i wi jo. Miango mere oyido obedo ma yen sida, m'ocore kiri i kisikin ma kanirok m'oyido othiel gi sirin.

⁴ I kisi thenge ario ma kor ot oyido nitie bol adek ma dirisin.

⁵ Dhiote gi dirisin oyido jonitie gi miangin ma kisi thenge jo ario rom, aka bol adek ma dirisin i kisi kor ot oŋiyere gi bol m'otire gine.

⁶ Kisika ma sirin oyido mita piero ario g'ario i boro kodi mita apar g'adek g'adec i laco. Oyido nitie gi diedipo m'oum to ithielo gi sirin.

⁷ Kisika ma dhum kama Solomon oyido thumo iye banjin, oyido nitie gi mbawin ma sida wok i dier ot tundo i kore.

⁸ Ot pa Solomon won m'oyido go bed'iye, i diedipo man yuŋey kisika ma thumo banja, bende oyido ogeti paka geto man. Go bende ogeto nger ot acel ri cege, nyar kere ma Misir.

⁹ Wok i kindi ot tundo i wiye, udi me gi diedipo oyido ogeti gi telin mafoth. Telin me oyiki kam'igol'iye telin aka oŋadi jo m'opima, t'ifotho jo i kisi thenge gi gikiranda.

¹⁰ Kindi jo oyido ogeti gi telin mapando m'oyik kam'igol'iye telin, megi mita adek g'adec i boro, aka megi mita aŋwen i boro.

¹¹ I wi jo oyido nitie telin man m'ilwoŋo ni hewin, m'oŋad m'opima, kodi mbawin ma yath sida.

¹² Diedipo ma cel pa kere, diedipo ma iy Ot pa Were, kodi kisika ma donjo i Ot pa Were oyido jonitie gi kor ot manitie gi yen sida i wi telin m'oŋad m'okonji didek.

Tic pa Hiram

¹³ Aka kere Solomon ooro wokel jacwo m'ilwoŋo ni Hiram wok i Tire.

¹⁴ Hiram oyido wod pa citho ma janono pa Nafital, aka bamere oyido wok Tire aka oyido nitie gi ndijo ma ywel. Hiram oyido opoŋ gi rieko, niaŋ, kodi ndijo ma timo tic gi ywel. Hiram obino bongi kere Solomon, aka otimo tic pere je.

Sirin ario ma ywel

¹⁵ Hiram otimo sirin ario gi ywel. Kisi acel oyido mita aboro i boro kodi mita 5.3 thoko to ketho jo i dhiot ma Ot pa Were.

¹⁶ Hiram bende otimo raŋaw talin i wi sirin ario, kisi acel mita 2.2 i boro.

¹⁷ Go bende otimo kicungwo m'okedi to ketho wi kisi siro,

¹⁸ kodi bol ario ma cal ma pomo.

¹⁹ Raŋaw ma wi sirin oyido jocale thiw dudi. Boro pajo oyido mita 1.8

²⁰ aka okethi jo i wi cal ma lijegere thoko. Oyido nitie cal ma pomo 200 i bol ario thoko kisi raŋaw i wi sirin.

²¹ Hiram oketho sirin ario me ruwaŋ dhiot ma Ot pa Were. Acel i thenge ma yupiny olwoŋi ni Yakin, aka man i thenge ma yumalo olwoŋi ni Bowaz.

²² Raŋaw i wi sirin ma jocale thiw dudi oyido jonitie i wi sirin. Aka Hiram otieko timo sirin.

Pipa ma ywel

²³ Hiram bende otimo pipa ma nyaraunda gi ywel. Lutho mere oyido mita 2.2 laco mere oyido mita 4.4 aka dwoŋo mere oyido mita 13.2

²⁴ Oyido nitie bol ario mar'asande m'otimi gi ywel thoko miango ma pipa woko m'otimi i nger acel.

²⁵ Pipa oyido obedo i wi cal ma thwondhe apar g'ario ma joŋiyo woko, adek i kisi thenge.

²⁶ Nywol ma thengi pipa oyido inci adek, miango mere oyido cale miango ma kikopo m'oyare woko paka mawuwa ma thiw dudi aka oyido tiŋo lita 40,000.

Magal ma ywel

²⁷ Hiram bende otimo magal apar gi ywel. Kisi magal oyido mita 1.8 i boro, mita 1.8 i laco, kodi mita 1.3 i ŋawirok.

²⁸ Otimi jo gi yen m'opay ma jothengi gin aŋwen marom i miangin.

²⁹ Okethi kwoŋ yen m'opay cal ma simbwore, thwondhe gi cwec ma jobwombi gin, aka i wi miangin gi i pendi gin okethi cal ma simbwore, thwondhe kodi cal ma gim'owiy.

³⁰ Kisi magal oyido nitie gi tiende gi fuliwero m'otimi gi ywel. I kisi sonda aŋwen oyido nitie githielo wer. Githielo wer me oyido okicini gi cal ma gim'owiy.

³¹ Oyido nitie miango ma nyaraunda ri wer. Woki i wi magal kadho malo oyido mita 0.5 aka loro piny mere oyido mita 0.7 aka oyido nitie gi yen m'opay thoko.

³² Tiendan magal oyido jonitie i ŋangi yen m'opay aka boro pajo m'oyido inci piero ario g'abirio. Fuliwero oyido otim i nger acel gi magal.

³³ Tiendan magal oyido cale tiendi cawila, fuliwero, miangin, pagere, kodi girwako pagi pajo je oyido otim gi ywel.

³⁴ Oyido nitie githielo i sondin aŋwen ma magal ma tim acel gine.

³⁵ Oyido nitie thol ma mita 0.2 i wi magal thoko. Githielo mere kodi yen m'opay mere oyido tim acel gi magal.

³⁶ Githielo gi yen m'opay oyido okicini gi cal ma cwec ma jobwombi gin, simbwore, yen thith, aka kisi kama hongo odoŋ'iye, gi cal ma gim'owiy thoko.

³⁷ Ama apaka Hiram otimo magal, oyido jocale aka jorom.

³⁸ Hiram bende otimo wer apar ri kisi magal. Kisi wer oyido mita 1.8 i laco, aka oyido tiŋo lita 800.

³⁹ Oketho magal abic i thenge ma yupiny ma Ot pa Were, kodi abic man i thenge ma yumalo. Pipa mere oketho i dier thenge ma yupiny kodi yuwok ceŋ.

Gigipiny ma Hiram otimo

⁴⁰ Hiram bende otimo degi, mwiko, kodi atewe. Ameno go otieko tic je ma Solomon omiyo go ri Ot pa Were. Me a gigipiny ma Hiram otimo.

⁴¹ Sirin ario, raŋaw i wi sirin, kodi cal ma lijegere m'okedi i wiye.

⁴² Cal ma pomo m'otimi gi ywel 400 i bol ario ma miya thoko cal ma lijegere m'okedi.

⁴³ Magal apar, kodi wer apar i wi magal.

⁴⁴ Pipa acel, kodi thwondhe apar g'ario i ŋange thielo.

⁴⁵ Degi, mwiko, kodi atewe. Gigipiny me je Hiram otimo ri Solomon gi ywel m'oleny.

⁴⁶ Kere omiyo wotim gigipiny me je i dier Sukoth gi Zarethan i milelo Yordan.

⁴⁷ Solomon oweyo gigipiny me je ma k'opima kwoŋbedo oyido jodit aka ywel ma oor timo jo k'oŋeyere.

⁴⁸ Solomon bende omiyo wotim gigipiny ma zahabu ri Ot pa Were. Migam, meza ma ketho mugat m'amiyo Were,

⁴⁹ raŋaw talin apar m'oyido ocungo ruwaŋ Kabedo Maleŋ Loyo, abic i thenge ma yupiny kodi abic i thenge ma yumalo, mawuwin, talin, lew gin,

⁵⁰ kikopere, girwako uzi talin, wer, atewe ma buban, sapikere ma tiŋo cuk mac, kodi petin ma thigin ma Kabedo Maleŋ Loyo gi thigin ma woko ma Ot pa Were.

⁵¹ Munyo Solomon otieko tic ma Ot pa Were je, okano gigipiny je ma bamere Daudi omiyo Rwoth, feza, zahabu kodi gigipiny man i kisika ma kan i Ot pa Were.